လ္ပမၚ်တ္ၚဲခိုဟ်တ္ၚဲပြဲညိ

လ္ပမၚ်တ္ၚဲခိုဟ်တ္ၚဲပြဲညိ −

လ္ပမၚ်တ္ၚဲခိုဟ်တ္ၚဲပြဲညိ − (ဗဟုသုတဗှ်ဝေၚ်လၟေၚ်တ္ၚဲ) − အဲကေၚ်ဗှ်လဝ်လိက်နွံမွဲပိုဒ်ဍောတ်တုဲ ပ္ဍဲပိုဒ်လိက်ညးချူလဝ်ဂှ်တှ်ေ၊ နွံမၞိဟ်တြုံမွဲ မဂဳညးတေံချိုတ်အာတုဲ ညးတေံစံၚ်ဇွဂြဇုတ်မဂဳညးတေံတုဲဒှ်ဟေၚ် ကာလစိုပ်သ္ၚိပဠေဝ်ပလေတ်ကပေါတ်နာနာပ္ဍဲသ္ၚိညးတေံဂှ် ဂွံဆဵုကေတ်ကပေါတ်နွံကဵုၚုဟ်မး မပ္တံဂၞိန်ပဠောအ်, မပ္တံထိုၚ်ကၟာဲတံဂှ် နၚုဟ်မးက္ဍၚ်က္ဍၚ်မရာန်လဝ်ဂှ် သီုဟွံဂွံသုၚ်စောဲဆမွဲအလန် နွံမံၚ်ပ္ဍဲဒူဗဒမ်မဂဳညးတေံ စဵုကဵုဒးချိုတ်အာဂှ်ရ။

အခိၚ်မဂဳညးတေံဟွံဂွံချိုတ်ဏီဂှ်လေဝ် ညးတေံကေၚ်ဟီုလဝ်ကဵုမဂဳညးတေံတွဵုတွဵုဂှ်တှ်ေ "ဗှ်ေရာန်လဝ်ကပေါတ်နွံကဵုၚုဟ်မးတံဏံဂှ် မုပဟွံဂံၚ်သုၚ်စောဲရော"၊ မဂဳညးတေံကလေၚ်ဟီုပၠန်ဂှ် − "တ္ၚဲခိုဟ်တ္ၚဲပြဲ တ္ၚဲမ္ၚဵုပစမွဲမွဲမှသုၚ်စောဲဏောၚ်ဂး"၊ ဆဂး စဵုကဵုတ္ၚဲဏံလေဝ် ကပေါတ်တံဏံဂှ် မဂဳညးတေံဟွံဂွံသုၚ်စောဲဟဂှ်ရ၊ တ္ၚဲလဵုဒှ်တ္ၚဲမ္ၚဵု ဒှ်တ္ၚဲကာခိုဟ်ဂှ်လေဝ် ဟွံတီဟဂှ်ရ။

အဲဂွံဗှ်ကေတ်ဗဟုသုတမွဲပိုဒ်ဍောတ်ဏံတုဲ ကူချပ်ဂွံအာလပါ်ရဲသဟာဲအဲနွံဒၟံၚ်ဗွဲမဂၠိုၚ်တံဂှ် လ္ၚဵုဂှ်ချိုတ်အာလေဝ်နွံ၊ ဆဂး ပ္ဍဲသ္ၚိရဲအဲတံဂှ် ရာန်စွံလဝ်ကပေါတ်နွံကဵုၚုဟ်မးလေဝ်ဂၠိုၚ်၊ လ္ၚဵုဂှ်ပၠန် အရက်နွံကဵုၚုဟ်မးက္ဍၚ်က္ဍၚ်တံဂှ်လေဝ် ဂွံလဝ်ပရၚ်တဲတုဲဟွံဂံၚ်သုၚ် ပစူစွံလဝ်လ္တူခုၚ်ထ္ၜးစကပေါတ် စွံလဝ်သွက်တ္ၚဲခိုဟ်တ္ၚဲပြဲတေံစိုပ်မှဂွံသုၚ်စံက်ဂး။

