(၁) ဘဂဝတာ၊ မိန်− ကျာ်တြဲပြဲဝိသေသတၠပိုန်တြဴပြကာ။ ဓမ္မော၊ န်− ဓဝ်စှ်သာ်။ သွာက္ခာတော၊ စိုန်− ဂပ်ဝ်တွံလဝ်ဒးရး၊ ဗၠးဘယ်အပါယ်ပန်၊ ခိုဟ်သန်ကွေံကွေံရ။
သွက်ဂွံတီအဓိပ္ပါယ် ။ ဂုဏ် “သွာက္ခာတ” မ္ဂးဂှ် − စၞောန်ထ္ၜးအရထဂပ်ဝ်တွံလဝ်ဗွဲမဒးရးရ။ [သွက္ခာတ − သု − အက္ခာတ၊ သု− ဗွဲမဒးရး ၊ အက္ခာတ − ဂပ်ဝ်တွံလဝ်။] ဓဝ်စှ်သာ်မ္ဂးဂှ် မဂ်ပန်, ဖဵုပန်, နိဗ္ဗာန်, ပိဋကတ်ပိမတွံဂးဓမ္မက္ခန္ဓ− ဒ္စါံလက်ကဵုပန်လ္ၚီ။ ဣဝွံ ဓဝ်စှ်သာ် စှ်ပြကာအပါအံက်ကျာ်ဂန် ဂပ်ဝ်တွံစွံပ္တန်လဝ်ဗွဲမဒးရးရောၚ်။
(၁) မဂ်ပန် ဖဵုပန်
(၁) သောတာပတ္တိမဂ် ။ (၁) သောတာပတ္တိဖဵု ။
(၂) သကဒါဂါမိမဂ် ။ (၂) သကဒါဂါမိဖဵု ။
(၃) အနာဂါမိမဂ် ။ (၃) အနာဂါမိဖဵု ။
(၄) အရဟတ္တမဂ် ။ (၄) အရဟတ္တဖဵု ။
ဓဝ်မဍိုက်ပေၚ်ကဵုဂုဏ်ဂမၠိုၚ် အတိုၚ်မဟီုကၠုၚ်တုဲဝွံကီု ဓဝ်မစၞောန်ထ္ၜးကဵုဂတဏံကီု၊ ဓဝ်မဂ်, ဓဝ်ဖဵု, ဓဝ်နိဗ္ဗာန်. မွဲဟာန်ကေုာံပိဋကတ်ပိ ပါဠိပါၚ်ကျာ်တြဲ မဂပ်ဝ်တွံလဝ်မဆက်ဆောံကေုာံအဋ္ဌကထာတံဂှ် မဒှ်တဝှ်ကျာ်ဟေၚ် စၟတ်သမ္တီလဝ်ညိ။
လိက်ပတ်သၠရိုတ်သၠတာ ပြကိုဟ်ကၞပ်တံဂှ် ဒှ်တိုက်ဓဝ် “ဓမ္မဘဏ္ဍာဂါရိက” ပစၟတ်သမ္တီလဝ်ဓဝ်တံဂှ်ရောၚ်၊ ပူဂဵုမဖျေံပတိုန်တီလေပ်ကေတ်ဓဝ်တံဂှ် − တီကၠိုဟ်လိက်ကၞပ်ပိဋကတ်ပိတံဂှ် − ဒှ်ပၟၚ်တိုက်မမၚ်မွဲလဝ်တိုက်ဓဝ် − ဓမ္မဘဏ္ဍဂါရိက − ဂှ်ရောၚ်။
ဓဝ်ကျာ်တံဂှ် − ၁။ ဆာဲတံမတွံဂး ပွမဂွံကလၚ်ပၚ်မှိၚ်ကီု ။
၂။ ဆာဲဒေါဝ်မတွံဂး ပွမဂွံဒ္ဂေတ်လ္ၚတ်မှတ်လွဳပရာပ္တိတ်ဒြဟတ်ကီု ။
၃။ ဆာဲကၞောတ်မတွံဂး ပွမကလိဂွံတသိုက်လောကုတ္တဵုမဂ်ဖဵုနိဗ္ဗာန် မဒှ်အရာလလံပလိုတ်ဖအိုတ်ကၠေံဒဒိုက်အိုတ်သီုရ။
