ပြကိုဟ်စရာဲဗုဒ္ဓဘာသာ ကၞပ်(၂)

(၁) ပါဏာတိပါတာ၊ နူ−ပွမဂစိုတ်သတ် မၞုံကဵုလမျီု။ ဝေရမဏိသိက္ခာပဒံ၊ န်− သိက္ခာပိုဒ်−ဒှ် ဟိုတ်ဝေၚ်ပါဲ− ခိုဟ်ဆာဲဒးရး။ သမာဒိယာမိ၊ ပ္ဍံ− အဲဒဂိုန်ဂိုၚ်ကေတ်− ဒ္ဂေတ်မၚ်မွဲအာလၟိုန်= ဗဗိုန်လဝ်ပ္ဍဲစိုတ်ရအဴ။ "ဝေၚ်ပါဲကၠေံနူပွမဂစိုတ်သတ်မၞုံကဵုလမျီုမမိက်သ္ဂးရောၚ်"

နူပွမဂစိုတ်သတ်မၞုံကဵုလမျီုမ္ဂးဂှ် ဆၜိုတ်လမျီုမၞိဟ်ဟွံက၊ ပါဲနူဇကု− ညးမၞုံကဵုလမျီုသ္အာၚ်အာနူဇကု ဇၟာပ်သတ်မၞုံကဵုလမျီု ဂျိုၚ်တဴလမျီုဂှ် "လမျီုညး" မ္ဂးရောၚ်၊ ဟိုတ်ဂှ်ရ− သတ်မၞုံကဵုလမျီုဍာံမ္ဂး− လမျီုအိုတ်သီု မပ္တံပြေၚ်ဂၠဴစိၚ်ချေံ ဂၟိတ်ဂဂိတ် စဲခၟာဲစဲဗဂဲကၞိ ၚုဲကစၟဂြုန်တိရစ္ဆာန်တၞဟ်တၞဟ်တံဂှ် ဂစိုတ်ဟွံဂွံရ၊ ပ္ဍဲအရာဂစိုတ်မ္ဂးဂှ် စေတနာမိက်ဂွံကဵုချိုတ်ဍာံဍာံတုဲ "ဂစိုတ်အလဵုဇကုကီု− ထဴကဵုညးတၞဟ်ဂစိုတ်ကီု" ဂှ် ဂစိုတ်ဗွဲစၟတ်ရ၊ အဟိန်ကွာ်ဂၠံၚ် အဃောကွာ်ဂံ၎် ကွဟဩ်ကၟဟ် ဂၠဟ်ဂၠိုက်အာဒှ်တံ အခါကာလဍေံဂၠုတ်အာလိုန်ဒးခဍိၚ်ဒးတုဲ ချိုတ်အာတံဂှ် ဒှ်ဂစိုတ်ဟွံသေၚ်, သဳလဟွံလီုရောၚ်။

နိ−သိက္ခာပိုဒ်− (ပိုတ်) ဒှ်ဟိုတ်ဝေၚ်ပါဲ− ခိုဟ်ဆာဲဒးရးမ္ဂးဂှ်၊ ယဝ်ရဒဂိုန်ဂိုၚ်ကေတ်ဒ္ဂေတ်မၚ်မွဲလဝ်သိက္ခာပိုဒ်မ္ဂး− ဒးဝေၚ်ပါဲကၠေံနူပြဝမဂစိုတ်သတ် မၞုံကဵုလမျီုရ၊ ဟွံဝေၚ်ပါဲမ္ဂး− သိက္ခာပိုဒ်လီု, သဳလလီုရ၊ ဟိုတ်ဂှ်ရ− သိက္ခာပိုဒ်ဝွံ၊ ဒှ်ဟိုတ်မဒးဝေၚ်ပါဲကၠေံနူပွမဂစိုတ်သတ် မၞုံကဵုလမျီုရောၚ်။

သိက္ခာပိုဒ်မ္ဂးဂှ်= ဒ္ဂေတ်ဓဝ်ကုသဵုဂှ် "သိက္ခာ" မ္ဂးယၟုရ၊ ပိုဒ်− ပိုတ်မ္ဂးဂှ် − ဗတ်မည် "ဒတန်, အ၇ာမတန်တဴ" ရဒှ်တုဲ အဓိပ္ပါဲမတုပ်ကေုာံ အရေဝ်ဝေါဟာပါဠိလီုရောၚ်၊ ဟိုတ်ဂှ်ရ− မဒှ်အရာဒတန်ဒၞာဲဝါဲဒ္ဂေတ်ဓဝ်ကုသဵုဂမၠိုၚ် မတန်တဴဗွဲမဂၠိုၚ်ဂှ် "သိက္ခာပိုဒ်" စၟတ်သမ္တီလဝ်အိုတ်ညိ။ သိက္ခာပိုဒ်မွဲဝွံ၊ ယဝ်ရဗိုန်ဗတ်ခိုၚ်ကၠိုက်မ္ဂး− ဒ္ဂေတ်ဓဝ်ကုသဵုဂမၠိုၚ် ဇၞော်မောဝ်တိုန်ဗွဲမဂၠိုၚ်ဂၠၚ်တုဲ၊ ဟိုတ်နူကလိဂွံဂုဏ်မဖှ်သာ်ဂှ်စိ "ဒ္ဂေတ်သိက္ခာမဒှ်သဇိုၚ်ဒတန်ဓဝ်ကုသဵုမတန်တဴဗွဲမဂၠိုၚ်" မ္ဂးယၟုရောၚ်။

ဒဂိုန်ဂိုၚ်ကေတ်မ္ဂးဂှ် "သိက္ခာပိုဒ်ဝွံ၊ ညံၚ်ဂွံဗိုန်ဗတ်ခိုၚ်ကၠိုက်ဂှ် အဲမၚ်မွဲလဝ်ရောၚ်" ရဴသာ်ဝွံ ဒးပၠောပ်ပ္ဍဲစိုတ်ရ။ (သ္ၚိဇၞော်တိုက်ဇၞော်တံဂှ် ညံၚ်ဂွံဗိုန်ဗတ်ခိုၚ်ကၠိုက် ညံၚ်ရဴဒက်သိုၚ်လဝ်ပ္ဍဲလတူတိကီု၊ တုပ်တဴညံၚ်ရဴဒက်ကျာ်သိုၚ်သ္ၚိဘုတ်ဘာပ္ဍဲတိ, ညံံၚ်ဂွံဗိုန်ဗတ်ခိုၚ်ကၠိုက်ဟွံကဵုချဳဂရိုက်အာ ဒက်ပတန်သိုၚ်လဝ်ပ္ဍဲတိဗွဲမဗိုန်ဗတ်ခိုၚ်ကၠိုက်ကီု) ပွမပၠောပ်စိုတ် စွံလဝ်ပ္ဍဲစိုတ်ဗိုန်ဗိုန်ဗတ်ဗတ် ခိုၚ်ခိုၚ်ကၠိုက်ကၠိုက် ဟွံကဵုဂရိုက်ချဳအာဂှ် ဗွဲဝေါဟာမည် အစေန်အဆက်ကော်ခဴစ "ဒဂိုန်ဂိုၚ်ကေတ်" မ္ဂးယၟုရ၊ ဗွဲဝေါဟာစကာအရေဝ်ဂှ် "ဗဗိုန်လဝ်ပ္ဍဲစိုတ်" မ္ဂးယၟုရောၚ်၊ ဟိုတ်ဂှ်ရ− ဟွံဒးအာပ္ဍဲဇရေၚ်ညးမမိက်ကဵုမွဲမွဲတုဲ အလဵုဇကုဖ္ဍေါတ်ကေတ်ဗတ်ဘာသာပါဠိ မၞုံတံဍေံ "ပါဏာတိပါတာ" လေဝ် ကဵုဒှ်၊ ဖ္ဍေါတ်ကေတ်ဗတ်ပလးရဴဝွံမ္ဂး "အဲဝေၚ်ပါဲကၠေံနူပွမဂစိုတ်သတ်မၞုံကဵုလမျီုရ" ရဴဝွံလေဝ် ကဵုဒှ်မၚ်မွဲဒဂိုန်ကေတ်ဂွံဒၟံၚ်ရောၚ်။ (ကာလကောန်သၟိၚ်မှာဇနက် က္ၜၚ်ဗြံဟဳဍာ် ဃောၜိၚ်ဒၟံၚ်ပ္ဍဲမှာသၟိတ်ဂှ် အလဵုအလဵုဇကု ဒဂိုန်ကေတ်သဳဥပုဟ်ပွိုၚ်ထပှ်တ္ၚဲရောၚ်။

ပ္ဍဲခေတ်ကာလလၟုဟ်ဝွံ၊ ညးလ္ၚဵုတံဂှ် ဒးဒဂိုန်ကေတ်ပ္ဍဲဂတမုက်ကျာ်ဂတမုက်ထပိုဲခမဳတံမှ ဂွံသဳလ, ဒှ်မၚ်မွဲသဳလရောၚ်၊ ထေၚ်ခယျဒၟံၚ်တုဲ ကတဵုဒှ်သၠေဟ်ပၟာအိုတ်ရ၊ ဆဂးဂှ်၊ ယဝ်ရဒဂိုန်မၚ်မွဲလဝ်ပ္ဍဲဂတမုက်ကျာ် ဂတမုက်ခၟဳသၚ် ဂတမုက်ထပိုဲတံမ္ဂး− ဒှ်ရှ်ေသှ်ေရဴဂဴကျာ် ရောံဒညကဵုခၟဳသၚ်ဂမၠိုၚ်တုဲ ညံၚ်သိက္ခာပိုဒ်ဂွံဗိုန်ဗတ်ခိုၚ်ကၠိုက်အာဂှ်လေဝ် မၚ်မွဲဗဗိုန်လဝ်ဗွဲမဒးရးရောၚ်၊ ဟိုတ်ဂှ်ရ− ပ္ဍဲအရာမၚ်မွဲဒဂိုန်သဳလဂတမုက်ကျာ် ကဵုဂတမုက်ခၟဳသၚ် ဗီုထေတ်လၟုဟ်နဲကဲလၟုဟ်ဂှ် ဒှ်နဲကဲခိုဟ်အိုတ် သၟိက်ကဵုသ္ပသက်သဳဂတကျာ် ဂတသၚ်တုဲ သီုဂွံဖျေံစိုတ်စရိုတ်ပ္တေဟ်ကျာ်ပ္တေဟ်ခမဳသၚ်တံရောၚ်။

တၚ်စၟတ်။ ပ္ဍဲအရာဒဂိုန်သဳဂှ် ဒဂိုန်ကေတ်နကဵုစိုတ် ပၠောပ်စိုတ်သ္ပအဓိဋ္ဌာန်ရဴဝွံမ္ဂး "ပ္ဍဲတ္ၚဲဝွံ− အဲဒဂိုန်ကေတ်သဳလရောၚ်" သဳမသုန်သဳဒ္စါံဒှ်တံ ပၠောပ်စိုတ်သ္ပအဓိဋ္ဌာန်လေဝ် ဂွံဒၟံၚ်ရ၊ ဆဂးဂှ် သွက်ဂွံဒှ်သက်သဳဗွဲမခိုၚ်ကၠိုက်တုဲ မဒးဒဂိုန်ဂိုၚ်ကေတ်ပ္ဍဲဂတထပိုဲခၟဳတံရောၚ်။