ပ္ဍဲအကြာကွာန်ရးမန်ပိုဲပၠန်လေဝ် ဂွံဆဵုဂွံမိၚ်မံၚ်ဟဂှ်ဟဂှ်ရ− ညံၚ်ရဴပ္ၚာန်ကျေဝ်ကျေဝ် ဂိုၚ်စွံလဝ်ပ္ဍဲဒူ၊ ယာတ်ၚုဟ်မးက္ဍၚ်က္ဍၚ် ဂိုၚ်စွံဒေပ်လဝ်ပ္ဍဲဒူ သီုဖအိုတ်တံဏံဂှ် အိုတ်ကၞောဝ် လကျာ်ကဵုကၟုဲပြောဲဇွာတံဟေၚ်ရဂွံသုၚ်စောဲမာန်၊ တၠသ္ၚိဇေတ်ဇေတ်ဂှ် ဟွံဂံၚ်သုၚ်စောဲအိုတ်ရ၊ နဲသာ်ဏံ ပ္ဍဲတ္ၚဲဏံနွံမံၚ်ဖိုဟ်ဟာဂှ် ဟွံတီရ။

ရဲအဲနွံမွဲဂှ် ညးတေံလေဝ်သိုက်မံၚ်ၜိုတ်ဓမ္မတာရ၊ အခိၚ်အဲအာဝေၚ်သ္ၚိညးတေံတှ်ေ ညးတေံဟွံသၠးမွဲလှ်ေ ကလောန်ညးတေံလေဝ်ဂၠိုၚ်၊ အခိၚ်အဲကဵုညးတေံတက်ဝေၚ်ကျာညးသ္ကံဂှ်လေဝ် ညးတေံပၠန်မိက်ဂွံအာဝေၚ်ဒၞာဲတေံဒၞာဲဏံ ဗီုအခိၚ်ဒှ်ဗၠာဲဗၠာဲတေံကီု၊ အဲလေဝ်ကသေအ်မံၚ်ညးတေံတွဵုရ၊ ဇူထောံကလောန်ၜိုတ်မွဲအာဒိုတ်တှ်ေ ဒၞာဲပိုဲတံမိက်ဂွံအာဝေၚ်ဂှ် အာဝေၚ်ပြေလၟောၚ်အာရီုစိုတ်ပ္ဍဲဂကောံအိန်ထံၚ်ကီုတှ်ေ ဒှ်ပရဲဒှ်လာပ်ဗဇဴသွက်ခန္ဓဘဝပိုဲဏံရဏောၚ်ရဲ၊ ဆဂး ညးတေံထပ်ဟီုပၠန်ဂှ် "အရေဝ်ရဲဒးမံၚ်ရလေဝ် ဂွံဂွံဇူထောံပၠန်ဂှ် ဂိုဟ်သြန်ပၠန်ရရဲ" ညးတေံဆက်ဟီုပၠန်ဂှ်တှ်ေ "စိုပ်မွဲတ္ၚဲ တ္ၚဲခိုဟ်တ္ၚဲပြဲတှ်ေ ဂွံအာဝေၚ်ပၠန်ရလေဝ်ရဲ"။

ဆက်အာဟွံလအ် နွံမွဲတ္ၚဲ အဲအာဆဵုကဵုရဲအဲတုဲ ဂ္ဇံစသုၚ်မံၚ်အခိုက်မၞိဟ်တြုံမွဲလစုတ်တုဲ ၜိုတ်မသုန်နာဍဳကွက်သဝ်တ္ၚဲဂှ် အဲကေုာံသ္ကံရဲတံပိပန်ဂှ် ဝိုၚ်ဇး ဗီုညးညးစဴအာသ္ၚိအိုတ်ရ၊ ခြာဟွံလအ်ၜိုတ်ဒစိတ်နာဍဳဗ္တံဂှ်ဂှ် မဂဳရဲအဲဆက်နၚ်ဖုၚ်ကဵုအဲတီဂှ် "ရဲအဲချိုတ်အာယျဂး"။ တ္ၚဲဂှ် ပိုဲတံစသုၚ်ညိညတုဲ သ္ၚိညးညးစဴအာ၊ ရဲအဲစိုပ်သ္ၚိတုဲ မတ်စှ်ေအာပ္ဍဲခုၚ်ဒုၚ်ကၟုဲလဒေါဝ်ၝောံသ္ၚိညးတေံတုဲ ၜိုတ်ဒစာံနာဗ္တံဂှ် ဗြဴညးတေံကော်ဟတဵုကဵုစပုၚ်သဝ်တ္ၚဲဂှ် ဂွံတီညးတေံဟွံမွဲရ− ဟိုတ်နူယဲခန္ဓ ယဲကောန်တၟံညးတေံက္တဵုတုဲ လမျီုအိုတ်အာဒၞာဲဂှ်မာန်လောဲလောဲရ။

