လိက်လလောၚ်တြးပိတၞး

နွံအနာဲမွဲတိုန်စိုပ်အာဍုၚ်သွဝ်တေံဗက် ညးတေံ

အောန်စိုတ်တုဲ လုပ်ပ္တီသၟိၚ်သွဝ်သာ်ဝွံရ၊ ယွံလေဝ်သၟိ

ၚ်သွဝ် - ကၠာဟွံဂွံကော်နၚ်အဲတိုန်ဍုၚ်သွဝ်ဏံဂှ် မုပဟွံကဵုသတိကဵုအဲဂွံတီကီုရော? ကမၠောန်အဲဒးကၠောန်ပ္ဍဲဍုၚ်လိုက်တေံဂှ်လေဝ် နွံတဴတၟာဟလိုၚ်ဏီဏောၚ်၊ လဝါဲဂှ် သၟိၚ်သွဝ်ကလေၚ်ဟီုကဵုအနာဲဂှ်ရ။

ယွံလေဝ်အနာဲ− ပိုဲလဴကဵုမံၚ်သတိကဵုအနာဲနကဵုလိက်တၞးပိတၞးတုဲမံၚ်ယျဏောၚ်၊ မှတှ်ေ အနာဲဟွံဂွံဒုၚ်ကေတ်လိက်လလောၚ်ပိတၞးဂှ်ပုဟ်ဟာ? သၟိၚ်သွဝ်သၟာန်အနာဲဂှ်ရ။

အဲဟွံဂွံဒုၚ်ကေတ်ပုဟ်လိက်လလောၚ်တံဂှ်၊ လဝါဲဂှ် သၟိၚ်သွဝ်ကလေၚ်ဟီုကဵုအနာဲဂှ်ပၠန်ရ။

ယွံလေဝ်အနာဲ− အနာဲဍောၚ်ကွိုၚ်ပြဟ် တုဲတှ်ေ က္ဍုဟ်မၠိကၠုၚ်လောကဏံပုဟ်ဟာ? အဵု...ဣဏံဂှ် ဒှ်လိက်လလောၚ်တြးဂှ်ရဟာ။

တုဲပၠန်− ဇကုဇကောဝ်အနာဲလေဝ်ကွိုၚ်ကွုဲဒကုဲပြဟ် ဂိတေံဂအံၚ်အဏံပုဟ်ဟာ? အဵု...သာ်ဏံဂှ် အဲဂွံဒုၚ်ကေတ်လဝ်တုဲယျ။

တုဲပၠန်ဂှ်− အနာဲက္ဍိုပ်ဘိုၚ်က္ဍိုပ်ဂိဂၞိၚ်ဂိလောဲ မတ်လေဝ်သပါသဗုၚ်ကၠုၚ်ပုဟ်ဟာ? အဵု...ဣဏံဂှ် ဒှ်လိက်လလောၚ်တြးကဵုနၚ်အဲတၞးပိဂှ်ရဟာ၊ ဒးရအနာဲ ဣဏံဂှ် ဒှ်လိက်လလောၚ်တြးပိတၞးတံဂှ်ရ။

အဃောဂှ်ပၠန် အနာဲဂှ်တီကၠးတုဲ အာတ်အခေါၚ်ကဵုဂွံကလေၚ်စှ်ေကၠုၚ်ဍုၚ်လိုက်ဏံ အရာမိက်ဂွံကၠောန်နွံတၞဟ်တၞဟ်တုဲ အာတ်အခေါၚ်ရ၊ ယဝ်လေဝ်သၟိၚ်သွ

ဝ်− ကဵုအဲဂွံစှ်ေအာဍုၚ်မၞိဟ်တေံမွဲသတ္တဟဂွံဂှ် ကေတ်ၚုဟ်မးမူစိရော? လဝါဲဂှ်သၟိၚ်သွဝ်ပစူကဵုလပှော်တဲမွဲတၞုၚ်ရ၊ အဵု...ကေတ်မွဲလ္ၚီတှ်ေ အဲကဵုမာန်လောဲလောဲရ၊ လဝါဲဂှ်သၟိၚ်သွဝ်ဟရိုက်တိုန်က္ဍိုပ်ရ၊ အနာဲဂှ်ခယျသြန်အောန်အာတုဲ၊ ဟဂှ်ဟွံသေၚ်တှ်ေ အဲကဵုမွဲလက်ရ၊ လဝါဲဂှ်ပၠန်သၟိၚ်သွဝ်ဟရိုက်တိုန်က္ဍိုပ်ရ၊ အနာဲဂှ်ခယျသြန်အောန်အာပၠန်တုဲ၊ ဟဂှ်တှ်ေ အဲကဵုမွဲကိုတ် ကဵုအဲစှ်ေအာဍုၚ်မၞိဟ်တေံညိ။