ညးဟွံမၚ်မွဲ − ဒုဟ်ဂၠောဲစိုပ်ကၠုၚ်။ ညးဟွံမၚ်မွဲသိက္ခာပိုဒ်ဝွံ၊ ဒှ်ညးကလိလောန်ကၠေံစေဝ်ပၞောန်ကျာ်ပလီုကၠေံသိက္ခာပိုဒ်ကျာ်တုဲ၊ ဟိုတ်နူဒှ်ဒုဟ်ဂှ်ရ− ဒုဟ်ဂၠောဲစိုပ်ကၠုၚ်ဒးဒုၚ်ဘဲနာနာသာ်ရောၚ်၊ ဟွံမၚ်မွဲသိက္ခာပိုဒ်ဏံတုဲ၊ ယဝ်ရဂစိုတ်သတ်မၞုံကဵုလမျီုမ္ဂး− ဒုဟ်နွံ, ဒုဟ်ဟွံမွဲဂှ် ထေက်ကဵုဒးဗ္စာရဏာချပ်ရံၚ်ဇြိုဟ်ဇြိုဟ်နက်နက်ရ၊ သိက္ခာပိုဒ်ဂမၠိုၚ် ကော်ခဴစသဳမသုန်ဂှ် မၚ်မွဲလေဝ်ကဵုဒှ်, ဟွံမၚ်မွဲလေဝ် ကဵုဒှ် ကလိလောန်ကၠေံမ္ဂး− ဒးဒုၚ်ဒုဟ်ဇၞော် မပ္တံဏာဗစိုပ်ကဵုအပါဲ ကဵုဒတုံစှ်ေပ္ဍဲအဘုံအပါဲတေံရ။ (အပါယ်)

သဳလဂမၠိုၚ်ဂှ် ဒှ်ဓဝ်လၟေတ်မၞိဟ်ဂမၠိုၚ် ဒးဒ္ဂေတ်မၚ်မွဲလၟိုန်ကာလတုဲ သဳမသုန်ဝွံ၊ တုပ်တဴညံၚ်ရဴကယျိုၚ်ကယျဝ် မဒးကျိုၚ်ကျဝ်ကၠေံအဝဲဣန်ရဳဂဝဂလေံ တုပ်တဴညံၚ်ရဴဗွိုက်လတက်မဒးဗိုက်ဂြောပ်ကၟာတ်လဝ်ဇကုလၟိုန်ကာလရောၚ်၊ "သိက္ခာပိုဒ်ဂမၠိုၚ် မပ္တံဝိကာလဘောဇနာ, နစ္စ− ဂအတ" တံဂှ်တုန်− မၚ်မွဲဟွံမာန်မ္ဂး− ဒုဟ်ဟွံဇၞော်အေဟ်ရ၊ ဆဂးဂှ် ပ္ဍဲအရာလှ်ေဒယှ်ေဗဵုပေါဲသဘၚ် စပ်ကဵုသိက္ခာပိုဒ် နစ္စဂဳတမွဲတုဲ မိပ်ဇြိပ်ကဵုပေါဲသဘၚ်လောန်ကာဲအာစိုပ်အပါဲပန်ဘုံမာန်ဂှ်လေဝ် ဒးဒုၚ်ဖေက်လဝ်နူဇမ္ၚောဲခိုဟ်ရောၚ်။

သိက္ခာပိုဒ်မပ္တံဝိကာလဘောဇန, နစ္စဂဳတ− တံဂှ်၊ ယဝ်ရမၚ်မွဲလဝ်မာန်မ္ဂး− သ္ပဟိုတ်ကဵုမၚ်မွဲလဝ်သိက္ခာပိုဒ်ဂှ်တုဲ အကုသဵုကတဵုဒှ် ဟွံဂွံအခေါၚ်ရ။ အခေါၚ်အကုသဵုကတဵုဒှ်ဟွံမွဲတုဲ၊ ဟိုတ်နူမၞုံကဵုအခေါၚ်ကုသဵုမဂၠိုၚ်တုန် အကုသဵုမအောန်စှ်ေဂှ်ရ၊ သိက္ခာပိုဒ်လဵုဟွံဟီု− ယဝ်ရမၚ်မွဲမာန်မ္ဂး− ဂုဏ်ဖဵုဍေံ ဂၠိုၚ်ဂၠၚ်ဗွဲမလောန်ရောၚ်၊ ဟိုတ်ဂှ်ရ− လၚ်္ကာသၟဝ်ဂမၠိုၚ် မစၞောန်ထ္ၜးလဝ်ဒုဟ်ကဵုဖဵုဂှ် ညံၚ်သ္ဂောံတိုန်ပါၚ်မာန် လ္ၚတ်ပတိုန်လဝ်အိုတ်ညိ။ (ပ္ဍဲသိက္ခာပိုဒ်ဂမၠိုၚ် ကြဴကြဴဂှ် အဓိပ္ပါဲပါဠိမတုပ်ဂှ် ဟွံချူထ္ၜးတုဲ ဒၞာဲတၟေၚ်တၟဟ်ဟေၚ် ချူထ္ၜးကဵုအဓိပ္ပါဲရောၚ်)။

[လၚ်္ကာ] ပါဏာတိပါတ်၊ ညာတ်သတ်ဂစိုတ်၊ ချိုတ်ဒးနရက်၊ ဗၠးဗက်ဍံၚ်ကၠုၚ်၊ ဒးဒုၚ်ဆဵုဘဲ၊ အဝဲလီုလာ် ၁။ ရုပ်သာ်ဍိုန်လျ− ၂။ ဇြဟတ်ယောၚ်လောဲ− ၃။ သ္ၚောြနူပြဟ်ပြေဟ်− ၄။ ညာတ်ဒးဖေက်လကိုတ်− ၅။ ဒုၚ်ဂစိုတ်ပျဲ− ၆။ ယဲဘဲလေဝ်ဂၠိုၚ်− ၇။ နာဲမြိုၚ်လီုဒှ်− ၈။ ချိုတ်ပြဟ်မွဲတန်− ၉။ ဂၠိုၚ်ဒုဟ်ဒန်၊ ဝေၚ်ပၠန်တိုၚ်ဂှ် သဒှ်ဖဵုရောၚ်။

သွက်ဂွံတီအဓိပ္ပါဲ

ညးလဵုမွဲဟွံဟီု ယဝ်ရပကီုပရာပ်ဂစိုတ်သတ်မၞုံကဵုလမျီုမ္ဂး− ချိုတ်ဗက်ဒးနရက်ဂၠိုၚ်ကဵုသၞာံတုဲ ဗၠးနူနရက် ဇၟာပ်ဘဝကတဵုဒှ်မၞိဟ်ဟာရ၊ ဒုဟ်ဒဏ်ဝိပက်ဖဵုအကုသဵုသှ်ေၜက်ဒၟံၚ်ဂှ် အောန်အိုတ် ဒးဒုၚ်ဘဲဒုဟ် ဒ္စိတ်သာ်ရောၚ်။ ဂၠိုၚ်ညိဂှ် ဒးဒုၚ်ဘဲ ဒးဒုၚ်ဒုဟ်ၜါဣသုန် (၂၅) ဂကူတုြ ဂၠိုၚ်အိုတ်မ္ဂး− ရိုဟ်လၟိဟ်ဟွံလောဲသွာရောၚ်။ ဟိုတ်ဂှ်ရ− လၟေၚ်လၚ်္ကာလတူဂှ် ဗကိတ်ဗဂပ်ကဵုအရေဝ်ပလးသၟဝ်ဝွံညိ။

၁။ အဝဲဇိုၚ်တဲမတ်ကတောဝ်မုဟ်ပါၚ်ဂမၠိုၚ် မဒးလီုလာ်ဆောတ်ယောၚ်ဒေက်အာကီု။

၂။ ဇၟာပ်ဘဝကတဵုဒှ်မၞိဟ် ရုပ်သာ်ဍိုန်လျပရေံဟိန်ဗိန်လောန်ဗၞတ်ကီု။

၃။ ဇြဟတ်ယောၚ်ယာဇြဟတ်အောန်တဴဗွဲမလောန်ကီု။

၄။ သ္ၚောဲနူပြဟ်ပြေဟ်သာဍာ, ဟွံမွဲကဵုလအာပြဟ်ပြေဟ်ဇြိုၚ်ဇြုဲဇကုကီု။

၅။ ယဝ်ရပရိုက်ဘဲကတဵုဒှ်မ္ဂး− ညာတ်ဒးဖေက်လကိုတ်လောဲသွာကီု။

၆။ ဒးဒုၚ်ဂစိုတ်ကဵုညးတၞဟ် ဇကုဇကုဂစိုတ်ကေတ် မပ္တံသုၚ်ဂျိဒက်ကံကီု။

၇။ ကတဵုဒှ်ယဲဘဲဝေဒနာဍဵုဍိုက်ဂၠိုၚ်ဂၠၚ်ဗွဲမလောန်ကီု။

၈။ နာဲမြိုၚ်ဗော်သွးတွဳဝါရလီုလာ်စာ်ခြာအာနူဇကုကီု။

၉။ အာယုက်ဂၠေံချိုတ်ပြဟ်ကီု။ မပ္တံမြဴသာ်ဝွံ၊ ဒုဟ်ဂမၠိုၚ် အတိုၚ်မဟီုကၠုၚ်တုဲဂှ် ဒးဒုၚ်ဗွဲစၟတ်ရောၚ်၊ နူဒုဟ်ဂမၠိုၚ် ဒ္စိတ်သာ်ဝွံ၊ ယဝ်ရဝေၚ်ပါဲကၠေံဂတးကၠေံမ္ဂး− ဒှ်ဂုဏ်ဒှ်ဖဵု ဒ္စိတ်သာ်ပၠန်ရောၚ်။

ဒုဟ်တၞံတံမူလ။ ဒုဟ်ဂမၠိုၚ် အတိုၚ်မစၞောန်ထ္ၜးလဝ်တုဲဂှ် ဗွဲဒဒှ်ဝိပက်ဗက်ဝဲဗက်ဒးဒုၚ်စသိုၚ်ဖဵုအကုသဵုကံဇကု မကၠောန်ခၞံလဝ်ကၠာကၠာတေံဂှ်ရ၊ ဇၟာပ်ဘဝကတဵုဒှ်မၞိဟ်လေဝ် ကလိဂွံဒုဟ်ဒဏ်မပ္တံအဝဲလီု ယဲဘဲဂၠိုၚ်ရ၊ ပါဲနူဒုဟ်ဂှ် ဒုဟ်ဇၞော်မတွံဂး ဒးကတဵုဒှ်ပ္ဍဲဘုံနရက်လေဝ်နွံမဏီရောၚ်။

• ကိုပ်ကၠာတေံ သၟတ်ဗြဴတၠသ္ၚိမွဲဂှ် ကၟုဲတၠုၚ် ကၠုၚ်စိုပ်သ္ၚိ သွက်ဂွံဍုန်ဗစဖျုၚ်ဟွံမွဲတုဲ ဂစိုတ်ဗ္ၜေံၝောံမွဲရ၊ (သဵုၝောံလေဝ်ဂး) ဟိုတ်နူဂစိုတ်ဗ္ၜေံၝောံမွဲ ဍုန်ထောံတိုပ်ဗစဖျုၚ်ကၟုဲဂှ်ရ− ချိုတ်အာနူဘဝဂှ်တုဲ အာကတဵုဒှ်ပ္ဍဲနရက်တေဴရ၊ ဟိုတ်နူပါဏာတိပါတကံ ခၞံဒးကၠောန်ဒးလဝ်အလဵုဇကုဂှ်ရ− ဒးဒုၚ်ဒဒိုက်နရက် လၟိဟ်သော်ဗ္ၜေံဂၠိုၚ်ကဵုကဵုသၞာံရောၚ်။ ဗၠးနူနရက်တုဲ ဆၜိုတ်ဝိပက်သၟေဟ်သှ်ေဒၟံၚ် ဒးဒုၚ်ကတ်ကံ ဒးဒုၚ်ဂစိုတ်ကဵုညးတၞဟ်ဂှ် လုကဴဘဝဂၠိုၚ်ဂၠၚ်လောန်ရောၚ်။ (အဋ္ဌကထာဓမ္မပဒပဋ္ဌမကၞပ် ဗာလဝဂ်သၟိၚ်ကောသလကဵုအညတရပုရိသဝတ္ထု)။ ဟိုတ်ဂှ်ရ− ဒုဟ်ဂစိုတ်သတ်မ္ဂးဂှ် ဍောတ်သွတ်ဒၟံၚ်ဟွံသေၚ် တီကေတ်ပရေၚ်ကံကလောန်လပါ်ပရေံသာ်ဝွံတုဲ ဝေၚ်ပါဲကၠေံနူဂစိုတ်သတ်အိုတ်ညိ။