တဝှ်ဓဝ်မပြဲဓဝ်ကျာ်တြဲသၟိၚ်ခၟဳဂှ် ဍိုက်ပေၚ်တဴကေုာံဂုဏ်ဆာဲတံဒေါဝ်ကၞောတ်ပိပြကာတုဲ ညးမဒ္ဂေတ်လဝ်တုဲတုဲတံဂှ် သ္ဂောံတီညာတ်ကေတ်ဓဝ်တၟေၚ်တၟဟ်မာန်ရ၊ ၜိုန်ရဟွံဒ္ဂေတ်, ဒ္ဂေတ်ဟွံမာန်ကီုလေဝ် ဆၜိုတ်အယာံမာန်သ္ဂောံမိၚ်ဒး ကလၚ်ပၚ်မှိၚ်ဒးဂှ် ပၟတ်ဂအုံဂမ္တဴကိလေသ မဂဵုဍာဲဂြၚ်တူူလၚ်ဒၟံၚ်တံဂှ် (ပၟတ်ကိလေသတူတူတၠာဲတၠာဲ ဍာဲဍာဲဂြၚ်ဂြၚ်လၚ်လၚ်ဂဵုဂဵုဒၟံၚ်တံဂှ်) လလံပလိုတ်ဖအိုတ်ကဵုမာန်ရောၚ်။ “လလံပၠိုတ်အိုတ်အာမာန်”ဂှ် ဒှ်ဖဵုဓဝ်ကျာ်ဝွံရောၚ် ။
(ပၟတ်ကိလေသစှ်) ၁ ။ လောဘ − ပၟတ်နွံပၟိက်သၟိက်ဂွံမွဲမွဲသာ် ။
၂ ။ ဒေါသ − ပၟတ်စိုတ်, မတ်ပလေဲထေဲပၞောတ်လောန် ။
၃ ။ မောဟ − ပၟတ်ဟွံဍိုက်ကေက် ဒိုဟ်ဓီု − ဂၠုဓီုတုပ်ဗီုဗ္တံ ။
၄ ။ မာ − ပၟတ်စိုတ်မသၠုၚ် − ဒုၚ်ပ္တိုန်လဝ်မာန။ (ဆီသၠုၚ်ဘဝၚ်သၠုၚ်)
၅ ။ ဒိဋ္ဌိ − ပၟတ်လညာတ်ဗၠေတ်ကွေတ်ပၠန်ဂတး ။
၆ ။ ဝိစိကိစ္ဆာ − ပၟတ်စိုတ်သၚ်္ကာသၠေဟ်ပၟာပ္ဍဲကျာ်ဓဝ်သၚ်, ပ္ဍဲကံ−ဖဵုကံ ။
၇ ။ တိန − ပၟတ်အိုပ်အုဲဒကုဲလၞုဟ်မိက်ဂွံတိက်ဇၞော်ကဵုဒြဟတ် ။
၈ ။ ဥဒ္ဓစ္စ − ပၟတ်စိုတ်ကလှ်လဖှ်ပြးဆာဲဟွံတန်ကြန်တေဝ်ကြေဝ် ။
၉ ။ အဟိရိက − ပၟတ်ဟဂွံဂွပါပ်နူအကုသဵုဒုစရိုတ် ။
၁၀ ။ အနောတ္တပ္ပ − ပၟတ်ဟဂွံဖေက်လကိုတ်ပါပ်နူအကုသဵုဒုစရိုတ် ။
ပၟတ်ကိလေသစှ်ဖဴ ကတဴကတာန် (ဂမ္တဴဂမ္တာန်) ဂဵုသၠာန်ဒၟံၚ်လၟိုန်ကာလဂှ် ၜိုန်ရစံၚ်ပၠေၚ်ဂဵုဂြောတ်ဍာဲဂြၚ်ဒၟံၚ်ပ္ဍဲသန္ထာန်ပိုဲသတ်ပုထုဇန်ဂမၠိုၚ် ဂလိုၚ်လဵုတူတူကီုလေဝ် ဟဂွံတီဟွံဂွံသတိဏီရ၊ လဆောဝ်လဆောဝ် ဂမ္တဴဂမ္တာန်ကွေံကွေံကြာန်ကြာန်တုဲ “သြ − ပၟတ်ဏံသ္ကာတ်မြဟ်ဒၟံၚ်ညံၚ်ပုၚ်ကၞံ − ကြံကွေံကွေံရောၚ်သွံ” ရဴဝွံ တီကေတ်ဗွဲမကၠးဖ္ဍးမာန်ကီုရ။
