စၞောန်ထ္ၜးပွံက်ဂုဏ်ဓဝ် ပါဠိဂုဏ်ဓဝ်တြဴတပ်

နဲပူဇဴဓဝ် ။−−−−−။ ဗီုဂွံပူဇဴဓဝ်။ “ကျာ်ကဵုသၚ်ဂှ် ဟိုတ်နူမၞုံပြာကတ်ညာတ်ကေတ်ဗီုအယောၚ်အလာသဏ္ဌာန်မာန်စိ ပူဇဴဒှ်, ပူဇဴဂွံ, ပူဇဴလောဲသွာဒၟံၚ်ရ၊ ဓဝ်ဂှ် ဟိုတ်နူဟွံမွဲပြာကတ်ကဵုဗီုသဏ္ဌာန်ထ္ၜောံကလၚ်တၚ်နေၚ်(တၚ်ဂၞေၚ်)ဂှ်ရ− ဗီုလဵုဂွံသ္ပပူဇဴညိရော”ရဴသာ်ဝွံ ကသပ်စိုတ်ကတဵုဒှ်တုဲ ဗဗၞးမွဲဂှ်ဟေၚ် ကေၚ်ဂရၚ်ပ္တီလဝ်ကျာ်တြဲရ။

ကာလဂှ် ကျာ်တြဲလေဝ် “ယွံဗမၞး မိက်ဂွံသ္ပပူဇဴဓဝ်မ္ဂး ခၟဳမတီညာတ်ကေတ်ဓဝ်ဗွဲမဂၠိုၚ်ဂၠၚ်မၞုံကဵုဗဟုသုတတံဂှ် အာသ္ပပူဇဴညိ”ဂးတုဲ အာသၟာန်ဂရၚ်ပ္တီခၟဳမၞုံကဵုဗဟုသုတပ္ဍဲဇရေၚ်သၚ်အတိုၚ်ပ္ညုၚ်ကျာ်ရ၊ ဃောဗဗၞးသၟာန်ဂရၚ်ပ္တီဒၟံၚ်ဂှ် ခၟဳသၚ်ဂမၠိုၚ် ပ္ညုၚ်ထ္ၜးဏာမှာထေရ်အာနန္ဒ(အာနန်)တုဲ အတိုၚ်သၚ်တံမပ္ညုၚ်ထ္ၜးဂှ်ဟေၚ် ဗဗၞးရန်တၟံကဵုဓဝ်တုဲ ကဵုဒါန်သ္ပပူဇဴနကဵုယာတ်သ္ၚာတန်နုဟ်လ္ၚီ မွဲလ္ၚီကသာပ်ရ−(မွဲလ္ၚီဒကေဝ်ဝေါဟာလၟုဟ်)၊ မှာထေရ်အာနန်ဂှ် ဒှ်ညးဍိုက်ပေၚ်ကဵုပရိယတ်မၞုံကဵုဗဟုသုတဂၠိုၚ် ဍိုဟ်ကေက်စဳကၠးလောန်တုဲ ဗဗၞးပူဇဴူဓဝ်ရောၚ်။

 

• “ပ္ဍဲဘိက္ခာပရံပရဇာတ်နိပါတ်ပကိဏ္ဏကဂှ် တွံလဝ်မွဲဗီုကီုရ၊ သမ္ၚေဟ်နူဍုၚ်သာရဝှ်တိတ်အာဘာဇေတဝန်တုဲ ပူဇဴဓဝ်တွံလဝ်ရောၚ်၊ ပ္ဍဲအဋ္ဌကထာသုတ်ပါထေယျပါသာဒိကသုတ် − ဓမ္မရတနပူဇာ− ဇေန် − ၉၁−ဂှ် ဗဗၞးမွဲအာပူဇဴသ္ၚာတိစဳဝရိက်မၞုံကဵုၚုဟ်မွဲလ္ၚီကသာပ်တွံထ္ၜးလဝ်တုဲ ဂလာန်တံဂှ် ဒှ်ဍာံစၟတ်ဖအိုတ်ရောၚ်။