ဒုဟ်ဍောတ်ဒုဟ်ဇၞော်။ ဒုဟ်ဍောတ်ဒုဟ်ဇၞော်ဂှ် ဒ္ဂေတ်ဗက်အတိုၚ်ဂုဏ်ကဵုဗၞတ်ဗ္ၜတ်ဇကုသတ်မဒးဒုၚ်ဂစိုတ်ဂှ်တုဲ ဒှ်အဓိကဇၞော်အိုတ်ရ၊ သတ်ဒးဒုၚ်ဂစိုတ်ဂှ် ဂုဏ်ဍောတ်, ဇကုဍောတ်မ္ဂး, ဒုဟ်ဍောတ်၊ ဂုဏ်ဇၞော်ဇကုဇၞော်မ္ဂး− ဒုဟ်ဇၞော်ရ၊ မူဟိုတ်ရော, ဇကုခန္ဓသတ်ဍောတ်ဒၟံၚ်မ္ဂး− ပ္ဍဲအရာဂစိုတ်ဂှ်၊ ဟိုတ်နူသဒးလွဳပရာပ္တိတ်ဇြဟတ်အောန်ကီု၊ ပ္ဍဲဇကုသတ်မဒးဒုၚ်ဂစိုတ်ဂှ် ဂုဏ်ဟွံမွဲမ္ဂး− ဟိုတ်နူဟွံအာစိုပ်ပလီုပလာ်ကၠေံဂုဏ်မမိက်ကဵုမွဲမွဲတုဲ မၞိဟ်ဂစိုတ်ဂှ် ဒှ်ဒုဟ်အောန်ဒုဟ်သက်သာညိရောၚ်။

သတ်ဒးဒုၚ်ဂစိုတ်ဂှ်၊ ယဝ်ရဇကုခန္ဓဇၞော်မံၚ်မ္ဂး− ပ္ဍဲအရာဂစိုတ်ဂှ်၊ ဟိုတ်နူသဒးလွဳပရာပ္တိတ်ဇြဟတ်ဂၠိုၚ်ကီု၊ ပ္ဍဲဇကုသတ်မဒးဒုၚ်ဂစိုတ်ဂှ်၊ ယဝ်ရဂုဏ်ဇၞော်မံၚ်မ္ဂး− ဟိုတ်နူအာစိုပ်ပလီုပလာ်ကၠေံဂုဏ်မဂၠိုၚ်ကီု မၞိဟ်ဂစိုတ်ဂှ် ဒှ်ဒုဟ်ဂၠိုၚ် ဒုဟ်ဇၞော် ဒးဒုၚ်ဒုဟ်ဇၞော်ကွေံကွေံရောၚ်၊ ဟိုတ်ဂှ်ရ− သတ်တိရစ္ဆာန်ကဵုဒှ်, သတ်မၞိဟ်ကဵုဒှ် ရံၚ်ကဵုဂုဏ်ဇၞော်ဍောတ်, ရံၚ်ကဵုဇကုဇၞော်ဍောတ်တုဲ ဒုဟ်ဍောတ်ဇၞော်ဂှ်လေဝ် ဒ္ဂေတ်ဗက်အတိုၚ်လွဳပရာဂှ်ရ။ သတ်မွဲမွဲ လမျီုဂွံအိုတ်ဂှ် စိုတ်ဒေါသဇဴဂလိုၚ်လဵု ကတဵုဒှ်ဂှ်လေဝ် ရိုဟ်လၟိဟ်ဟွံမာန်ရောၚ်။ (ပြေၚ်ဂၠဴစိၚ်ချေံ သ်ပလဝ်ဂုန်လ္တူပိုဲမၞိဟ်ဗွဲမဂၠိုၚ်ဂှ် ပၠောပ်ရံၚ်စိုတ်ညိ။)

ဝေၚ်ပၠန်တိုၚ်ဂှ်၊ သဒှ်ဖဵုရောၚ်။ ယဝ်ရမၞုံကဵုပြဝမၚ်မွဲလဝ်သိက္ခာပိုဒ်မ္ဂး− ကလေၚ်ဂတးကၠေံနူဒုဟ်ဝွံတုဲ−

(၁) ဍိုက်ပေၚ်ကဵုအဝဲဇိုၚ်တဲမပ္တံမတ်ကတောဝ် ဗဵုကျောဝ်ဒးသၞောတ်ကီု။

(၂) ရုပ်သာ်ကျေဝ်ဂေါဝ်ညံၚ်ကောန်ခၞောဝ်ကောန်ဒေဝတဴကီု။

(၃) ဍိုက်ပေၚ်ကဵုဇြဟတ်ထတ်စောန်မြက်စာကီု။

(၄) ဇကုပြဟ်ပြေဟ်သာဍာအာကၠုၚ်ကတဵုဂဇံအတိုၚ်ပၟိက်စိုတ်ကီု။

(၅) ဟွံဒးဖေက်လကိုတ်ပရိုက်ဘဲ နွံကဵုဂၟံၚ်ဂံၚ်သကာကီု။

(၆) ဟွံဒးချိုတ်နကဵုကံဗတိုက်ကံပရိုက် နကဵုဂွဵုဂွိုက်ပရိုက်ဘဲတဲညးတၞဟ်ကီု။

(၇) ဟွံမွဲကဵုယဲဘဲဒုက္ခဝေဒနာကီု။

(၈) နာဲမြိုၚ်ဗော်သွးတွဳဝါရကလောမသဟွံလီုလာ်စာ်ခြာကီု။ (တွဳဝါရဂၠိုၚ်)

(၉) ဂွံပတၠအာယုက်မဂၠိၚ်ကီု။ ဂုဏ်ဖဵုမပ္တံမြဴသာ်ဝွံ− ကလိဂွံဗွဲစၟတ်ရောၚ်။ ညာတ်မၞိဟ်မွဲ အဝဲဇိုၚ်တဲလေဝ် ဟွံဍိုက်ပေၚ် တဲပိုတ်တဲကဝ် တဲကဝေန်ကဝံက် ဇိုၚ်ဂံက်ခ္ဍဴလၟေန် ရုပ်ဟိန်ဗိန်ပရေံပရုတ်ဇြဟတ်ဆုတ်ဇကုဇြာဲဇြေဟ် မၞိဟ်ဖေက်ဂၟံက်လကိုတ်တ္ၚဵု ကတဵုဒှ် ယဲဟွံခြာအာစိုပ်ဒဒိုက်တၞဟ်တၞဟ်သာ်ဂှ်တုဲ မၞိဟ်ဝွံ− ကေၚ်ကၠောန်လဝ်ကလောန်ဂစိုတ်သတ်ပ္ဍဲဘဝကိုပ်ကၠာတေံရောၚ်ဂှ် တီကေတ်မာန်ရ၊ ဗီုကလိဂွံဖဵုဒုဟ်မြဴသာ်ဝွံ− သ္ၚဳဂၠိပ်ရံၚ်တုဲ ပါဏာတိပါတကံကိုပ်ကၠာတေံ ဍောတ်ဇၞော်နွံဟွံမွဲဂှ် ဆိၚ်ဆခယျကေတ်တီကေတ်မာန်ရောၚ်၊ ဟိုတ်ဂှ်ရ− ဗ္စာရဏာမၠာ်သဳရံၚ်ဒုဟ်, ဂုဏ်ဖဵုဝွံတုဲ ဩဝ်ဂိုတ်ကၠေံစိုတ် ဝေၚ်ပါဲကၠေံနူပွမဂစိုတ်သတ်အိုတ်ညိ။

တၚ်စၟတ်။ ပ္ဍဲကဵုဝတ္ထုဂစိုတ်ဗ္ၜေံဝွံ၊ အဓိပ္ပါဲဓမ္မပဒ ပ္ဍဲဂါထာမၞုံတံ "ဨဠကဿကဏ္ဌံဆေတွာ" ဂှ် အ္စာလ္ၚဵု ကဵုအရထ ဒးဒုၚ်နရက်လၟိဟ်တသော်ဗ္ၜေံ− အ္စာလ္ၚဵု ကဵုအရထ ဒးနရက်ဂၠိုၚ်ကဵုသၞာံတုဲ ဝိပက်သၟေဟ်သှ်ေဒၟံၚ်ဂှ် ဒးဒုၚ်ကုတ်ကံလၟိဟ်တသော်ဗ္ၜေံ သ္ဂးလဝ်ဟွံတုပ်ကေုာံရေၚ်သ္ကံရောၚ်။

(၂) အဒိန္နာဒါန၊ နူ− ပွမဂိုၚ်ကၠတ်ကေတ်ဂြပ်ညးသ္အာၚ် ဍေံဒမိန်တၠညးဟွံကဵု၊ (နူပွမဂိုၚ်ကၠတ်ကေတ်ဂြပ်ညး မၞုံကဵုတၠ) ဝေရမဏိသိက္ခာပဒံ၊ န်− သိက္ခာပိုဒ်− ဒှ်ဟိုတ်ဝေၚ်ပါဲ−ခိုဟ်ဆာဲဒးရး။ သမာဒိယာမိ၊ ပ္ဍံ− အဲဒဂိုန်ဂိုၚ်ကေတ်− ဒ္ဂေတ်မၚ်မွဲအာလၟိုန်− ဗဗိုန်လဝ်ပ္ဍဲစိုတ်ရအဴ။ "ဝေၚ်ပါဲကၠေံနူပွမကၠတ်ဂြပ်ညးမၞုံကဵုတၠမမိက်သ္ဂးရောၚ်။

ပါဲနူဂြပ်ဇကုတုဲ မပ္တံဂြပ်မၞိဟ်ဒေဝတဴတိရစ္ဆာန်အိုတ်သီုတံဂှ် ဂြပ်ညးတၞဟ် ဂြပ်မၞုံကဵုတၠမ္ဂးရောၚ်၊ ဆဂးဂှ် ဂြပ်ညးထောံပံသကူ− ပံသကူ− ဂြပ်ပ္ဍသုသာန် မပ္တံယာတ်ဗွိုက်လတက်, ဆုဒုန်ဇၞူဇွတံဂှ် ဒှ်ဂြပ်ဟွံမွဲတၠတုဲ ဂိုၚ်ကေတ်ဗၠးဒုဟ်ရ။ ပွမဂိုၚ်ကၠတ်ကေတ်ဂြပ်ညးတၞဟ် မၞုံကဵုတၠကီု၊ ပ္ဍဲအရာသၠာဲဂတးသွံရာန်စဂှ် ဝဵုစၞာဲလီလာန်မပ္တံန, နှီ, သၠးဒကေဝ်ဟွံတပ်တးတုဲ ဂိုၚ်ကေတ်ကီု၊ ကာလဇကုသွံစကဵုညးတၞဟ် ခဍောတ်န−နှီ၊ ကာလဒးကဵုညးတၞဟ် သီုစိုတ်မတ္ၚံက်ဝဵုစၞာဲ၊ ကာလဒးအလန်ဇကု ကေတ်ၞော်ပတိုန်န−နှီ− ထပက်ဒၚ်လသာလတာ်သၠဒကေဝ်ကီု၊ ပွမပၠံၚ်ၜးပၞုက်ဓလုက်ဗတိုက်ကေတ်ကီု၊ လှေံလှန်လီကသေက်ဍေက်သွေက်ရေက်ကးကၞေၚ်မတ်လတူညးတၞဟ် ဓဇန်စှ်ကီု၊ သီုကဵုစိုတ်ဟွံလ္ဂးတပ်တးဂှ် ဒှ်အုိန္နာဒါန်ဖအိုတ်ရောၚ်။