ဗီုပၟတ်လောဘတူတၟာဲ ။ ပရူပရာဝွံ ကတဵုဒှ်ပ္ဍဲတ္ကံသိၚ်ဃဵုတေံရ၊ ခၟဳဗြဴကၠာကၠာတေံ အာသ္ပဥပေါယ်(ပုဟ်)ပ္ဍဲသီတုဲ ခၟဳဗြဴမွဲဇကုဂှ် ညာတ်ဒးရုပ်သၟတ်ဗၠာဲညးမချူစွံလဝ်ပ္ဍဲပါၚ်တြၚ်သီရ၊ ဗဵုသ္ၚဳဂၟဳကျောဝ်ဒၟံၚ်တုဲ ခက်ဗာန်စောဲစပ်ဒးကဵုပ္ၚပ်စိုတ်ဇကု ဒးဂၞပ်ကွေံကွေံရ၊ ဟိုတ်နူပၟတ်ရာဂ − လောဘလုပ်ဂွံတူတၠာဲဍာဲဂြၚ်ဒၟံၚ်ဂှ်ရ− ၜိုန်ရခၟဳဗြဴတၞဟ်စဴအာအိုတ်ကီုလေဝ် စဴဟွံမာန် ချဳအာနူဒၞာဲဂှ်ဟွံမာန် ဗဵုသ္ၚဳဂၟဳကျောဝ်ဒမံၚ်ကၠေဲကၠေဲ ပလေဲဒၟံၚ်ပ္ဍဲမတ်ဇကုဇကုရ။
ဃောမသှ်ေၜက်ဒၟံၚ်ညးမွဲ, ဃောဲစောဲဃောစပ်, ဃောဒးဂၞပ်စိုတ်ဂှ် ပ္ဍဲအခါကာလသ္ကံရဲဇကုကၠုၚ်ကော် သီုကဵုမဒတဴဗဵုဒၟံၚ်ရုပ်ဂှ်ဟေၚ် မဒးချိုတ်အိုတ်ဇဳဝိတရ၊ ကာလရပ်တံၚ်ကေတ်တဲကော်ဏာဂှ် လမျီုဟွံမွဲ တုပ်နဲတၞံဆုဒေါံ, လောတ်စှ်ေအာပ္ဍဲဒၞာဲဂှ်တုဲ ဒဒှ်ချိုတ်အာရ သ္ဂောံတီကေတ်မာန်ရောၚ်။ ပၟတ်လောဘဝွံ ဂလိုၚ်ကဵုဂမ္တဴဂမ္တာန်ဂဵုသၠာန်ဒၟံၚ်ဂှ်ရော ချပ်ဗ္စာရဏာရံၚ်အိုတ်ညိ။
သ္ပအစာံကဵုခၟဳဗြဴ ညာတ်ဒးရုပ်သၟတ်ဗၠာဲ ချူသၜိုန်ကၠောန်စွံလဝ်ပ္ဍဲပါၚ်တြၚ်သီုဂှ်တုဲ ဒးစုတိပြံၚ်ဘဝလံက်ဒတဴ ဒးစဴအာနကဵုပၟတ်လောဘ မိက်ဂွံဂွံဂှ်ရ၊ ချပ်ဗ္စာရဏာစိုပ်အာတုဲ သိၚ်သာဗွဲမလောန်ရောၚ်သေၚ်ဟာ၊ ပၟတ်လောဘဂှ်လေဝ် လောဘခမဳ, လောဘသေဋ္ဌဳ, လောဘသမ္ၚေဟ်, လောဘဗၞး, လောဘသၟိၚ်, လောဘညးဒိုက်ဂတ်, လောဘဒေဝတဴ, လောဘတိရစ္ဆာန်ဒှ်တံ၊ နွံဒၟံၚ်အနန္တအနန္တံ တူဒၟံၚ်ကရိုက်ညးကရိုက်အဲတုဲ ညံၚ်ဂွံအောန်ဂှ် ဒးဖအောန်၊ အောန်စှ်ေညံၚ်ဂွံအိုတ် ဒးဖအိုတ်ကွေံကွေံရောၚ်− ဖအိုတ်ကွေံကွေံညိ ဂကူရာမညတံ ။