ဟိုတ်ဂှ်ရ− ပ္ဍဲကာလလၟုဟ်ဝွံ ဂကူရာမညဗုဒ္ဓဘာသာအလုံအိုတ်သီုတံဂှ် အလဵုဇကုတုဲ သ္ဂောံပြာပ်တိတ်အာကဵုခမဳသၚ်မၞုံဒၟံၚ်ပ္ဍဲဍုၚ်ကွာန်ရးနိဂီု ဘာအစံၚ်အ္စာဇကုတုဲ ညံၚ်ဂွံဒှ်ပူဇဴဓဝ်မာန် သၟာန်ဂရၚ်ပ္တီသ္ပလွဳပရာအိုတ်ညိ၊ သွက်ဂွံပူဇဴဓဝ်လေပ်ဂှ် ဒုၚ်ကေတ်နဲကဲအ္စာဇကုအိုတ်ညိ၊ ပ္ဍဲအခါကာလစိုပ်အာဇရေၚ်ခၟဳသၚ်ဇကုမရှ်ေသှ်ေထံက်ပၚ်လဝ်တံဂှ်လေဝ် ခၟဳသာမဏဳမကတ်လ္ၚတ်လိက်ပတ်ဖျေံပတိုန်ဒၟံၚ်ပိဋကတ်ပိတဝှ်ကျာ်ကီု မၞုံတဴရ။

ဟွံသေၚ်သာ်ဂှ် ခၟဳသၚ်မချူခၞံပြကိုဟ်မမိက်ကဵုမွဲမွဲတုဲ ယိုက်ဂၠေၚ်ဒၟံၚ်ဂလေၚ်သာသနာပရိယတ်ပဋိပတ်ကီု ခၟဳသာမဏဳမလေပ်လိက်ပတ်မၞုံကဵုဗဟုသုတဂၠိုၚ်ဂၠၚ်တံဂှ်ကီု၊ ခၟဳသာမဏဳဂမၠိုၚ် မၞုံသဘဴမဖှ်သာ်ဝွံ ညံၚ်ဂွံလုက်စုက်ဂဗဆဵုဒးမာန်ဂှ် စကာညာန်ဘာန်ကဵုဂွံဒှ်ရုဲစှ်ကေတ်ဗွဲမလျုၚ်ဇြုၚ်သ္ဍိုက်တုဲ ယိုက်ဒိုက်ထံက်ပၚ်နကဵုဒကာပစ္စယ်ပန်မတွံဂး သပိုၚ်သ္ၚာ, ပိဏ္ဍပါတ်, ဘာ, ဂဥုဲလၟိုန်ကာလညိ။

ကာလမဂွံထံက်ပၚ်ယိုက်ဒိုက်နကဵုပစ္စယ်ပန်ဂှ်လေဝ် “ပိုဲညးဂမၠိုၚ် သ္ဂောံပူဇဴဒၟံၚ်ဓဝ်လၟိုန်၊ ဓဝ်ကီုလေဝ် သ္ဂောံဒုၚ်ပူဇဴဒၟံၚ်လၟိုန်၊ ပိုဲဂှ်ဒှ်ဒကာဒါန်, ဓဝ်ဂှ်ဒှ်ဒၟုၚ်ဒါန် နကဵုဂလာန်တဝှ်ပြကိုဟ်ပဋ္ဌာန် ညးကော်ခဴစ“အညမညပစ္စယ်” ဂွံဗလဲရပ်တံၚ်ဒမံၚ်ကုသဵုလၟိုန်ကာလရ၊ ပ္ဍဲအရာဒုၚ်လဝ်ဒကာပစ္စယ်ပန်ဂှ် ယာံခါရပိုဲဟဂွံထံက်ပၚ်မ္ဂး ကွတ်ပညာအ္စာပိုဲ နာဲပိုဲမတီညာတ်လဝ်ဂှ် ဖျေံပတိုန်ပကတ်ကဵုညးတၞဟ်, ချူတက်တြးပျးမုက်ညးတၞဟ်မာန်ဟွံသေၚ်၊ ပိုဲထံက်ပၚ်ရီုဗၚ်လဝ်ဟေၚ် ယိုက်ဂၠေၚ်ဂလေၚ်သာသနာညံၚ်ဂွံဇၞော်တဴတက်တိုန်အာအဆက်အဆက်မာန်ရောၚ်” ။