[လၚ်္ကာ] အဒိန္နာဒါန်၊ ကၠတ်ပိုန်ဟာန်ညး၊ မၞိဟ်အယုတ်ဂး၊ ချိုတ်ဒးနရက်၊ ဗၠးဗက်ဍံၚ်ကၠုၚ်၊ ဒုၚ်ဒုဟ်ထပ်ထပ်၊ ဂြပ်အောန်ဝါတ်ခါဲ−၁၊ ဒဒိုက်ကာဲ−၂၊ ကၠောဝ်ဇွောဴ−၃၊ မိက်ဂွံဒးစ္ဍး−၄၊ ဂြပ်ပြးလီုလာ်−၅။ ပၟတ်, ဍာ်, ကမၠတ်၊ ကောန်ဗၠတ်မိမ၊ ရာဇနာဲတၠ၊ သၞမသုန်သာ်၊ လီုလာ်ဂြပ်ရတ်−၆၊ ဒုဟ်ကၠတ်ဂၠိုၚ်ဟေၚ်၊ ယဝ်ဂွံဝေၚ်၊ ကလေၚ်ကၠေံဂှ်သဒှ်ဖဵုရောၚ်။

 

သွက်ဂွံတီအဓိပ္ပါဲ

ယဝ်ရဂိုၚ်ကၠတ်ကေတ်ဂြပ်ညးမၞုံကဵုတၠမ္ဂး ချိုတ်အာဒးနရက်လေဝ်နွံ၊ ဒှ်ပြိုတ်ဟွံမွဲကဵုဗွိုက်လတက်လေဝ်နွံရ၊ ဗၠးနူဒဒိုက်အပါဲတုဲ ဇၟာပ်ဇၟာပ်ဘဝ ကတဵုဒှ်မၞိဟ်ဂှ် ဟီုလဝ်ဖါအောန် ဒးဒုၚ်ဒုဟ်တြဴသာ်ဝွံရောၚ်၊ ဟိုတ်ဂှ်ရ− မၞိဟ်ကၠတ်လဝ်ဂြပ်ညးဂှ်−

၁။ ဂြပ်ရတ်အောန်တုဲ ဒးဝါတ်ခါဲအစေန်ကီု။

၂။ ဒှ်ဒဒိုက်လောန်ကာဲ သာဲအာနူညးအရီုအဗၚ်ကီု။

၃။ ဒှ်ကၞောဝ်ကၞောတ်ဗျဵု ဟွံမွဲကဵုဇွောံမစၞစသုၚ်ကီု။

၄။ အရာနွံပၟိက် မိက်ဂွံဂွံဂှ် ဂွံဟွံမာန်၊ မိက်ဂွံဒှ်စ္ဍးပါဲအာနူဇကုကီု။

၅။ ဟိုတ်နူမပ္တံသ္ပဗၞိက်သွံရာန်ဟွံလေပ်ဂှ်ရ၊ ဒးကျဟောံဗြံတံဟွံက လေၚ်တုဲ ဂြပ်ရတ်လီုလာ်လာဲလေၚ်ပြးဆာဲအာကီု။

၆။ ဟိုတ်နူသၞမသုန်သာ် မတွံဂး ပၟတ်, ဍာ်, ကမၠက် (ကောန်ဗၠတ်မိမ) ဂှ် ကောန်ပရံ, ရာဇဂှ်သၟိၚ်သၞမသုန်သာ် ပလီုပလာ်ကၠေံတုဲ ဂြပ်ရတ်ပိုန်ဟာန်မဒးလီုလာ်စာ်ထောၚ်လေၚ်အာအိုတ်ကီု၊ ဂုဏ်ဖဵုဟွံခိုဟ်ဟွံဆာဲပရေံပရုတ်ယုတ်ပပ်မြဴသာ်ဝွံ မဒးကလိဂွံဗွဲစၟတ်ရောၚ်။

ဒုဟ်တၞံတံမူလ။ ဒုဟ်အတိုၚ်မစၞောန်ထ္ၜးကၠုၚ်တုဲဂှ် ဗွဲဒဒှ်ဝိပက်ဗက် ဒးဒုၚ်စသိုၚ်ဖဵုအကုသဵုကံဇကု မကၠောန်ခၞံလဝ်ကၠာကၠာတေံဂှ်ရ၊ ဇၟာပ်ဘဝကတဵုဒှ်မၞိဟ်လေဝ် ကလိဂွံဒုဟ်ဒဏ်မပ္တံဂြပ်ရတ်အောန် ဒးကၠောန်ဒၟံၚ်ဂၠိုၚ်ကဵုဇၞူ ဗြဲဂူလေဝ် ဟဂွံစဴ တ္ၚဲကတဴလေဝ် ဟွံဂး ဒးဒုၚ်ဒဒိုက်ရုန်မဵု ကၠောဝ်ဗျဵုတဟၚ် ဂြပ်ဟွံတၚ် ဂြပ်ဟွံဒှ် တုပ်သၟဟ်ကဵုညးအိုတ်ကွိုန်ပိုန်ဟွံမွဲ ဝါတ်ဗွဲဒမၠိရောၚ်၊ ဒုဟ်ဇၞော်လတူနူဂှ် ဒးကတဵုဒှ်ပ္ဍဲပြိုတ်နရက်လေဝ်ဒှ်ဂွံရောၚ်။

• ကိုပ်ကၠာတေံဗြဴဖျာပန်ဂမၠိုၚ်ဂှ် ဂၠာဲပိုန်ဂြပ် ဂၠာဲဂြပ်ရတ်သွံဖျာနကဵုစိုတ်ဝဵုစၞာဲ ကၠတ်နှီသၠဒကေဝ်တဒြ ပကောံဂြပ်အိုတ်ရ၊ ဃောထတ်မြက်စာ ဃောအဝဲခိုဟ်ဒးရးဂှ်ဟေၚ် မဒးချိုတ်စုတိအာအိုတ်တုြ ကတဵုဒှ်ပြိုတ်သီုညးပန်တၠရောၚ်၊ ကတဵုဒှ်ပြိုတ်တုဲ ဆၜိုတ်ကလေၚ်ညာတ်ဘဝဇကု ဗီုကတဵုဒှ်ပ္ဍဲကိုပ်ကၠာတေံဂှ် ဟွံကဏီ၊ ကလေၚ်ညာတ်အာတြုံတၠသ္ၚိဇကု မဒၟံၚ်ကဵုသမ္ဘာတၟိလေဝ် ညာတ်အာရ။ ဗီုကလေၚ်ညာတ်တုန်− တြုံတၠသ္ၚိဇကု မဒၟံၚ်ကဵုသမ္ဘာတၟိ သီုကဵုမရပ်စပ်စကာဂြပ်ရတ်ဇကု မပကောံပကေဝ်ဟေန်ဆာဲဗွဝ်ဒၞာဂိုၚ်ဒေပ်လဝ်ကိုပ်ကၠာတေံတုဲ သီုကဵုအေၚ်ဒုၚ်ဟွံမာန်ဂှ် ကရေဲကညာၚ်ဗရုရမျှာၚ်သကာတ်မြဟ် ပ္ဍဲလတူကၟာၚ်ဍုၚ်ရဴဝွံမ္ဂး "ဂြပ်ရတ်ပိုဲပကောံပကေဝ်ဂၠာဲသ္ၚဳလဝ်ဗဗွဲဓဝ်လေဝ်ကဵုဒှ်၊ ဟွံဗဗွဲဓဝ်လေဝ်ကဵုဒှ်၊ ဗစဖျုၚ်ဒၟံၚ်ကောန် ဗြဴလက်ကရဴ ဆောဖွက်ဣတံအိုတ်ရဟေအ်၊ ပိုဲညးဂမၠိုၚ်ဂှ်အာစိုပ်ဒဒိုက် ဒှ်ဒၟံၚ်ဒဒိုက်အိုတ်ရ၊ ဗှ်ေတံဟွံသ္ပအသုၚ်ကဵုပိုဲမွဲရဟာ" ဂးတုဲ သီုကဵုစိုတ်ဂိအေၚ်ဒုၚ်ဟွံမာန်ဂှ် ကရေဲကညာၚ်ဒၟံၚ်ကြေဟ်ကြေဟ်အိုတ်ရောၚ်။ (ကၠုၚ်နူပါဠိပေတဝတ္ထု ပရူပြိုတ်ပကောံဂြပ် "ဘောဂသံဟရဏပေတဝတ္ထု" တေံရောၚ်။

သွက်အဒိန္နာဒါန်ဂှ် ဒှ်ဒုဟ်ကလိဂွံဒုဟ်ဂၠိုၚ်ဂၠၚ်တဴမပ္တံမြဴသာ်ဝွံတုဲ ဂပ်ဝ်ဒးဖေက်ဂၟံက်ဗွဲမလောန်ရ။ တၠဂြပ်ဂှ် မၞုံကဵုဂုဏ်ဇၞော်နူဇကု, ကေၚ်ပတုဲလဝ်ဂုဏ်ပ္ဍဲဇကုတုဲ၊ ယဝ်ရကၠတ်ဒးဂြပ်ညးမ္ဂး− ဒုဟ်ဇၞော်ဗွဲမလောန်ရ၊ ဂြပ်ရတ်တန်ကဵုၚုဟ်ဍောတ်ၚုဟ်အောန်, ၚုဟ်ဇၞော်ၚုဟ်ဂၠိုၚ်တံဂှ်လေဝ် ဗွဲမထေက်ကြိုက်ကဵုဂြပ်ဒ္ဂေတ်ဗက်အတိုၚ်ဂြပ်ရတ်တံဂှ်တုဲ ဒုဟ်ဍောတ်ဒုဟ်ဇၞော် ပါ်ဒကးတၟေၚ်အာတၞဟ်တၞဟ်သာ်ရ။ ယဝ်ရဟီုဗွဲအဆက်မ္ဂး− ဂြပ်ရတ်ဂှ် ၚုဟ်မးဂၠိုၚ်ၚုဟ်ဇၞော် ဒုဟ်ဂၠိုၚ်ဒုဟ်ဇၞော်ရ။ ဂြပ်ရတ်ဂှ် ၚုဟ်မးအောန် ၚုဟ်မးဍောတ်ဒုဟ်အောန်ဒုဟ်ဍောတ်ရ၊ ညးတၠဂုဏ်လဵုမွဲဒှ်ဒှ်၊ ယဝ်ရကၠတ်ဒးဂြပ်ညးမ္ဂး− ဒှ်ဒုဟ်ဇၞော်အိုတ်တုဲ ဒုဟ်ဇၞော်လတူနူဂှ် ကၠတ်ဂြပ်ကျာ် ဂြပ်ဓဝ် ဂြပ်သၚ်ရောၚ်၊ ဟိုတ်ဂှ်ရ− ယဝ်ရဂွံဝေၚ်ပါဲကၠေံနူပွမဂိုၚ်ကၠတ်ကေတ်ဂြပ် ညးမၞုံကဵုတၠမ္ဂး− အောန်အိုတ်ကလိဂွံဂုဏ်ဖဵုတြဴသာ် မတွံဂး−