ဗီုပၟတ်ဒေါသတူတၠာဲ။ ပ္ဍဲဍုၚ်သွဝ်တေံဂှ် ဒေဝတဴတြုံဂမၠိုၚ် တွဳဗွိုၚ်ကေတ်အဆေဝ်သွဝ်ဇကုတုဲ တိတ်ဝေၚ်သ္ပမိပ်ကၠဴပ္ကဴဥဒျာန်အိုတ်ရ၊ ဒးကာလမွဲဝါ ဒေဝတဴတြုံမွဲဂှ် သီုကဵုတွဳဝါရဇကု ပ္ဍဲကိုဂွံကွဳစက္ကရတ်တုဲ ဃောမဂၠောဲဇတ်တိတ်အာကၠံပ္ကဴဥဒျာန် ဒှ်ကယျာန်ဓဝါတ်ကဵုဒေဝတဴတြုံတၞဟ်သ္အာၚ်မွဲရ၊ ဒေဝတဴတြုံဗက်ကၠုၚ်လက်ကရဴဂှ် ညာတ်ဒေဝတဴဂတဂှ်တုဲ နကဵုစိုတ်ဣဿဟေၚ် ဟဟ်ဗိုက်ကၠဟ်ဏာအရေဝ် ဟီုတိုန်သာ်ဏံရ။
“ဟိဟ် − ဒေဝတဴအာဂတတေံဂှ် ကဵုပိုန်ဟာန်ဇကုတၟာလဵုဟွံသေၚ် ထေၚ်ဂးဇၞော်နူညးတၞဟ် ရပ်လံၚ်ဒှ်ကွေံကွေံရောၚ်သွံ”ဂးတုဲ ဒေဝတဴအာဂတဂှ် မိၚ်ဒးရမျှာၚ်ဣဿဗျံက်ဂရိုဟ် ဂြိုဟ်ချဳဂတတ်ဇြဟတ်ဒေါသကတဵုဒှ်တိုန်ရ၊ ဃောဂှ် ညးမွဲပါၚ်အဲမွဲပါၚ် ရမျှာၚ်ကေတ်ဇၞး ဒးဟီုအကြာဍာန် ကယျာန်ဓဝါတ်ကေုာံရေၚ်သ္ကံအိုတ်ရ၊ ဒေဝတဴဗြဴအဆေဝ်သွဝ်ဂမၠိုၚ် အာတ်ပါန်ဒုၚ်ဂုန်လေဝ် ဟွံဂွံရ။
ဃောမဟီုဒၟံၚ်ဂၠံၚ်ကယျာန်ညးသ္ကံ ဟီုဂးဂတက်ဂတုန်ဒၟံၚ်ဂှ်ဟေၚ် ခန္ဓကာယဒေဝတဴတံ ဟိုတ်နူဍိုက်ဍောတ်ဇိပ်ဂၠိပ်ဂှ်မွဲသာ်၊ ဟိုတ်နူပၟတ်ပၞာၚ်ဒေါသဂဵုဍာဲလောန်ဂှ်မွဲသာ်၊ ဟိုတ်နူဟိုတ်ၜါသာ်ဝွံ အဃောဂှ် ဒးပြံၚ်အာဘဝကၠေံအာနူဒၞာဲဂှ်ရောၚ် ။
[ပၟတ်ဂမၠိုၚ် မတွံဂးသောက, ပွမစံၚ်တူပူဆာ၊ ပရိဒေဝ, ပွမနရိုအ်ယာံ၊ ဒက္ခ, ပွမဒှ်ဒဒိုက်ကာယ၊ ဒေါမနဿ, ပွမဒှ်ဒဒိုက်စိုတ်၊ ဥပါယာသ, ပွမဒှ်လၟောၚ်ဍောၚ်ၜိုတ်, ဂအိက်−ပၠော၊ ကတဴကတာန်ဗွဲမလောန် (သဓဵုသမ္ၚဟ်)တံဂှ်လေဝ် လုပ်လၟိဟ်ပ္ဍဲပၟတ်ဒေါသဖအိုတ်ရောၚ်။]