“ဆၜိုတ်တာလျိုၚ်သာသနာပိုဲ အ္စာပိုဲမယိုက်ဂၠေၚ်လဝ်ဂှ် ပိုဲအာစိုပ်ဒဒှ်ညးမဂွံယိုက်ဂၠေၚ်ရေၚ်တၠုၚ်ဒုၚ်သဇိုၚ် ဘိုၚ်ကရိုၚ်ရီုဗၚ်လဝ်ကီုရ၊ ပညာပါရမဳဆၜိုတ်နာဲပိုဲအ္စာပိုဲမဂွံလဝ်ဂှ် ပိုဲကီုလေဝ် မဒးဂွံဗွဲစၟတ်ရောၚ်” ဣၚုဟ် နကဵုလၟေၚ်ဂလာန်ဂမၠိုၚ်ဝွံ အတိုၚ်ဒဒှ်မဍာံပြဂှ် တြးပံက်ပ္တိတ်ညာန်ဘာန်ဇကုတုဲ သီုကဵုမဗ္စာရဏာဇြိုဟ်ဇြိုဟ်နက်နက် ဒ္ဂေတ်ဗက်ပၟိက်ဆန္ဒပြဲပြဲဂှ် ထေက်ကဵုဂွံဇြဟတ်ဗွဲမလောန်ရောၚ်။

ဟိုတ်ဒှ်သာ်ဂှ်ရ− ပူဂဵုမၞုံကဵုဇြဟတ်ပ္တန်သာသနာမာန်လေဝ်ကဵုဒှ် လပါ်ဒကာဘာဒကာဗျန်ဥပးဇန်ဂကူပိုဲပၠန်၊ ပ္ဍဲဍုၚ်ကွာန်ဋ္ဌာန်ဒေသဇကုဂှ် ရုဲစှ်ေကေတ်ခၟဳအာဇာနဲဖျေံပတိုန်လိက်ပတ် ပံက်တိုက်လိက်ပရိယတ်မည်မာန်လေဝ်ကဵုဒှ်၊ အ္စာဖျေံလိက်ဂွံပတှ်ေဖျေံစိုတ်လေပ်လိက်ပတ်မည် (ဂကူမည်)ဂှ် နိမန်က္ညနၚ်နူဍုၚ်ကွာန်ဋ္ဌာန်ရာမညလေဝ်ကဵုဒှ်၊ သွက်ဒၞာဲဒေသဇကုဂွံဇၞော်မောဝ်ဂှ် ဒးပ္တန်သာသနာထေက်ရ။

အ္စာသၠပတ်မည်အတိုၚ်မစၞောန်ထ္ၜးလဝ်လ္တူတေံဂှ် သွက်ညးတံဂွံတိုန်တဴအာပ္ဍဲသာသနာဗွဲမလဟိၚ်ကဵုစိုတ်မာန်ပ္ဍဲဍုၚ်ကွာန်ဇကုဇကု ပ္တန်တိုက်လိက်မည် ပံက်ထ္ၜးမတ်ကောန်ဂကူဇကုနကဵုပညာပါရမဳထိုက်ကြိုက်ရ၊ (ဒၞာဲနွံမံၚ်ရရဂှ် ဟွံဆေၚ်ဟွံပါ၊ ဒၞာဲဟွံမွဲဏီဂှ် ပၟိက်ဇၞော်တဴဗွဲမလောန်ရ) ကြဳဇှ်ဂွံပံက်ပ္တိုန်တိုက်လိက်မည်ဂွံစၞောန်ထ္ၜးကဵုပညာဘာသာကောန်ဂကူဇကု ပညာမိအရၚ် ဇၟာပ်ဇၟာပ်ဍုၚ်ကွာန်ဋ္ဌာန်ရးနိဂီုပ္ဍဲတိဍာ်ိပိုဲတဒဲ ဍုၚ်ကွာန်ဇကုလေဝ်ဂဵုလဟဵုရာၚ်ဆာဲဒှ်စရာဲကျာ်သြဳ ဂကူလေဝ်ဒှ်ကၞောတ်အထောတ်ရ၊ ဂကူရာမညပိုဲဇၞော်မောဝ်တိုန်အာ နကဵုဘာသာသာသနာပညာဇကုတုဲ ပၞးတုပ်ကဵုဂကူညးတၞဟ်မာန်ရောၚ်။