အဲကေုာံရဲသ္ကံဂမၠိုၚ်အာသ္ၚိဖျေံဇွစံၚ်ဂြဇုတ်ရဲအဲမချိုတ်အာဂှ်တုဲဒှ်ဟေၚ် အဲကလေၚ်ကူချပ်ဂွံဗီုရဲအဲမိက်ဂွံအာဝေၚ်ဒၞာဲတေံဒၞာဲဏံဂှ်တုဲ စဵုကဵုအခေါၚ်အာဝေၚ်ဟွံမွဲ ဒးချိုတ်အာဟဂှ်။

နူစရဲအဲချိုတ်အာတုဲဂှ် လပါ်သ္ၚိရဲဂှ်လေဝ် ဟွံဂွံအာကြပ်ပေၚ်ပိသၞာံပြၚ်ရတုဲ နွံမွဲတ္ၚဲ အဲဒဳဏာကွဳစက် ဂၠံၚ်တတ်စိုပ်အာလပါ်သ္ၚိရဲအဲဂၠံၚ်တပ်တဝ်မံၚ်တုဲ လုပ်အာဝေၚ်သၟာန်ဇာန်စဗြဴရဲအဲကဵုကောန်ဇာတ်ဍေံတံ ဒှ်နွံသာ်လဵုပရေၚ်မံၚ်စံၚ်ဂှ်တုဲ ဂွံဆဵုကေတ်ဂှ် "ဗြဴရဲအဲ ဍေံဂွံတြုံတၟိယျ" မတ်အဲစၚ်အာလပါ်ကပေါတ်စွံလဝ်ပ္ဍဲဒူတံကီု သီုအရက်ဍုၚ်မ္ၚးၚုဟ်မးက္ဍၚ်က္ဍၚ်တံဂှ် မွဲပဠၚ်ဟွံသှ်ေ တြုံဍေံတၟိဏံဖဲညးမွဲဓဝ်ဟဂှ်၊ တြုံတၟိဍေံသုၚ်အရက်တုဲ ဗန်ဂွံဗြဴရဲအဲ တံၚ်ဂြဲကအ်တဲ လုပ်အာဗဒမ်သတိက်ရဲအဲဂှ်ပၠန်ရ၊ သြန်ထဝ်ရဲအဲဂိုၚ်ဒေပ်သအေတ်သပါန်စွံလဝ်တံဖအိုတ်ဂှ် တြုံတၟိဍေံရစကာသုၚ်စောဲဖဲဖဲလဲလဲ၊ လ္တူဒူတံဂှ်ပၠန်လေဝ် ဂွံဆဵုကေတ်ဗီုရုပ်ဗြဴရဲအဲကဵုတြုံတၟိဍေံ အာဝေၚ်ဒၞာဲစုၚ်ဇဳတုဲ တက်ဂိုၚ်စွံလဝ်ဗီုရုပ်ဇၞော်ဇၞော် ဗစူလဝ်ပေၚ်ဂၞေၚ်ဇိုဝ်သ္ၚိတံဂှ်ရ။

တုပ်ကဵုပိုဒ်အဲချူလဝ်ကၠာအိုတ်တေံဂှ် မဂဳညးတေံချိုတ်အာတုဲ ကပေါတ်ဗြဴညးတေံရာန်လဝ်နွံကဵုၚုဟ်မးက္ဍၚ်က္ဍၚ်ဖအိုတ်တံဂှ်လေဝ် ဟွံလအ်ဟေၚ် ဗွဲစၟတ်ဒးဒှ်ကပေါတ်ဗြဴတၟိညးတေံပၠန်ရဏောၚ်ဂွံသုၚ်စောဲ။