၁။ ဂြပ်ရတ်ပိုန်ဟာန်တိဍာ်ဂၠိုၚ်လောဲသိုက်ဒှ်သေဋ္ဌဳဇၞော်ကီု။

၂။ ဟွံမွဲကဵုဒဒိုက်ဒုၚ်ဗြဲစဲတ္ၚဲတုဲ ဒှ်တသိုက်စိုတ်တသိုက်ကာယလၟိုန်ကီု။

၃။ ဟွံဒးကၠောဝ်ဗျဵု ဟွံဒးဆဵုဘဲဒဒိုက်ဗုၚ်ဂၞဴတုဲ စသုၚ်ဖဲလဲလောဲသွာကီု။

၄။ အရာနွံပၟိက်မိက်ဂွံဂွံအိုတ်သီုဂှ် ကလိဂွံလောဲသွာကီု။

၅။ သ္ပဗၞိက်သွံရာန်စဂှ်၊ ဟိုတ်နူဍိုဟ်ကေက်စဳကၠးဂှ်ရ− ဟွံဒးကျဟောံဗြံတုဲ ဂွံတံဂွံပရဲ ပြဲကွေံကွေံကီု။

၆။ ဟိုတ်နူသၞမသုန်သာ် ပလီုပလာ်ကၠေံဂြပ်ရတ်ဇကုဟွံမာန်ကီု မဒှ်ရောၚ်။ ဟိုတ်ဂှ်ရ− စွံသတိလပါ်ဒုဟ်ဂုဏ်ဖဵုတုဲ ဂိုတ်လွဳပရာဝေၚ်ပါဲကၠေံနူပွမကၠတ်ဂြပ်ညးအိုတ်ညိ။

 

(၃) ကာမေသုနိစ္ဆာစာရာ၊ နူ−ကဵုဒ္ဂေတ်မယုတ်− လုတ်မှာပ္ဍဲကောန်ဗြဴညး− မၞိဟ်ကလိလောန်ကၠေံပ္ဍဲကာမဂုဏ်ဂမၠိုၚ်− ဂၠိုၚ်ကဵုညးဂရိုဟ်။ ဝါ ။ နူ−ကဵုဒ္ဂေတ်မမှာရာ− ကလိလောန်ကၠေံပ္ဍဲကောန်သမ္ဘာတၠသ္ၚိကာမဂုဏ်ဂမၠိုၚ်။ ဝေရမဏိသိက္ခာပဒံ၊ နိ− သိက္ခာပိုဒ်− ဒှ်ဟိုတ်ဝေၚ်ပါဲ− ခိုဟ်ဆာဲဒးရး။ သမာဒိယာမိ၊ ပ္ဍံ− အဲဍိက်ဂိုၚ်ကေတ်− ဒ္ဂေတ်မၚ်မွဲအာလၟိုန်− ဗဗိုန်လဝ်ပ္ဍဲစိုတ်ရအဴ။ "ဝေၚ်ပါဲကၠေံနူဒ္ဂေတ်အယုတ်လုတ်မှာပ္ဍဲကောန်ဗြဴညးပ္ဍဲတြုံတၠသ္ၚိညးမမိက်သ္ဂးရောၚ်" (ဝဵုမတ်သမ္ဘာတၠသ္ၚိညးလေဝ်ဂး)

မၞိဟ်တြုံတြုံတံဂှ် သမ္ဘာဇကု ပွံၚ်ဇကု နွံဒၟံၚ်ဖိုဟ်၊ ယဝ်ရလုတ်မှာ, အာဒ္ဂေတ်မေထုန်ပ္ဍဲကဵုကောန်ဗြဴညးတၞဟ်, နှဴရဴထုဲထံၚ်ကဵုပွံၚ်ညးတၞဟ်မ္ဂး− ဒှ်ကာမေသုမိစ္ဆာစရာကလိလောန်ကၠေံသိက္ခာပိုဒ်ဝွံရောၚ်။

မၞိဟ်ဗြဴဗြဴတံလေဝ် တြုံတၠသ္ၚိဇကု ပွံၚ်ဇကု နွံဒၟံၚ်ဖိုဟ်၊ ယဝ်ရကၠတ်စိုတ်တၠသ္ၚိဇကု, ပံၚ်ဖက်ဆက်ဆောံဟုဲသၞဴ ဖအာတဴဒ္ဂေတ်အယုတ်ကဵုတြုံတၠသ္ၚိညးတၞဟ်မ္ဂး− ဒှ်ကာမေသုမိစ္ဆာစာရကလိလောန်ကၠေံသိက္ခာပိုဒ်ဝွံရောၚ်။

ကာမဂုဏ်မ္ဂးဂှ် တြုံကဵုဗြဴညးၜါ သၞဴရဴရေၚ်ကာန်သ္ဍိုက်ဆာန်ရေၚ်သ္ကံ လုက်ဒွံထတ်သာတဏှာၚုဟ်ကၠုၚ် ဒုၚ်စသိုၚ်ရှ်အာရီုဂှ် ဇိပ်ဂၠိပ်မိပ်ဇြိပ်အီဂြိုၚ်လတိုၚ်လမှ် မြဟ်မြဴသၠောၚ်ဒၟံၚ်ပံၚ်ဖက်ဆက်ဆောံကောံကောံထုဲထုဲမ္ဂးရောၚ်၊ အရေတ်ဝေါဟာလိက်ဂှ် “ကာမ− ဂှ်နွံပၟိက်မိက်ဂွံဂွံ၊ ဂုဏ်−ဂှ် ဒွက်, ဒက်” ပံၚ်သီုၜါတုဲ ကာမဂုဏ်မ္ဂးယၟုရ။ ကာမဂှ် ဝတ္ထုကာမ, ကိလေသကာမ နွံဒၟံၚ်ၜါဂကူရောၚ်၊ ဝတ္ထုကာမဂှ် ဂွံကဵုအာရီုမသုန်မတွံဂး ရူပါရီု သဒ္ဒါရီု ဂန္ဓာရီု ရသာရီု ဖေါဋ္ဌဗ္ဗာရီုတုဲ ကိလောသကာမဂှ် ဂွံကဵုကိလေသစှ်ရောၚ်။

ကာမဂှ် နွံပၟိက်မိက်ဂွံဂွံ၊ ဂုဏဂှ် ဒွက်မ္ဂးဂှ် မတ်ပိုဲဂှ် အာကဵုရူပါရီုညာတ်သာ်တုဲမိက်ဂွံဂွံရ။ ကတောဝ်ဂှ် အာကဵုသဒ္ဒါရီု မိၚ်ရမျှာၚ်တုဲ မိက်ဂွံကလၚ်ရ။ ညာတ်ရုပ်မိၚ်ရမျှာၚ်ဒးစိုတ် မိက်ဂွံဂွံတုဲ ရုပ်ကဵုရမျှာၚ်ဂှ် တုပ်သၟဟ်ညံၚ်ရဴဒွက်ဒက်လဝ်မတ်ကဵုကတောဝ် ဟွံကဵုချဳအာနူဒၞာဲ, တုပ်ဗီုဇုက်ဇရှ်ေဒွက်ကၠေၚ်ဒက်စကီုရ၊ ဟိုတ်ဂှ်ဟေၚ်− ကော်ခဴစ “ကာမဂုဏ်” ရောၚ်၊ အာရီုပိသၟေဟ်သှ်ေဒၟံၚ်ဂှ်လေဝ် တုပ်ရ။ တြးပ္တိတ်တုဲ ဗဂပ်ဏာမ္ဂး− ဂန္ဓာရီုကဵုမုဟ်, ရသာရီုကဵုလတာ်, ဖေါဋ္ဌာဗ္ဗာရီုကဵုကာယဇကု လုက်စုက်ထၟတ်ဒွံခ္ဍဳလျတ်ဂဗတ်လပိုက်ဒးတုဲ မိပ်ဇြိပ်ကေုာံရေၚ်သ္ကံရောၚ်။

ပ္ဍဲအရာဒ္ဂေတ်အယုတ်မှာကေုာံရေၚ်သ္ကံ ထၟတ်ဒွံလုက်စုက်ဒးဖေါဋ္ဌဗ္ဗာရီု ဒးလီုလာ်ညးမွဲကဵုမွဲ ဒုဟ်ဇၞော်ကွေံကွေံရ၊ ဝေၚ်ပါဲကၠေံနူဒ္ဂေတ်လၟေတ် ဒ္ဂေတ်အယုတ် ဟွံသၞဴရဴထုဲကြာန်ကေုာံရေၚ်သ္ကံ ဟွံပံၚ်ဖက်ဆက်ဆောံဗွဲအစောံမကၠတ်စိုတ်ဝဵုစၞာဲညးသ္ကံတုဲ၊ ယဝ်ရဂွံမံအာဇြုၚ်ဇြုၚ်ဂွုဂွု ဗုဗုအးအးမာန်မ္ဂး− ဒှ်ဒ္ဂေတ်ခိုဟ်ဒ္ဂေတ်ပြဲ ဒ္ဂေတ်တဲသၠုၚ်အိုတ်ရောၚ်၊ အတိုၚ်စၞောန်ထ္ၜးလဝ်ပ္ဍဲပွံက်ဂုဏ်သွာက္ခာတတေံဂှ် ဒ္ဂေတ်ပတုပ်ဗက် “ကောန်သၟိၚ်တြုံကောန်သၟိၚ်ဗြဴဥဒယဘဒ္ဒကဵုဥဒယဘဒ္ဒါ” ညးၜါတၠဂှ်တုဲ ဒးမၚ်မွဲထေက်ကြိုက်ကွေံရ။

ဝေၚ်ပါဲဟွံမာန်လဝ်ကဵုဒှ်ကၠာရ၊ ဆၜိုတ်သမ္ဘာတၠသ္ၚိပွံၚ်ဇကုအပိုၚ်ဂှ် ဟုဲသၞဴပံၚ်ဖက်ဆက်ဆောံတုဲ ဂွံအေၚ်သတှ်ေဗဗေၚ်အာပၟိက်ညးသ္ကံ ဂွံရနုက်ဗဗေၚ်အာပါရမဳညးမွဲကဵုမွဲဗွဲသဘဴဓဝ် ယဝ်သဒှ်မ္ဂး− အတိုၚ်ဝတ်လောကတၠပညာတံဟွံဂရိုဟ်ဗျိရ၊ လောဘလောန်ကာဲအာတုဲ ဂၠာဲဗပေၚ်ဒၟံၚ်ပၟိက်တဏှာ ဟွံဖေက်ဒုဟ်ဒဏ်ဂှ်လေဝ် ဟွံစှ်ေသၞောတ်ဗ္ၜတ် ပ္ဍဲပရေၚ်ဓမ္မဝတ်ရ၊ ဗက်ပၟိက်လောဘရာဂတဏှာတုဲ ဏာဗစိုပ်ကဵုနရက်မာန်ဂှ်လေဝ် ဟွံညာတ်ဒုဟ်ဂတသက်သက်ရောၚ်၊ ဟိုတ်ဂှ်ရ− ပါဲနူသမ္ဘာတၠသ္ၚိဇကုတုဲ၊ ယဝ်ရထုဲသၞဴသိပ်ဂၠိပ် ပ္ဍဲသမ္ဘာတၠသ္ၚိညးသ္အာၚ် ထပ်ကဵုထပ်မ္ဂး− ဟွံဒးကဵုပရေၚ်ဓဝ်ကျာ် ပါ်ကန်ချိုတ်ဗက် စိုပ်နရက်ဍာံဍာံရောၚ်။