ဟိုတ်နူဂွံပ္တန်လဝ်ဓမ္မရတ် ဂွံပံက်လဝ်တိုက်လိက်ပရိယတ်မည်ဂှ်ရ− ဟဂွံဒးအာကတ်ပညာပ္ဍဲရးဍုၚ်ကွာန်ဋ္ဌာန်တၞဟ်သ္အာၚ်တုဲ ဂွံကတ်ဗ္တောန်တန်တဴအာပ္ဍဲဇရေၚ်မိမအစံၚ်အ္စာဇကုဗွဲတသိုက်ရ၊ ဟိုတ်နူဂွံဒၟံၚ်ဆိုက်ညန်ပ္ဍဲဇရေၚ်မိမအစံၚ်အ္စာဇကုဂှ်ရ− ဟွံမွဲကဵုအန္တရာယ်အိုတ်သီုတုဲ ဟွံဒးဂွိၚ်စံၚ်တူပူဆာ ဟွံဒးဂဗဆဵုညံၚ်ရဴဒၞာဲလ္ၚဵု လီုလာ်ပါ်ဒကးပြးဆာဲ ဂၠာဲကၠောန်ဝေၚ်ဂဗုတ်ညးသ္ကံရ။ (မိက်ဂွံအာကတ်လ္ၚတ်ဘာသန္တရ မိက်ဂွံစိုပ်ဍုၚ်ဇဳၜဳကၠောံ ဒးထောံဍုၚ်ကွာန်ဇကုရ)။

ဟွံဒးဂဗဆဵု အန္တရာယ်ပူဂဵု အန္တရာယ်ဂကောံ ပြဒ္ဒညာပူဂဵု ပြဒ္ဒညာဂကောံတုဲ ဟိုတ်နူကလိဂွံဓဝ်ညဳသာကေုာံရေၚ်သ္ကံစိ၊ သွက်သာသနာဂကူရာမညဇၞော်မောဝ်တဴတက်အိုတ်အာဟေၚ်ရ၊ ပ္ဍဲဍုၚ်ကွာန်ဋ္ဌာန်ရာမညပိုဲဂှ် ဒေသတံဂှ်တံဂှ် ပရိယတ္တိသာသနာမည်ဂဵုလဟဵုရာၚ်ဆာဲဂၠိုၚ်ဒၟံၚ်ဟေၚ် “အခေါၚ်သွက်ဂွံကဵုဒါန်ပူဇဴဓဝ်, ဓမ္မပူဇဴ, နွံဂၠိုၚ်ကွေံကွေံရောၚ်၊ ဟိုတ်ဂှ်ရ− သွက်ပိုဲဂွံသ္ပပူဇဴဓဝ်လေပ်ပူဇဴဓဝ်ဒးဂှ် စွံသတိနဲကဲဂွံပူဇဴဓဝ်ဂှ်တုဲ ကဵုဂူွံဒှ်ဒါယကာ, ဒါယိကာသာသၞာ ပူဇဴဓဝ်လေပ်အိုတ်ညိ။

 