ဟိုတ်ဒှ်သာ်ဝွံတုဲ ပိုဲတအ်လ္ပမၚ်တ္ၚဲခိုဟ်တ္ၚဲပြဲ တ္ၚဲကာမ္ၚဵုသွက်တ္ၚဲယးတေံဂှ်ညိ၊ လဆောဝ်တှ်ေ တ္ၚဲမ္ၚဵု တ္ၚဲပြဲပိုဲဟီုဂှ် ဍေံဟွံစိုပ်ပ္ဍဲဘဝပိုဲဏံလေဝ် ဒှ်မာန်မံၚ်ဏောၚ်၊ သာ်ဝွံဟေၚ် တ္ၚဲဏံ ပစ္စုပ္ပန်ဏံရဂှ် ဒးဒှ်တ္ၚဲခိုဟ်တ္ၚဲပြဲ တ္ၚဲကာမ္ၚဵုတၟေၚ်တၟေၚ်သွက်ဘဝပိုဲမၞိဟ်တံဏံဟေၚ်ဂှ် ဒးစွံစိုတ်သာ်ဝွံတုဲ အခိၚ်ကၠောန်လေဝ်ဒးကၠောန်၊ အခိၚ်ဇူလေဝ်ဒးဇူ၊ အခိၚ်အာဝေၚ်ကဵုလာပ်ဗဇဴကဵုခန္ဓသွက်ဘဝဏံလေဝ် ဒးကဵုထေက်တုဲ တ္ၚဲချိုတ်ဟီုဂှ် ဍေံလုပ်စိုပ်ဒၟံၚ်ပ္ဍဲဘဝပိုဲဏံၜါစှော်ပန်နာဍဳလၟိုန်လၟိုန်ရ။

ကၠိုဟ်သာ်ဝွံတုဲ ဝေၚ်ကီု စသုၚ်ကီု စဵုကဵုမုဟွံသှ်ေ ပြသၞာလေပ်စိုပ်ပ္ဍဲဂကောံအိန်ထံၚ်ဂှ်လေဝ်လ္ပကဵုဒှ်၊ ၜိုတ်ထေက်ကြိုက်ကဵုဒြဟတ်ပိုဲဏံဂှ် ပွမစသုၚ်ဝေၚ်ဇူဒီု ဒးကဵုလာပ်ဗဇဴသွက်ခန္ဓပိုဲဏံဟိုတ်နူဒးကၠောန်ကလောန်ဂၠာဲမံၚ်ထဝ်သြန်လၟေၚ်လၟေၚ်တ္ၚဲဂှ်အိုတ်ညိ၊ ယဝ်ကၠိုဟ်စိုတ်ၜိုတ်ဏံရတှ်ေ ပိုဲတံလ္ပမၚ်တ္ၚဲခိုဟ်တ္ၚဲပြဲ တ္ၚဲမ္ၚဵုကာတၟေၚ်တၟေၚ်တံဂှ်ညိတုဲ ဇၟာပ်ဇၟာပ်တ္ၚဲဝွံလေဝ် ပိုဲဂွံယီုလုပ်ယီုတိတ်မံၚ်ပၟိက်စိုတ်ဂှ် ဒှ်ဒၟံၚ်တ္ၚဲခိုဟ်တ္ၚဲပြဲသွက်ဘဝပိုဲဏံရ၊ သုၚ်စောဲဘဝ လ္ပကဵုယအ်, လ္ပကဵုပဵု, လ္ပကဵုၜက်အာညိ၊ စိုပ်မွဲတ္ၚဲ ယဝ်ပိုဲချိုတ်အာကၠာတှ်ေ ဝိဉာဏ်ပိုဲဏံလေဝ် ဟွံဒးမၚ်စၟဳဒၟံၚ်တ္ၚဲခိုဟ်တ္ၚဲပြဲတံဂှ်ရဟွံသေၚ်ဟာ၊ ၜိုတ်ဏံ ဝိဉာဏ်ပိုဲၜိုဟ်သိုဟ်ညိၚ်ဝတ်သွက်ဘဝပလိုတ်တေံရ။ အုပ်နိဂီု။ −−−−−−−−−− play stoe−https://play.google.com/store/apps/details... မွဲနဲပၠန်ဂှ်တှ်ေ

apk သွက်ဖုၚ် Android တံတှ်ေ တံၚ်ပတိုန်စုတ်ပ္ဍဲဖုၚ်ညိ။ https://app.box.com/file/971542165210... − သွက် ios - Windows - iPad - iphone - tablet တၞဟ်တၞဟ်တအ်ဂှ်တှ်ေ လုပ်ပံက်ကေတ်တိုက်ရိုက် Application website ဏံညိ။ https://sites.google.com/.../13jk9kcdHxIoapwyHPotX0I.../edit