ဒ္ဂေတ်မေထုန်ရုန်မဵုမြဴသာ်ဝွံဂှ် ဒှ်ဒ္ဂေတ်ယုတ်မာညးသပ္ပရိုဟ်ဂမၠိုၚ် ထေက်ကဵုဂရိုဟ်ဗျိဗွဲစၟတ်တုဲ ပ္ဍဲသတ်တိရစ္ဆာန်ဍောတ်ဍောတ်သွတ်သွတ် မပ္တံဂၟိတ်ဂဂိတံဂှ်လေဝ် ဒ္ဂေတ်မေထုန်နွံဒၟံၚ်ဖအိုတ်ရ၊ ရာဂတဏှာညးကဵုညး ပေၚ်ဍတ်ဒၟံၚ်တုဲ ဒ္ဂေတ်မေထုန်ယုတ်သဝ်ပရေံအိုတ်ဂှ် သတ်တိရစ္ဆာန်၊ ဒ္ဂေတ်မေထုန်တဲသၠုၚ်အိုတ်ဂှ် ဍုၚ်ဒေဝတဴသွဝ်တြဴဘုံတေံရောၚ်၊ ဟိုတ်ဂှ်ရဟ ပါဲနူပွံၚ်ဇကု ဆောဖွက်ဇကုတုဲ လုတ်မှာအာပ္ဍဲကောန်ဇာတ်သမ္ဘာတၠသ္ၚိညးတၞဟ်ကီု၊ သၟတ်ဗြဴဆေၚ်ဆက်ကဵုတၞောဝ်ဒတောဝ်ဝံသဇကု, သၟဝ်ဗြဴညးတၞဟ်သက်သက် ဟွံဆေၚ်ဆက်ကဵုဇကုမပ္တံကလောကောဒေံမိမ ညးမၚ်မွဲလဝ်ဂှ် ဒ္ဂေတ်လုတ်မှာအာမေထုန်ကီု၊ ညးမွဲကဵုမွဲ စိုပ်တုပ်သၟဟ်ကေုာံရေၚ်သ္ကံလေဝ်ကဵုဒှ်, ဟွံတုပ်လေဝ်ကဵုဒှ် ဒ္ဂေတ်မၞိဟ်တြုံမကလိလောန်လုတ်မှာအာကို။ ပါဲနူတြုံတၠသ္ၚိဇကုမပိုၚ်ပြဳလဝ်ဂှ် ဒ္ဂေတ်မၞိဟ်ဗြဴ သၞဴရဴပံၚ်ဖက်ဆက်ကဵုတြုံတၠသ္ၚိညးတၞဟ်ကီု ဒ္ဂေတ်ယုတ်မာပပ်ပဳမြဴသာ်ဝွံ၊ တၠပညာတံ ဂရိုဟ်ဗျိက္ဍုဟ်မၠေံတုဲ ဒှ်ဒုဟ်ဇၞော်ကဵုဇြဟတ် ဒှ်ဒ္ဂေတ်သတ်ယုတ်အိုတ်ကၞောတ်ရောၚ်။

[လၚ်္ကာ] မိစ္ဆာစာရ၊ ပြဝဟွံအပ်၊ စောဲစပ်လုတ်မှာ၊ ဟွံသာလးလး၊ ချိုတ်ဒးနရက်၊ ဗၠးဗက်ဂွံဒုဟ်၊ ညးက္ဍုဟ်ဂၠိုၚ်ရ၊ ၁၊ သၞဝဲပေၚ်ထာတ်၊၂−ဝါတ်လာပ်ဗဇဴ၊ ၃−တသိုက်ဒဴဂၠိ၊ ၄−ဣတ္ထိ၊ ၅−ခမၞုဲ၊ ၆−တုဲဂကူသဝ်၊ ၇−လဝ်မုက်ဟွံဒွး၊ ဒးဂွံဗိုၚ်ဂၠိ၊ ၈−ဣန္ဒြိလက်သဏ်၊ (သန်) ဗၠန်ဗၠးဆောတ်ယောၚ်− ၉−မွဲတောၚ်စံၚ်တူ၊ ၁၀−သာဲနူဇြဟာတ်၊ ၁၁−ဒုဟ်ဂၠိုၚ်ထၞာန်၊ ဝေၚ်မာန်ခါဂှ် သဒှ်ဖဵုရောၚ်။

သွက်ဂွံတီအဓိပ္ပါဲ

၁။ မၞိဟ်လုတ်မှာအာပ္ဍဲဒ္ဂတ်ေကာမေသုမိစ္ဆာစာရဂှ် ချိုတ်ဒးနရက် ဗၠးနူနရက် ဝိပက်ဗက်ဒးဒုၚ်စသိုၚ် ဖဵုအကုသဵုကံဇကု မကၠောန်ခၞံလဝ်ကၠာကၠာတေံဂှ်တုဲ ဇၟာပ်ဇၟာပ်ဘဝကဵုဒှ်မၞိဟ်မ္ဂး−

၁။ ညးတၞဟ်က္ဍုဟ်မၠေံဂၠိုၚ်လောန်ကီု။

၂။ ဆၜိုတ်ညးတၞဟ်က္ဍုဟ်မၠေံဟွံသေၚ်ဏီ သၞသတြုသၞဝဲလေဝ်ဂၠိုၚ်လောန်ကီု။

၃။ ကလိဂွံလာပ်ဗဇဴဝါတ်ဂါတ်တုဲ လ္ၚုသုန်ဂြာံအာနူလာပ်ဗဇဴဂြပ်ရတ်ကီု။

၄။ စာ်စ္ဍးလ္ၚုလ္ၚန်အာနူတသိုက်, တသိုက်ဒဴကၠေံတုဲ ဒှ်ဒဒိုက်ဇၞော်ကဵုဇြဟတ်ကီု။

၅။ ဒးကတဵုဒှ်မၞိဟ်ဗြဴကီု။

၆။ ဗြဴလေဝ်ဟွံသေၚ် တြုံလေဝ်ဟွံသေၚ် တၟေၚ်နူညးတၞဟ် ကတဵုဒှ်ခမၞုဲကီု။

၇။ ကတဵုဒှ်မၞိဟ်တြုံတုဲပၠန်လေဝ် ဇၟာပ်ဇၟာပ်ဘဝ မဒးကတဵုဒှ်ပ္ဍဲဂကူယုတ်သဝ်ကီု။

၈။ မုက်မတ်လီုလာ်ကျာ်သြဳကှ်ဇြး မဒးဂွဂၠေံတုဲ ညးခ္ဍိုက်မုက်ဇကုဂၠိုၚ်ကီု။

၉။ ဣန္ဒြဳလက်သဏ်အဝဲဇကု မပ္တံဇိုၚ်တဲမုက်မတ်မုဟ်ကတောဝ် ဆောတ်ယောၚ်လီုလာ်ရုပ်သာ်ပရေဴကီု။ (အိန်ရဳလေဝ်ချူရ)

၁၀။ မဒးဒှ်ဂဝိၚ်ဂွိၚ်ဂွါဲစံၚ်တူဇၞော်ကဵုဇြဟတ်ကီု။

၁၁။ မဒးပြးဆာဲသာဲခြာနူဇြဟာန်ညးသ္ဍိုက်ဆာန်ဇကုကီု။ မပ္တံဒုဟ်ဂမၠိုၚ် မြဴသာ်ဝွံ၊ ကလိဂွံဗွဲစၟတ်ရောၚ်။ မၞိဟ်ဇကုပတုဲဒ္ဂေတ်ကောန်သမ္ဘာမၞိဟ်ဒးဒုၚ်လုတ်မှာကလိလောန်အကဵုဇကုဂှ်၊ ယဝ်ရဒှ်မၞိဟ်နွံကဵုသဳလသိက္ခာနွံကဵုဂုဏ်မွဲမွဲမ္ဂး− ဒုဟ်ဇၞော်ဗွဲမလောန်တုဲ၊ ယဝ်ရဒှ်မၞိဟ်ဟွံမွဲကဵုဂုဏ်သဳလမ္ဂး− ဒှ်ဒုဟ်ဍောတ်ညိရ။ ၜိုန်ဍောတ်ကီုလေဝ် နရက်ဟွံဗၠးတုဲ (မၞိဟ်ပြဲပြဲကဵုမၞိဟ်ယုတ်ယုတ်ဂှ် ပါ်ပရံကေတ်ဒုဟ်ညိ)။

ဒုဟ်တၞံတံမူလ။ ဒုဟ်ဂမၠိုၚ် အတိုၚ်မစၞောန်ထ္ၜးလဝ်တုဲဂှ် ဗွဲဒဒှ်ဝိပက်ဗက်ဒးဒုၚ်စသိုၚ် ဖဵုအကုသဵုကံဇကု မကၠောန်ခၞံလဝ်ကၠာကၠာတေံဂှ်ရ၊ ဇၟာပ်ဇၟာပ်ဘဝ ကတဵုဒှ်မၞိဟ်လေဝ် ကလိဂွံဒုဟ်ဒဏ်မပ္တံညးတၞဟ်က္ဍုဟ်ဇကု, ကောန်ဇာတ်သမ္ဘာကလောကောဒေံမိမက္ဍုဟ်ဇကု, ညးက္ဍုဟ်အဲက္ဍုဟ် ညးတၞဟ်က္ဍုဟ်ဂၠိုၚ်ကွေံကွေံ, သၞသတြုဂၠိုၚ်ညးဂြိုဟ်ကဵုဇကုဂၠိုၚ်ကွေံကွေံရ။ ဒုဟ်ဇၞော်လောန်ကာဲနူဂှ် ဒးအာကတဵုဒှ်ပ္ဍဲနရက်လေဝ် နွံတဴဗွဲမဂၠိုၚ်ဂၠၚ်ရောာၚ်။

−−−−−

ပရူကောန်သေဋ္ဌဳပန်။ ကောန်သေဋ္ဌဳပန်ဂှ် ကတဵုဒှ်မၞိဟ်ပ္ဍဲဍုၚ်ဗာရဏသဳ လက်ထက်ကျာ်ကဿပ အာယုက်သတ္တံ “ၜါစှော်လ္ၚီ” သၞာံရ။ ကောန်သေဋ္ဌဳပန်ဂှ် ဂွံပတၠဂြပ် “ပန်ပန်စှော်ကိုဋ်” ရ၊ ဟိုတ်နူဂြပ်ဂၠိုၚ်ဂွံဗက်မိပ်အတိုၚ်ပၟိက်စိုတ်ဂှ်ရ− ပလီုပလာ်ကောန်ဗြဴညး နကဵုသြန်တံဂှ်တုဲ ချိုတ်အာစိုပ်နရက် ကၠာၚ်ပသဲဍာဲဍာဲဂြၚ်ဂြၚ် လၚ်လၚ်ဂဵုဂဵု ကော်ခဴစ “လောဟကုမ္ဘိ” ရောၚ်၊ ဍာ်ထၟာဲဍာဲဍာဲတူတူကၞံဒၟံၚ်ဗြံၚ်ဗြံၚ် ထ္ၜိုဟ်ကတဵုဒၟံၚ်ဗြောတ်ဗြောတ်ရ၊ ညးမွဲ−နုၚ်ထၟဲကၠာၚ်ပသဲမွဲမရ၊ ညးပန် နုၚ်ထၟာဲကၠာၚ်ပသဲပန်မရ၊ နရက်လောဟကုမ္ဘိဂှ် နွံဗဒါဲဍုၚ်သာရဝှ်ရ၊ သ္ပဟိုတ်ကဵုသၟိၚ်ပဿိုန်တုဲ ကျာ်တြဲတွံလဝ်ဇာတ်ဝွံရောၚ်။ (စတုက္ကနိပါတ်ဇာတလောဟကုမ္ဘိ) မ္ဂးယၟုရောၚ်။