• ကဵုသတိဗွဲတၟေၚ် ။−−−။ နကဵုလၟေၚ်ဂလာန်မဟီုကၠုၚ်တုဲဝွံ ဓဝ်ဇေတ်ဓဝ်ဍာံဍာံဂှ် ဆိၚ်ဆခယျကေတ်ဒးကီုရ၊ ယျိက်တီဂၠာံဒး လးပၠးညာန်တုဲ ကၠိုဟ်ကေတ်မာန်ကွေံကွေံကီုရ၊ ဓဝ်ခိုဟ်, ဟွံခိုဟ် ပါ်ပါဲဂၠာဲတံကၞောတ်သပေါတ်ရံၚ်နကဵုညာန်, လ္ၚတ်ရံၚ် (ချပ်ယိတ်ဗှ်ဖ္ဍေါတ်စၟတ်သမ္တီလဝ်)ကွေံကွေံတုဲ ဖျေံတၚ်သ္ဂုတ်သွာတ်မာန်ကီုရ၊ ဆဂးဂှ် လိက်ဓဝ်မဒးစကာရပ်စပ်ဗှ်ကတ်ဗ္တောန်ဒၟံၚ်လ္ၚဵုလ္ၚဵုတံဂှ်ကီု ဒုၚ်ယၟုအ္စာဓမ္မကထိုက်လ္ၚဵုလ္ၚဵုမတွံဒၟံၚ်တံ တၟံဒေသတံဂှ်ကီု “ဍာံ ဟွံဍာံ”ြကေဝ်ၜတ်ရံၚ်နကဵုညာဏ်ဇကုဇကုတှ်ေ ဗ္စာရဏာရံၚ်အိုတ်ညိ။

 

• ကၠာကျာ်တြဲပိုဲ ဟဂွံကတဵုဒှ်ကျာ်ဏီ ပ္ဍဲအတိက်တမၠာကၠာတေံဂှ် ၚုဲဇၞော်မွဲဟဳကၠုၚ်နူဒဵုဟိမဝန်−ဟေမဝန်တေံတုဲ “သၟိၚ်ဒဿဟရ”ဂမၠိုၚ် ဂိုၚ်ဟံၚ်ဖျဴဏာၚုဲ ကၠောန်ဗဒှ်ရပ်စပ်စကာသ္ပဖံမ္ၚဵုဇၞော်မွဲရ၊ ဖံဇၞော်ဂှ် ဖံၚုဲဟကံဇၞော်ဂှ် ကာလတက်ဗရုမ္ဂး ဗြုအာစှ်ၜါ(၁၂)ယောဇနာရ၊ ဗရုရမျှာၚ်ဖံဇၞော်ဂှ် ၜိုန်ရဗြုအာခရစှ်ၜါယောဇနာကီုလေဝ် ဗွဲကြဴလံကဵုလံ တြေံအိုဟ်ကၠိုဟ်စာ်ပါ်ထောၚ်အာတုဲ ရိုဟ်ရိုဟ်မတက်ဖံဇၞော်ဂှ် ဒးဗၠံနာပ်ကၠုၚ်နကဵုထဝ်ဂတှ်ေဂၠးသြန်ရ၊ ဟိုတ်နူမဒးဗၠံနာပ်ကၠုၚ်ဂှ်ရ− လံတိုန်ညိ ၚုဲဇၞော်ဇုတ်ခၞုတ်ဂှ်အိုတ်အာတုဲ (ဇုတ်ခၞုတ်ၚုဲဇၞော်ဂှ်အိုတ်အာ)တုဲ ဆၜိုတ်ဒၞာဲဗၠံနာပ်ဟေၚ် သှ်ေၜက်ဒၟံၚ်ရ၊ ဖျုန်ဖံမဒှ်မ္ၚဵုကျာ်သြဳသၟိၚ်ဂှ် ဟွံမွဲသက်သက်ရ။