ပၟတ်ဂမၠိုၚ်တံဂှ် စံၚ်ဗဂဵု − ဂဵုဒၟဴၚ်ယျဴယျဴ ကတဴကတာန်သၠာန်ဒၟံၚ်အလုံဇကုညးအဲ မွဲတ္ၚဲဟွံပိုတ် ပလိုတ်ကၠေံဟွံမာန်တုဲ ဒးဂဗဒဒိုက်စိုတ်ကာယဇၞော်ဇၞော် ဒးဖေက်ဂၟော် ဖေက်ဂၟံက်ခိုဟ်ကွေံကွေံရောၚ်။
ပ္ဍဲလိုက်လောကဋ္ဌနဘုံမၞိဟ်ပိုဲဏံလေဝ် ဟိုတ်နူမပ္တံဂြပ်ရတ်လမျီု လီုလာ်စာ်ထောၚ်ယောၚ်ယာအာ ဒးဂဗကျာလောကဓဝ်မမိက်ကဵုမွဲမွဲတုဲ ပၟဝ်ဒေါသဂမၠိုၚ် မပ္တံသောကပရိဒေဝတံဂှ် ဗိုၚ်ကြာပ်တူတၠာဲဂဵုဍာဲဒၟံၚ် ဟဂွံပိုတ်သ္ကုတ်ရ၊ ဟိုတ်နူအသိၚ်ပၟတ်ဒေါသဂဵုသၠံၚ်စံၚ်ပၠေၚ်ဒၟံၚ်လၟိုန်စိ က္တဵုဒှ်ဓဝ်စံၚ်တူဂၠိုၚ်ကဵုအခိုက်စိုတ်ဂၠိုက်သ္ၚောံဇြာဲဇြေဟ်စဟွံစှ်ေဟွံစှ်ေတိက်ဟွံသၠိၚ် ဂွိၚ်အာဂွံၚ်ကၠုၚ် ၚုၚ်ၚဇြဟောံ ဒၟံၚ်ဟွံတန်ဖန်ဟွံမာန်ကတဵုဒှ်ကြာန်ကြာန်တုဲ မဒးဂစိုတ်ထောံဇကုဂှ်လေဝ် နွံတဴဗွဲမဂၠိုၚ်ဂၠၚ်ရ။
ပၟတ်ကိလေသဂမၠိုၚ် အတိုၚ်မဟီုကၠုၚ်တုဲဝွံဂှ် အခါကာလဍေံကာလဍေံကတဵုဒှ်တိုန်မ္ဂး ပါဲနူပရေၚ်ဓဝ်ကျာ်မွဲ နနဲလဵုလေဝ် သွက်ဂွံပရေပရံၚ်ကၠေံဍေံဟွံမွဲသက်သက်ရ၊ ဒးပရေံပရံၚ်, ဒးကဵုဂဥုဲခၠေဝ်, ဒးပလေဝ်စိုတ်နကဵုတဝှ်ဓဝ်ကျာ်ဟေၚ်ရဒှ်တုဲ ဆၜိုတ်အယာံမာတ်ဂွံမိၚ်ဓဝ် ဂွံကလၚ်ဓဝ်ကျာ်ဂှ် ပၟတ်ကိလေသထေက်ကဵုပၠိုတ်အာမာန်၊ စိုတ်ကြာန်ကြာန် ထေက်ကဵုခိုဟ်ကၠုၚ်မာန်၊ စိုတ်ကၠိကၠိပပ်ပပ် ထေက်ကဵုသ္အးဇ္ၚးကၠုၚ်မာန်၊ (ဗွဲတဒၚ်္ဂပဟာန်) ပါဲထောံမွဲချိုန်ခဏမာန်ဂှ် သဒးဒှ်ဍာံစၟတ်ရ၊ ဂလာန်ဓဝ်ဝွံ ဆၜိုတ်ဂွံမိၚ်ကလၚ် ဂွံမိၚ်ဓဝ်ဂွံကလၚ်ဓဝ်ဂှ် ဒှ်ဆာဲတံခိုဟ်တံမ္ဂးယၟုရောၚ် ။