ပ္ဍဲဓမ္မပဒဗာလဝဂ် ပရူသၟိၚ်ပဿိုန်ကဵုတြုံမမိက်ကဵုမွဲမွဲဂှ် ကောန်သေဋ္ဌဳပန် ကတဵုဒှ်မၞိဟ်ပ္ဍဲဍုၚ်ဗာရဏသဳသ္ဂးလဝ်ရ၊ ပ္ဍဲဇာတ်ကီု၊ ပ္ဍဲအဋ္ဌကထာသဂါထာဝဂ္ဂကောသလသံယုတ်ပြဝံက်ယညသုတ်ကီု၊ ကတဵုဒှ်မၞိဟ်ကိုပ်ကၠာတေံ ပ္ဍဲဍုၚ်သာရဝှ်ဂှ် သ္ဂးလဝ်ရ၊ ပ္ဍဲဇာတ်လေဝ် သ္ပဟိုတ်ကဵုသၟိၚ်ပဿိုန်တုဲ တွံလဝ်ရ၊ ဇာတ်အတိက်ဂှ် ဍုၚ်ဗာရာဏသဳ သၟိၚ်ဗြဟ္မဒတ္တ၊ ဗောဓိသတ်ပိုဲ ဒှ်ဣသိသ္ပဒတဴပ္ဍဲဂြိုပ်ဟေမဝန်၊ ကာလဖျဴဇာတ်ဂှ် မှာထေရ်သာရိပိုတ်လၟုဟ် ကၠာတေံဒှ်ကွးဗဗၞးပြောဟိတ်တုဲ ကျာ်တြဲလၟုဟ်ဂှ် ကၠာတေံဒှ်ဣသိရောၚ်၊ ပ္ဍဲဓမ္မပဒဂှ် ကောန်သေဋ္ဌဳပန်ဝွံ− ချိုတ်အာတုဲ ဒးနရက်အဝိက် ခရာအကြာ ကျာ်မွဲဇကုရ၊ ဗၠးနူနရက်အဝိက်တုဲ ဆဝိပက်မသှ်ေၜက်ဒၟံၚ်ဂှ် ဒးနရက်လောဟကုမ္ဘိရောၚ်။

ပ္ဍဲဇာတ်ဂှ်လေဝ် ဒးနရက်လောဟကုမ္ဘိရ၊ နရက်ဝွံ− ဒှ်တွဳဗွိုၚ်နွံဇိုၚ်နရက်အဝိက်ရ၊ နွံကြပ်ကဵုနရက်အဝိက်ကီုရ၊ နူပါၚ်ထၟာဲကၠာၚ်ပသဲဝွံ၊ ဂွံစိုပ်ဂတာတေံ စှ်ေအာခရာ “ပိစှော်လ္ၚီ” သၞာံ၊ စိုပ်ဂတာတေံတုဲ ဂွံတိုန်မံက်ကၠုၚ်လိုက်ပါၚ်ထၟာဲဂှ် လၟိဟ် “ပိစှော်လ္ၚီ” သၞာံပၠန်ရ၊ တြဴစှော်လ္ၚီသၞာံ ပေၚ်အာတုဲလေဝ် ဟွံဗၠးဏီရ။ ကာလမံၚ်တိုန်ဂှ် ညးရံၚ်အဲ, အဲရံၚ်ညးတုဲ ဟီုပံက်ပါၚ်ဗရုရမျှာၚ်ညးမွဲမွဲအက္ခဝ် မွဲမွဲမ မတွံဂး “ဒု−သ−န−သော” ဟီုဟွံအိုတ် ဗၠိုက်စှ်ေအာပၠန်ရောၚ်၊ ဟိုတ်ဂှ်ရ− ပရူကောန်သေဋ္ဌဳပန်ဂှ် ကေၚ်မိၚ်ဒၟံၚ်နူအ္စာဓဝ်မတွံထ္ၜးကဵုတုဲ ချူဗွဲခမၞောန်, မိက်ဂွံတီဗွဲတြးမၠာ်သ္ၚဳကေတ်ပ္ဍဲဇာတ်ကဵုဓမ္မပဒတေံညိ။

တၚ်စၟတ်။ နရက်ဍာ်ဂမ္တဴကော်ခဴစ “လောဟကုမ္ဘိ” ဂှ် ရဲပလီုပလာ်ကောန်ဇာတ်သမ္ဘာတၠသ္ၚိညး ရဲတံၚ်ဓဇက်ကောန်ဗြဴညး ရဲဗက်မိပ်ဖေါဋ္ဌဗ္ဗာရီု ရဲကလိလောန်ကၠေံကာမေသုမိစ္ဆာစာရသိက္ခာပိုဒ်တံဂှ် ဒှ်ဒၞာဲဝါဲသ္ၚိတာဲဍုၚ်ကွာန်ဋ္ဌာန်ဇၞူညးတံရ၊ ဗက်မိပ်အာရီုမသုန်ကာဂုန်သာ်ဂှ်တုဲ ဒးစိန်ဂၠက်ဒၟံၚ်ပ္ဍဲနရက်အဝိက် နရက်ကၠာၚ်ထၟာဲပသဲဍာဲဍာဲဂှ် ဒှ်အာဲပူဂဵုဒ္ဂေတ်အယုတ်လုတ်မှာပ္ဍဲကောန်ဇာတ်သမ္ဘာတၠသ္ၚိညးရောၚ်၊ ဟိုတ်ဂှ်ရ− ဗီုကောန်သေဋ္ဌဳပန် နရိုအ်ကညာၚ်ဒၟံၚ်နကဵုရမျှာၚ် "ဒု−သ−နသော" ဂှ် ကဵုဂွံသိၚ်အာကဵုမိၚ်အာပ္ဍဲကတောဝ်တုဲ တ္ၚဲလဵုဂွံတိတ်ဗၠးဂှ် ကၞုၚ်ကၞောတ်ဟွံမွဲရောၚ်။

• သွက်ဂွံဗစာရဏာ ဂွံသံဝေဂ ဖေက်ဂၟံၚ်ခိုဟ်ဂှ် ဟီုပၠိုဟ်ပၠး စၞောန်ထ္ၜးကဵုပရူပရာမှာထေရ်အာနန် "အာနန္ဒ" မှာထေရ်ညးမပ္တံလဝ်ပါရမဳမွဲလက်ကၠာကၠာတေံရ၊ ဒဒှ်ရဒုဟ်ကာမေသုမိစ္ဆာစာရကံ ၜိုတ်ဂလိုၚ်လဵုဇၞော်ဂှ်လေဝ် ညးတၠဝါသနာဒကာဗုဒ္ဓဘာသာပိုဲ ကလၚ်ပၚ်မှိၚ်ကေတ်အိုတ်ညိ၊ လၟောဝ်ထေရ်အာနန္ဒ (အာနန်) ဂှ် ပတံကၠုၚ်ပါရမဳမွဲလက်ကဝ်တုဲ ဗွဲကြဴပ္ဍဲကဝ်ဝွံဟေၚ် ထေက်ကဵုစဴနိဗ္ဗာန်မာန်ကီုရ။ ဃောအခိၚ်ဂှ် ကတဵုဒှ်ကောန်တြုံဓမာတ်ထဝ် ပ္ဍဲဍုၚ်ရာဇာဂြိုဟ်မွဲဘဝရ၊ ပ္ဍဲဘဝကောန်တြုံဓမာတထဝ်ဂှ် ဟုဲဟဟ်ပံၚ်ဖက်ဆက်ဆောံဒးကဵုမၞိဟ်ပပ်ပပ်ပဳပဳတုဲ ကၠောန်ဒးဒ္ဂေတ်အယုတ် လုတ်မှာအာပ္ဍဲကောန်ဗြဴညး ပတုဲဒးပြဝကာမေသုမိစ္ဆာစာရကံရောၚ်။ (ပံၚ်ဖက်ကဵုပူဂဵုသမၠီုဂှ် ဒှ်ဒုဟ်တၟာဝွံရောၚ်)။

စုတိအာနူဘဝကောန်တြုံဓမာတ်ထဝ်တုဲ အာကတဵုဒှ်ကောန်သေဋ္ဌဳတြုံ ပ္ဍဲဍုၚ်ကောသမ္ဗဳပၠန်ရ၊ ဒုဟ်ပါပ်ကလောန်ကၠောန်လဝ်ယုတ်ယုတ်ဂှ် ဍေံဟွံကဵုဖဵုဏီတုဲ ညံၚ်ရဴ "တိုပ်လဝ်လ္ၚပၟတ်ကဵုပတေၚ်ဖဴကီု" ရ၊ ဟွံကဵုဖဵုလဝါဲဂှ်တုဲ ကာလကၠုၚ်ကတဵုဒှ်ကောန်သေဋ္ဌဳဂှ်၊ မုက်မတ်မြဟ်မြဴကွေံကွေံရ၊ စိုတ်အလန်တတိယဘဝဂှ်၊ ဟိုတ်နူပရဒါရိကကံ, ကံကလောန်အကုသဵု ပလီုပလာ်လဝ်ကောန်ဗြဴညးပ္ဍဲဘဝကောန်တြုံဓမာတ်ထဝ်တေံဂှ်ရ၊ ချိုတ်စုတိဗက်စိုပ်နရက် "ရောရူဝ" ရောၚ်။

ဒးဒုၚ်နရက်ရောရုဝလံလဂၠိုၚ်သ္ၚောဲ လုကဴဂၠိုၚ်ကဵုသၞာံ ပယာံမလံတုဲ ကာလဗၠးကၠုၚ်နူနရက်ဂှ် ကတဵုဒှ်ဗ္ၜေံကၟက် ပ္ဍဲ "ရးဘိန္နာဂတ" ဒးဒုၚ်ဂအးထောံထိုၚ်ဟဇာအာတ်တံပ္တိတ်ထောံ "ထၟာဲစိုက်" ၜါမပၠန်ရ။ ပ္ဍဲမရနုက်ကဵုပန်ဘဝဝွံ၊ ကတဵုဒှ်ဗ္ၜေံကၟက် ဗ္ၜေံဗံဇၞော် ဇၞော်ကျေဝ်ကျေဝ်ဖိုဟ်ဂှ်၊ ဟိုတ်နူကာမေသုမိစ္ဆာစာရကံအဵု ညးဟွံဗဵုညးဟွံစွံ ပ္တိတ်ထောံထၟာဲလိၚ်ၜါမရ၊ ပ္ဍဲမရနုက်ကဵုမသုန်ဘဝဂှ် အာကတဵုဒှ်ကၞုဲ ပ္ဍဲဂြိုပ်ဇၞော်တုဲ အပါကၞုဲဂှ် ကိတ်ထောံထိုၚ်ဟဇာနူဍောတ်ဍောတ်တေံပၠန်ရ၊ ဂွိၚ်ဖေက်ဒှ်သၞသတြုကီု ဂွိၚ်ဖေက်မၚ်မွဲဟွံမာန်ကီုတုဲ ကိတ်ဒးကးသၠေက်ထောံထိုၚ်ဟဇာထၟာဲလိၚ်ဂှ်ရ။

ပ္ဍဲမရနုက်ကဵုတြဴဘဝဂှ် အာကဵုဒှ်ဂၠဴကၟက် ပ္ဍဲ "ရးသုဒဿန" တုဲ ဒးဂအးပတိတ်ထောံထိၚ်ဟဇာပၠန်ရ။ ချိုတ်အာနူဘဝဂၠဴဂှ်တုဲ ပ္ဍဲမရနုက်ကဵုထပှ်ဘဝဂှ်၊ ၜိုန်ရကလိဂွံဘဝမၞိဟ် ကတဵုဒှ်မၞိဟ်ပ္ဍဲ "ဝဇ္ဇဳရး" ကီုလေဝ် တြုံလေဝ်ဟွံသေၚ်, ဗြဴလေဝ်ဟွံသေၚ် ၝောံကၟက်ဟွံထေၚ် ဟွံမံက် ကော်ခဴစ "နပုံခမၞုဲ" ရ။ (ဣဝွံ အတိက်ထပှ်ဘဝ) ရောၚ်၊ ပၞောဝ်ကဵုထပှ်ဘဝဂှ် တိရစ္ဆာန်ပိဘဝ, မၞိဟ်ပိဘဝ, နရက်မွဲဘဝရောၚ်။