ကာလမတက်တ္ၚီုဗရုဖံဂှ် စှ်ၜါယောဇနာလ္ပဟီုဏီရ၊ ဆၜိုတ်ပွဳပွူဗဒါဲဖံဇၞော်ဂှ်လေဝ် ဟွံမိၚ်ခိုဟ်ခိုဟ်ရ၊ ရမျှာၚ်ကြပ်အိုတ်အာကွေံကွေံရ၊ တုပ်တဴဥပမာသာလွာညံၚ်ဂှ်ကီု ဓဝ်ကျာ်ဍာံဍာံပြပြတံဂှ် ဟိုတ်နူအ္စာဓဝ်ဓမ္မကထိုက်တဲတၟိလ္ၚဵုလ္ၚဵု ဗၠံနာပ်စုတ်ဓဝ်အပြောံတၟေၚ်တၟေၚ်တၟဟ်တၟဟ် တဝှ်ကျာ်ဟွံသေၚ်ဂှ်ရ− ဓဝ်မဒှ်တံ မူလဍာံဍာံပြပြဂှ် ကၠေံဗဒန်အာတုဲရ။ (ဆေၚ်ဆက်အလုံတွဵုရးဂၠးတိဗော်ကၟိန်ဍုန်ပိုဲရ) ။

ဟိုတ်နူမကၠေံဗဒန်အာသာ်ဂှ်ရ− ညံၚ်ရဴရမျှာၚ်ခိုဟ်ခိုဟ် တိတ်ကၠုၚ်နူဖံဇၞော်ဂှ်ဟွံမာန်ကီု နူကဵုဓဝ်ဓမ္မကထိုက်မကွိုက်ဗၠံနာပ်လဝ်ဂှ် သွက်ဂွံဂွံမဂ်ဖ်ဵုနိဗ္ဗာန်မာန်လ္ပဟီုဏီရ၊ ဆၜိုတ်အယာံမာတ်ဖဵုဍိုဟ်ကေက်စဳကၠးဇၞော်ကဵုဇြဟတ်ဂှ်လေဝ် ဟွံကလိဂွံတုဲ ဗွဲမထေက်ကြိုက်ကဵုအခိုက်အလိုက်ညးဂှ် (ဗြဲအောန်တိကှ်) လောဘဒေါသအောန်စှ်ေကြဳစှ်ေအာကီုရောၚ် ။

(နိဒါနဝဂ္ဂသြပမ္မသံယုတ်အာဏိသုတ်) ယွံဂကူရာမည ညးမလုပ်ဗော်ဗုဒ္ဓဘာသာ ရဲကွေတ်သမ္မာဒိဋ္ဌိတံညးဂမၠိုၚ် ယဝ်ရမိက်ဂွံဒှ်ဗုဒ္ဓဘာသာဍာံဍာံပြပြဇေတ်ဇေတ်ခိုဟ်ခိုဟ်မ္ဂး ဒၞာဲလညာတ်ယောၚ်ယာပလေဝ်လဟဵုပ္တိုန်ဗွဲမပြဟ်အိုတ်ညိ၊ ပ္ဍဲအရာဆေၚ်ဆက်ကဵုကိစ္စကျာ်ဓဝ်သၚ်တံဂှ် သွက်ဂွံမိပ်စိုတ်နကဵုမဟာကုသဵုသောမနဿ − သောမနုဟ်ဟေၚ် မၞုံတဴရ၊ သဘဴတဏှာလောဘဇဴဗတိုက်ဖအောဝ်မတွံဂး “ရမျှာၚ်ဂ်သာယျေန်ခိုဟ်ကွေံ၊ ဗီုဖ္ဍေါတ်ဂါထဂှ် လ္တူကောန်မှိၚ်ဏီ၊ စကာဟီုဂအရေဝ်ဒးကဵုကတောဝ်ကွေံ၊ ကလၚ်ခိုဟ်ကွေံကွေံ” ဒှ်တံရ။