ညးလ္ၚဵုတံဂှ် ယာံခါရဒးဒ္ဂေတ်လ္ၚတ်အတိုၚ်တဝှ်ဓဝ်မ္ဂး စိုတ်က္ဍန်ဂြက်, ဒၟံၚ်က္ဍန်ဂြက်၊ မံၚ်စံၚ်က္ဍန်ဂြက်ဂးသာ်ဂှ်တုဲ ကတဵုဒဒိုက်ဗွဲစၟတ်ဟေၚ် ထေၚ်ကေတ်ပၠန်ရ၊ ယာံခါရဂါံဗက်မိပ်လပါ်အာရီုလောကဳဂၠိုၚ်ဇဳဂၠိုၚ်သာ် မစှ်ေစးကဵုပၟိက်ကျာ်ဂှ်မ္ဂး − ဒၟံၚ်သၠဲလး, မံၚ်စံၚ်လှဲလးမိပ်ဇြိပ်ကွေံကွေံရောၚ် ရဴသာ်ဝွံ ပၠောပ်ဒးစိုတ်ဗၠေတ်ဗၠေၚ် ဒစေၚ်ယောၚ်ယာမှာရာအာတုဲ ဒၟံၚ်ထောံသၟးသၟးလေဝ်နွံဗဝ်ဏီရ။
အတိုၚ်လညာတ်ဒစေၚ်အထေၚ်မၞိဟ်တဲဍိုန်တံဂှ် ပ္ဍဲကာလဗ္တံ ယဝ်ရပ္ဍေန် ဍေန်စွံလဝ်ပၟတ်မ္ဂး တုပ်တဴညံၚ်ရဴစၟအခြ ညာတ်ဒးလျးပၟတ်ကီုရ၊ ညာတ်ဒးလျးပၟတ်တုဲ “ထေၚ်ဂးထဝ် ထေၚ်ဂးလျးဒဵုထဝ်” ပဝ်လုပ်ကၠုၚ်လပိုက်ဒုၚ်ကဵုဇကုဇကုကီုရ၊ ဗွဲစၟတ်ဟီုမ္ဂးဂှ် အတိုၚ်လညာတ်အထေၚ်မၞိဟ်တဲဍိုန်တံဂှ်ဟွံသေၚ် ဟိုတ်နူဗက်မိပ်ကဵုအာရီုလောကဳဂၠိုၚ်ဇဳဂၠိုၚ်သာ် မစှ်ေစးကဵုပၟိက်ကျာ်ဂှ်ရ− ပ္ဍဲဘဝလၟုဟ်ဟေၚ် ဂဗဒုဟ်ဂၠိုၚ်လောန် အောန်ကဵုပိုန်ဍိုန်ကဵုစရာဲ မဒးလာဲလေၚ်အာပြဟ် ဒှ်မၞိဟ်တဲဍိုန်ဍိုန် ကွိုန်ကျာ်သြဳပၠိုတ်စှ်ေတုဲ အာစိုပ်အဆံၚ်ဘဝမၞိဟ်သဝ်သဝ်တံဂှ်လေဝ် သ္ဂောံဆဵုညာတ်ဒၟံၚ်အိုတ်ရ။
မၞိဟ်လဵုမွဲဟွံဟီု ယဝ်ရဂွံဒ္ဂေတ်လ္ၚတ်ဓဝ်အတိုၚ်ပၟိက်ကျာ်မ္ဂး ဗၠးဒဒိုက်လိုက်ပလိုက်ၜါပကာတုဲ ဇိုန်ကဵုတသိုက်အတိုၚ်ပၟိက်စိုတ်ဨကန် ဂွံပ္တန်အာဘဝဇကုဗွဲတသိုက်မာန်ရ၊ မၞိဟ်မံၚ်ပ္ဍဲဍုၚ်ကွာန်သ္ၚိဋ္ဌာန်တံဂှ် အလုံမၞိဟ်ဖအိုတ်ကီု ကေုာံကောန်ဇာတ်ပ္ဍဲသ္ၚိဋ္ဌာန်ဇကုကီု ယဝ်ရသဒှ်မၞိဟ်တဲခိုဟ် မၞိဟ်သပ္ပရိုဟ်ဖအိုတ်မ္ဂး ဂလိုၚ်လဵုဒှ်တသိုက်ဂှ်ရော ချပ်ကေတ်ဒးကီုရ၊ တသိုက်လ္တတသိုက် ဍိုက်ပေၚ်ကဵုပၟိက်စိုတ်ဇကုဖအိုတ်ရောၚ်။