လဝါဲဂှ် သၟိၚ်သွဝ်ဟရိုက်က္ဍိုပ်ပၠန်တုဲ သၟိၚ်သွဝ်ဟီုကဵုအနာဲဂှ်ရ၊ အဲကေတ်ၚုဟ်မးမွဲဒ္ကေဝ် ယဝ်အနာဲနွံတှ်ေကလေၚ်စှ်ေအာဍုၚ်လိုက်ဂွံရ၊ လဝါဲဂှ် ညးတေံဂၠာဲဂၠံက်အကြာထိုၚ်ပဠောအ်ညးတေံဟွံဆဵုတုဲ သၟိၚ်သွဝ်ကလေၚ်သွဟ်ကဵုညးတေံသာ်ဝွံရ။

ယွံလေဝ်အနာဲ သဘာဝမၞိဟ်ချိုတ်အာတုဲ ၜိုတ်ဆမသြန်မွဲဒ္ကေဝ်ရဂှ်လေဝ် ဍေံဟွံပါကၠုၚ်ကဵုဇကုအနာဲပုဟ်၊ ဟိုတ်ဂှ်ရ− ဣဏံရဘဝမၞိဟ်အဃောဂျိုၚ်ဒၟံၚ်ပ္ဍဲဍုၚ်လိုက်မွဲခဏတေံဟေၚ်ဂှ် ၜိုန်ရလောဲသိုက်တိက်လ္တူဗွဝ်ထဝ်သြန်ကီုလေဝ် ကာလဒးစဴရဂှ် မွဲဒကေဝ်ဟွံပါကၠုၚ်ပုဟ်။

ဟိုတ်ဂှ်ရ− အဃောဂျိုၚ်ဒၟံၚ်တေံဂှ် လ္ပမိပ်အရာဖဵုဟွံမွဲတံဂှ်ညိ။ လ္ပမိပ်ကဵုကမၠောန်စဵုကဵုပရေၚ်ထတ်ယုက်လီုအာဂှ်ညိ။ လ္ပမိပ်ကဵုအရက်သုရာစၞစဗ္ၜူဓလူ စဵုကဵုဂကောံအိန်ထံၚ်ပြးဆာဲအာညးသ္ကံဂှ်ညိ။ လ္ပမိပ်ကဵုပွမတ္ၚံက်စၞာဲဣဿလ္တူညးသ္ကံဂှ်ညိ။ လ္ပမိပ်ကဵုပြိုၚ်ပ္ကာန်ညးသ္ကံဂှ်ညိ။ လ္ပမိပ်ကဵုရဲဂၠိုၚ်ပေၚ်ကွာန်တုဲ ရဲဆာန်ပတေဟ်ဂွံရဂှ်−ၜါဟွံမွဲဂှ်ညိ။ လ္ပမိပ်ကဵုဂၠာဲပကောံထဝ်သြန်ဂွံတုပ်ညးဂှ်ညိ၊ နွံဆသုၚ်စောဲသွက်ဘဝတှ်ေတုဲရ။ လ္ပမိပ်ကဵုသိုၚ်သ္ၚိၜါပိထပ်ကဵုညးတၞဟ်ဗဵုတုဲ ဇကုဒုၚ်လဝ်ဂတှ်ပေၚ်ကအ်ဂှ်ညိ။ လ္ပမိပ်ကဵုရာန်ကၠအ်သွဝ်ၜါပိတုဲ စဵုကဵုခန္ဓဏံဂွံကၠုၚ်ယဲဘဲဝေဒနာညိ။

ဟိုတ်ဒှ်ဂှ်တုဲ အဃောဂျိုၚ်မံၚ်တေံ ကပေါတ်ကြိယာပိုန်ဒြပ်ထဝ်သြန်နာနာတံဂှ် ဒှ်ကပေါတ်မွဲချိန်ခဏတုဲ မုပိုဲဏံကေတ်ဏာဟွံဂွံမာန်၊ အရာပိုဲကေတ်ဏာဂွံမာန်ဗွဲစၟတ်ဂှ် "ဒးကၠောန်ကမ်ခိုဟ်" မွဲဟေၚ်အဃောဂျိုၚ်မံၚ်တေံညိ၊ အုပ်နီဂီု။ − #တိုက်ဗှ်လိက်ဝိညာဏ်ထဝ်