ပွမဟီုထိုၚ်သးအရေဝ်ဓမ္မကထိုက်ဂလာန်အ္စာဓဝ်လ္ၚဵုလ္ၚဵုဂှ် ဟွံမွဲကဵုမ္ၚဵုကျာ်တံဂှ် မၞိဟ်ဟီု− ၜိုန်ရဂွဟွံလေပ်ကီုလေဝ် မၞိဟ်မိၚ်တံဂှ် ဂွလေပ်ဒၟံၚ်တုဲ ထေက်ကဵုဒးဂွခိုဟ်ကွေံကွေံရ၊ ပူဂဵုတွံဓဝ်လ္ၚဵုလ္ၚဵုတံဂှ်လေဝ် ဒုၚ်စသိုၚ်ရှ်ဘဟ်ရမျှာၚ်မဟီုထိုၚ်သးဂှ်တုဲ ညံၚ်ရမျှာၚ်ဂွံခိုဟ်တိုန်ကွပ်လ္တူထပ်ကၞောတ်လေဝ် မဒးကၠေးစိုတ်သ္ပလွဳပရာပၠန်ရ။ (ရမျှာၚ်တွံဓဝ်ညံၚ်ဟဂွံဒှ်သက်ဂွက်ဇက်တံဂှ် စွံသတိညိ။)

ခန်ပြးဆာဲသာဲဂစိုတ်သာဲဂယိုၚ် ခန်ယွာံယာံကရောတ်ဇွောဝ်ဍာ်ရမတ် ဍောတ်စိုတ်တံဂှ်လေဝ်ဟွံပါ, ညံၚ်ဂွံပါတၚ်ထပ်ဗ္ဂပ်စုတ်တုဲ (ထပ်ဂလိုၚ်စုတ်ဂြန်မတ်ဂဥုဲ)တုဲ ကရေဝ်ကရောတ်တွံဇက်ကံအိုတ်ရ၊ တဝှ်ဓဝ်ကျာ်ဟွံသေၚ် ပတၟေၚ်ထပ်စုတ်တုဲတွံ၊ ပျေက်ကဆဝ်ဂၠိုၚ် ညံၚ်ဝိုၚ်ပေါဲရဲဇာတ်တံဂှ်လေဝ် ညးလ္ၚဵုစကာဟီုတွံပသ္ကံတဲဒှ်အိုတ်ရ၊ ဝိုၚ်မၞိဟ်ညံၚ်ဂွံဂၠိုၚ် ညးဂွံဂြိုၚ်ဂအှ်ေ ဒးပ္တိတ်ရမျှာၚ်အိုတ်ရ။

စိုပ်ကၠုၚ်ခေတ်သာသနာကျာ်လၟုဟ်ဝွံ ညံၚ်ရဴဂၠုၚ်ဒုန်ဒစးဍာ် ဗာ်ဟွံစိုပ်သြၚ်လောဲလောဲသ္ၚောဲအာနူသၞေဟ်ကီု၊ လံအာသှ်ေၜက်အာ, ကၠုၚ်ဂၠံၚ်ဖါလီုလာ်ဂှ်ဂွံဒၟံၚ်ရ၊ ကိစ္စဆက်စပ်ကဵုပလေဝ်လဟဵုသာသနာ ဒၞာဲလ္ၚဵုလ္ၚဵုဂှ် သီုခၟဳသီုခရှ်ဒှ်မွဲမှပ်မွဲကသပ်မွဲဂၞန်တုဲ ဒၞာဲလဵုဟွံဟီု ကၠောန်ဗဒှ်သှ်ပ္တဴဓဝ်ဝဳရိယမာန်ဒၟံၚ်ရော၊ ဟိုတ်ဂှ်ရ− ပ္ဍဲလက်ထက်ပိုဲဝွံ ကျာ်ရီုဓဝ်ပြီု သတီုလဝ်သဒ္ဓါတုဲ မၞိဟ်ဂကူပိုဲလဟဵုသသၞာမာန်ဂှ် သြဝ်ကဵုဂွံမံက်ဂတဝ်တိုန်အိုတ်ညိ။