ပ္ဍဲအရာဆက်စပ်ကဵုပွံၚ်သ္ၚိဋ္ဌာန်တံဂှ်− လ္တူနူဂှ် ယဝ်ရစိုတ်ခိုဟ်ဒ္ဂေတ်ခိုဟ် တုပ်သၟဟ်ဒှ်ညးဗပေၚ်ပါရမဳမွဲစွံမ္ဂး ဗက်ဂၠံၚ်တြဴမိပ်လဟိၚ်လပါ်ဍောၚ်ဓဝ်ကျာ်သဗ္ဗညုတုဲ ဂွံဒၟံၚ်အာၜိုဟ်ၜိုဟ်သိုဟ်သိုဟ်မွဲစွံပၠန်ရ၊ မွဲပွံၚ်သ္ၚိဋ္ဌာန်ဒ္ဂေတ်ခိုဟ်စိုတ်စရိုတ်ခိုဟ် ခိုဟ်သီုၜါလပါ်ပၠန်မ္ဂး ဂလိုၚ်လဵုဒှ်တသိုက်အိုတ်ရောဟီုဂှ် ချပ်ဗ္စာဆိၚ်ဆတော်ခယျကေတ်တုဲ ပၠောပ်စိုတ်မၠာဲသ္ၚဳရံၚ်အာအိုတ်ညိ၊ ဟိုတ်ဒှ်သာ်ဂှ်ရ − ဂလာန်ဆက်စပ်ကဵုပရေၚ်ပွံၚ်သ္ၚိဋ္ဌာန်ကိစ္စမၞိဟ်ဍုၚ်ကွာန်ဂှ် ဒးစၞောန်ထ္ၜးကဵုတဝှ်ကျာ်မွဲဒၞာဲခိုဟ်ရောၚ် ။
သွက်ဂွံပၠာပ်စိုတ်ပၟဝ်ဂုဏ်ဓဝ်သွာက္ခာတ
သွာက္ခာတော။ ဓဝ်လောကုတ္တဵု, မဂ်ဖဵုနိဗ္ဗာန်, မွဲဟာန်ပရိယတ်, ပိဋကတ်ဥဿုံ, အလုံဓဝ်စှ်, တွံလဝ်ခိုဟ်ကွေံ, ဒးရးလောန်သတိုတ်, ဆၜိုတ်ဂွံကလၚ်, ပၚ်မှိၚ်ဗီုကဝလေဝ်၊ ကိလေသလ္ၚီမသုန်ကၠံ, မွဲဟွံဂံၚ်ကြံ, ဒးလလံဒၟံၚ်, မွဲဟွံဂံၚ်ခ္ဍဳ, မွဲပချဳဟွံမာန်, မွဲဂါန်တိုန်ဟွံဒှ်. မွဲစံၚ်ဟွံသၟဟ်ရထ, ဆၜိုတ်ဒ္ဂေတ်ဗက်တဴ, တသိုက်ဟောကၠံၚ်, သ္ဂောံဒၟံၚ်အာဗွဲတသိုက်ဓနေတ်, ဒ္ဂေတ်တုဲအာသ္ဂောံဆိုက်, တသိုက်နိဗ္ဗာန်ဟေၚ်။
သြန် − တၟေၚ်နူညးတၞဟ်, တၟေၚ်တၟဟ်လောန်သတိုတ်, တၟေၚ်လောန်အိုတ်အာတၞုၚ်, သြ− လှုၚ်လတူလှုၚ်, ဒှ်ဒၟံၚ်တၞုၚ်လ္တူတၞောတ်, သြ− ဒှ်ဒၟံၚ်အထောတ်အဖျာ, စက္ကဝါလေဝ်ဥဿုံ, ဆနွံလေဝ်သီုဖအိုတ်, သြ− ဒှ်ဒၟံၚ်ညံၚ်ၝောံကိုတ်(ဋ်) အိုတ်မၞိဟ်ဒေဝတဴ, ဗြမှဴလေဝ်ဥဿုံ, ဆနွံသီုဖအိုတ်ဟေၚ် − အိုဟ် − ဟွံကေၚ်ဒှ်ဒှ်တဴ, သြ− မၞုံကဵုအသဝ်ပာထော်, ဇၞော်ကဵုတၚ်ဃဵု, ဒဵုကဵုထိုၚ်သးဟွံအိုတ်ဏီကွေံရောၚ်သွံ။ (နဲအ္စာတၠမှာထေရ်စန္ဒောဘာသ ဘာဓါတ်ကျာ် ကွာန်ကၟာဝက်)