ကတဵုဒှ်ဂၞကျာ်သၟိၚ်အိန်ပန်ဘဝ။ စုတိပြံၚ်ဘဝချိုတ်အာနူဘဝမၞိဟ် နပုံခမၞုံပ္ဍဲဝဇ္ဇဳရးဂှ်တုဲ အာကတဵုဒှ်ကောန်ဒေဝတဴဗြဴ ပ္ဍဲသွဝ်တာဝတိံ ဒှ်ဂၞကျာ်သၟိၚ်အိန်ပန်ဘဝပၠန်ရ၊ ရုပ်သာ်ကျေဝ်ကွေံကွေံဂှ်၊ဟိုတ်နူအသိၚ်ဂွံမၚ်မွဲလဝ်သဳဥပုဟ်ရ၊ ဂွံစိုပ်သွဝ်ဂှ်ကီု, ဂွံဒှ်ဂၞကျာ်သၟိၚ်အိန်ဂှ်ကီု၊ ဟိုတ်နူဂွံပတုဲလဝ်ဒါနကုသဵုကဵုသဳလကုသဵု ကာလကတဵုဒှ်ကောန်သေဋ္ဌဳပ္ဍဲဍုၚ်ကောသမ္ဗဳတေံရ၊ လၟောဝ်ထေရ်အာနန် ကၠောန်ဒးကလောန်ယုတ်ယုတ်ပပ်ပပ် ဆက်စပ်ကဵုပလီုလောန်ဗြဴညးဂှ် ချိုတ်အာနူဘဝဂၞကျာ်သၟိၚ်အိန်တုဲ ပ္ဍဲမရနုက်ကဵုစှ်ၜါဘဝဂှ် ကတဵုဒှ်ဂၞကျာ်ဒေဝတဴဇဝန ပ္ဍဲဍုၚ်သွဝ်ပၠန်ရ။ (ဒှ်ဘဝဒေဝတဴဗြဴမသုန်ဘဝရောၚ်)။

ၜိုန်ရအာကတဵုဒှ်ပ္ဍဲဍုၚ်သွဝ်တေံကီုလေဝ်၊ ဟိုတ်နူအကုသဵုကံ ကာမေသုမိစ္ဆာစာရပ္ဍဵုပ္ဍိုက်ဗလိုက်ဖျေံဂှ်ရ− ဟဂွံကတဵုဒှ်ကောန်ဒေဝတဴတြုံပြဲပြဲ တဲသၠုၚ်သၠုၚ်တုဲ အလုံမသုန်ဘဝဂှ် ဒးကတဵုဒှ်ကောန်ဒေဝတဴဗြဴသၟးသၟးရ။ နူဘဝဂၞကျာ်ကောန်ဒေဝတဴဇဝနဂှ် စုတိစှ်ေကၠုၚ်တုဲ ကၠုၚ်ကတဵုဒှ်ကောန်ဝုတ်သၟိၚ်အၚ်္ဂတိ ပ္ဍဲဍုၚ်မိတ္ထဵုဝွံရောၚ်၊ ပ္ဍဲမရနုက်ကဵုစှ်ပိဘဝဝွံ၊ ကၠုၚ်ကတဵုဒှ်ကောန်ဝုတ်သၟိၚ်အၚ်္ဂတိ မၞုံယၟု "ရုစာ" ရ၊ ကတဵုဒှ်ဘဝၝောံဗြဴသက်သက်ဂှ် တြဴဘဝရောၚ်၊ စုတိအာနူဘဝကောန်ဝုတ်သၟိၚ်ဝွံတုဲ အာကတဵုဒှ် ကောန်ဒေဝတဴတြုံပ္ဍဲသွဝ်တာဝတိံတေံရ၊ ဘဝဝွံ ဒှ်ဘဝမရနုက်ကဵုထပှ် ကံဝိပက်ကြပ်အိုတ်ကီုရ၊ (ဣဝွံ အနာဂတိထပှ်ဘဝရောၚ်) ပၞောဝ်ကဵုထပှ်ဘဝဂှ် ဒှ်ဂၞကျာ်သၟိၚ်အိန်ပန်ဘဝ, ဒှ်ဂၞကျာ်ကောန်ဒေဝတဴဇဝနမွဲဘဝ, ဒှ်ကောန်ဝုတ်သၟိၚ်အၚ်္ဂတိမွဲဘဝ, ကလေၚ်ဒှ်ကောန်ဒေဝတဴတြုံမွဲဘဝပၠန်ရောၚ်။

ကလေၚ်ပံၚ်အုပ်သရုပ်ထောံလၟိဟ်ဘဝကဵုလၟေၚ်ဘဝမ္ဂး။

(၁) ဒှ်ကောန်တြုံဓမာတ်ထဝ် ပ္ဍဲဍုၚ်ရာဇာဂြိုဟ်။

(၂) ဒှ်ကောန်တြုံသေဋ္ဌဳပ္ဍဲဍုၚ်ကောသမ္ဗဳ။

(၃) ကတဵုဒှ်ပ္ဍဲနရက်ရောရုဝ။

(၄) ကတဵုဒှ်ဗ္ၜေံကၟက်။

(၅) ကတဵုဒှ်ကၞုဲကၟက်။

(၆) ကတဵုဒှ်ဂၠဴကၟက်။

(၇) ကတဵုဒှ်မၞိဟ်နပုံခမၞုဲ။

(၈−၉−၁၀−၁၁) ဒှ်ဂၞကျာ်သၟိၚ်အိန်ပန်ဘဝ။

(၁၂) ဒှ်ဂၞကျာ်ကောန်ဒေဝတဴဇဝန။

(၁၃) ဒှ်ကောန်ဝုတ်သၟိၚ်အၚ်္ဂတိ။

(၁၄) ဒှ်ကောန်ဒေဝတဴတြုံပ္ဍဲသွဝ်တာဝတိံ။

(အနာဂတ်ထပှ်ဘဝ) (ပံၚ်ဖအိုတ် စှ်ပန်ဘဝရ။ ဣဝွံ ကၠုၚ်နူနာရဒဇာတ်တေံရောၚ်။

ၜိုန်ရကတဵုဒှ်တြုံပြဲပြဲတဲသၠုၚ်သၠုၚ် ပတံကၠုၚ်ပါရမဳမွဲလက်ကဝ်ကီုလေဝ်၊ ဟိုတ်နူကာမေသုမိစ္ဆာစာရကံ ကၠောန်ခၞံဒးလဝ်ကၠာကၠာတေံ ဗၞတ်မွဲဘဝဓဝ်ဂှ်ရ− ချိုတ်အာစိုပ်နရက်ဒးစိဂၠက်ဒၟံၚ်လံလတုဲ ဗၠးနူနရက်ပၠန်ရ− ဆၜိုတ်ဝိပက်မသၟေဟ်သှ်ေၜက်ဒၟံၚ်ဂှ် ဍေံကလေၚ်ကဵုဖဵုမဒးကတဵုဒှ်ပ္ဍဲဘဝယုတ်ယုတ်သဝ်သဝ်မာန်ဏီဂှ် ထေက်ကဵုဒးစွံသတိဗွဲမဇြိုဟ်နက်ခိုဟ်သန်ရ၊ ဗက်မိပ်သိပ်ဂၠိပ်ထုဲထံၚ် ကဵုပွံၚ်ကောန်ဇာတ်ညးလေဝ် ဟဂပ်ဝ်လးလးရ၊ ဗက်မိပ်ဒုၚ်စသိုၚ်အာရီုကာမဂုဏ်ပ္ဍဲကောန်ဗြဴညးတၞဟ် မၞုံကဵုတၠလေဝ် ဟဂပ်ဝ်သ္ပလးလးရ၊ ဖေက်ကဵုဒးဝေၚ်ဖျေၚ်ကၠေံမုက် ဖျေၚ်ကၠေံမတ် နူပွမကၠတ်ဝဵုကောန်ဗြဴညးမၞုံကဵုတၠခိုဟ်သန်ရောၚ်။

မၞိဟ်တၠပါရမဳတဲကြံၚ်ကြံၚ် ညံၚ်ရဴလၟောဝ်ထေရ်အာနန် ပ္ဍဲဘဝလက်ကရဴ စဴနိဗ္ဗာန်ဖိုဟ်ဂှ်၊ ဟိုတ်နူရဲပွံၚ်ဟွံခိုဟ် မိတ်သဟာဲဏာကဵုအပါဲမာန် ဒးဆာန်ညးသ္ကံ ဒးပံၚ်ဖက်ဆက်ဆောံညးသ္ကံဂှ်ရ− ကလောန်ပြဝပလီုကောန်ဇာတ်သမ္ဘာညးဂှ်လေဝ် ပတုဲဒးလောဲလောဲရ၊ အတိုၚ်ကံဇကုမကၠောန်လဝ်ဂှ်ဟေၚ် ကလေၚ်ကဵုဖဵုလောဲလောဲပၠန်ရ၊ ရဲပါရမအၜတ်ၜတ် သတ်မၞိဟ်မပြောံဗီုပိုဲလၟုဟ်ဝွံကီု၊ ရဲဗစာရဏာအောန်အောန် ညာဏ်ပညာဍိုန်ဍိုန်လျလျတံဂှ်ကီု စွံသတိဇၞော်ဇၞော်တုဲ ဝေါၚ်ပါဲကၠေံဒ္ဂေတ်ကာမေသုမိစ္ဆာစာရ စဵုကဵုလ္အိတ်လမျီုအိုတ်ညိ။

ဆၜိုတ်ပွံၚ်ဇကုမွဲဟေၚ် ထုဲသၞဴသိပ်ဂၠိပ်တုဲ ပရေပရံၚ်ကၠေံပၟိက်ကိလေသ ကာမတဏှာကဵုဂွံမာန်ညိ၊ ပၟိက်စိုတ်ဂၞပ်စိုတ်ဝါသနာတဲဍိုန်ဍိုန်ပရေံပရေံပရုတ်ပရုတ် ယုတ်ယုတ်မာမာပပ်ပပ်ပဳပဳ ဟဳဇွောဝ်သှ်ေၜက်ဆက်ဆေန်ပါကၠုၚ် လုကဴမွဲပွိုၚ်ခရိုၚ်သံသာဂှ် ဝေၚ်ပါဲဂစိုတ်သီဖအိုတ်ကၠေံ နကဵုနဲကဲဍိုန်ဍိုန်ဍောတ်ဍောတ် ၜတ်ၜတ်တကတ်တကတ် ဟွံဓာန်ဂှ်လေဝ်ကဵုဒှ်ကၠာရ၊ ညံၚ်ဂွံဟုဲနှဴပံၚ်ဖက်ဆက်ဆောံဒးကဵုပွံၚ်သမ္ဘာသ္ဍိုက်ဆာန်တၠသ္ၚိမပြဲ မခိုဟ်ဍိုဟ်ကေတ်ပ္ဍဲလိုက် ပရလိုက်လၟုဟ်ဂတ ၜါပြကာဂှ် စွံသတိထေက်ကြိုက်ကွေံကွေံရောၚ်၊ ဟိုတ်ဂှ်ရ− ဗက်အလိုက်ရာဂတဏှာ လုတ်မှာအာတုဲ ညံၚ်ရဴလၟောဝ်ထေရ်အာနန် ဒးဒုၚ်နရက်လံလဂၠိၚ်သ္ၚောဲကီု, ဒးဒှ်ဘဝမၞိဟ်ဗြဴဂၠိုၚ်ဂၠၚ်ကီု, ဗွဲကြဴတဲဟေၚ် ကလိဂွံဘဝမၞိဟ်တြုံကီု သီုကဵုဖေက်ဂၟံက်ခိုဟ်ဂှ် ကဵုကၠိုဟ်ဒုဟ်ပလီုကောန်ဇာတ်သမ္ဘာတၠသ္ၚိညးအိုတ်ညိ။