ဗတောန်ကောန်ကဵုဂၠာဲစကကီုညိ − (ဗဟုသုတဗှ်ဝေၚ်)

ဗတောန်ကောန်ကဵုဂၠာဲစကကီုညိ −

(ဗဟုသုတဗှ်ဝေၚ်) သ္ၚိမွဲမဂှ်သွံမံၚ်ဖျာပုၚ်သွ၊ သ္ၚိမွဲမပၠန်ဂှ်လေဝ် လိၚ်စမံၚ်ကဝးဗဳဒဳယောကဵုညးဂမၠိုၚ်ရ၊ ပ္ဍဲသ္ၚိသွံမံၚ်ဖျာပုၚ်သွဂှ်လေဝ် နွံကောန်ဝုတ်မွဲရ၊ လပါ်ကဵုသ္ၚိလိၚ်စမံၚ်ကဝးဗဳဒဳယောဂှ်လေဝ် နွံကောန်ဝုတ်မွဲတုပ်တုပ်ကီုရ၊ ကောန်ဝုတ်သ္ၚိသီုၜါဂှ်ပၠန် အာယုက်တုပ်မံၚ်ညးသ္ကံမွဲအဝဲရ။

အခိၚ်စှ်ေနူဘာတေံဗက်ဂှ်တှ်ေ လပါ်ကောန်ဝုတ်သ္ၚိသွံမံၚ်ဖျာပုၚ်သွဂှ် ညးတေံဗိုၚ်သွံပုၚ်သွသီုဗိုၚ်ကြာတ်ပ္ၚာန်ကရောံမိမညးတေံ စဵုကဵုစိုပ်အခိၚ်ဗ္တံဒစိတ်နာဍဳအရိုဟ်ဒဒှ်တ္ၚဲရ၊ ပ္ဍဲကဵုလပါ်ကောန်ဝုတ်သ္ၚိလိၚ်စကဝးဗဳဒဳယောပၠန်ဂှ်လေဝ် စှ်ေနူဘာစဴစိုပ်သ္ၚိဗက်ဂှ် ပံက်ကောန်ပျူတာဝေၚ်မံၚ် game လ္တူတိုက်ၜါထပ်တေံရ၊ အခိၚ်ညးတေံဗျဵုဗုၚ်တှ်ေ ကညာၚ်ကရေဲကဵုမိယာဲဇကုအာရာန်ပုၚ်သ္ၚိသ္ကဲဂှ်ရ။

ကောန်ဝုတ်သ္ၚိသွံဖျာပုၚ်သွဂှ် ညးတေံမိက်သ္ဂောံဂွံကွဳလိုန်ဓါတ်မွဲမသွက်ဂွံဒဳအာဘာဂှ် စိုပ်အာစှ်တန်တေံမှ ဂွံရာန်ကွဳလိုန်ဓါတ်မာန်−ဟိုတ်နူမိယာဲညးတေံကဵုပကောံသြန်ခရိတ်ဗိုၚ်သွံပုၚ်သွကဵုမိယာဲတုဲ မွဲတ္ၚဲမွဲကၠံ မိယာဲညးတေံပကောံစွံလဝ်စဵုကဵုရာန်ဂွံကွဳလိုန်ဓါတ်ဂှ်မာန်၊ သွက်ကောန်ဝုတ်သ္ၚိလိၚ်စကဝးဗဳဒဳယောပၠန်ဂှ်တှ်ေ မိက်သ္ဂောံဂွံဖုၚ် မိက်သ္ဂောံဂွံကွဳလိုန်ဓါတ်လေဝ် လဝါဲဂှ်ဟေၚ် မိယာဲညးတေံရာန်ကဵုဂွံမာန်အတိုၚ်ပၟိက်စိုတ်ရ၊ ပ္ဍဲအခန်ဘာညးတေံဂှ်တှ်ေ ညးတေံဂွံရပ်ဖုၚ်ဒှ်မၞိဟ်ကၠာအိုတ်နူအ္စာဏီ၊ အခိၚ်ဂှ် မၞိဟ်ဂွံရပ်ဖုၚ်မွဲမမာန်ဂှ် မၞိဟ်ဓမ္မတာဟွံသေၚ်ပုဟ်။

ကောန်ဝုတ်ဖျာသွံပုၚ်သွဂှ် သ္ၚိသဝ်အာဒိုတ်တှ်ေ ဒးအာရာန်ကပေါတ်ခၞေဝ်ကေဝ်ကေုာံဖျုန်နာနာမွဲစွံကဵုအပါညးတေံရ၊ လပါ်ကောန်ဝုတ်လိၚ်စကဝးဗဳဒဳယောပၠန်ဂှ် သ္ၚိသဝ်အာဒိုတ်တှ်ေ တံၚ်ပတိတ်အာန်တံၚ်ပ္ဍဲခုၚ်ဂှ်တုဲ သြန်မူစိကေတ်ကေတ်ဂှ် ရပ်ကေမ်ကေတ်ဏာတုဲ ကသေအ်သ္ကံရဲ ကောံအာကွာ်ကြေဝ်ဖျာဇၞော်လဒေါဝ်ဍုၚ်တေံ။

နွံမွဲတ္ၚဲ...သ္ၚိသီုၜါဂှ် အာသ္ၚိကုသဵုကွာန်သ္ၚောဲသ္ၚောဲတုဲ လပါ်ကလေၚ်စဴကၠုၚ်ဂှ်ဟေၚ် ကွဳစက်ကာသီုၜါမဗဂပ်အာတုဲ မိမသီုညးၜါဂှ်လေဝ် ဒးချိုတ်အာဒၞာဲဂှ်တုပ်တုပ်ရ၊ အခိၚ်ဂှ် ကောန်ဝုတ်သွံပုၚ်သွဂွံဘာစှ်တန်တုဲ ဂွံလဝ်ကွဳလိုန်ဓါတ်မွဲမနူခရိတ်ဗိုၚ်သွံပုၚ်သွဇရေၚ်မိမဇကုဂှ် အလန်ဏံတှ်ေ နကဵုညးတေံဟေၚ် ဒးဆက်ကေတ်အာတာလျိုၚ်ဖျာသွံပုၚ်သွစၞးမိမညးတေံရ၊ ကောန်သ္ၚိလိၚ်စကဝးဗဳဒဳယောပၠန်ဂှ်လေဝ် ဘာစိုပ်စှ်တန်တုပ်ကဵုသ္ၚိသွံပုၚ်သွဂှ်တုဲ မုရောကၠောန်ဟွံလေပ်ဟေၚ် လၟေၚ်လၟေၚ်တ္ၚဲလေဝ် သုၚ်စောဲအာသြန်ဗွဝ်မိမၜါထောံကၠဟ်လဝ်နွံညိညဂှ်ရ။

ကောန်ဝုတ်သ္ၚိလိၚ်စကဝးဗဳဒဳယောဂှ် ညးတေံဂွံလဝ်သြန်ဗွဝ်နူပိုန်ဒြပ်မိမညးတေံၜိုတ်ထေက်ကြိုက်နွံတုဲ သၞာံအခါခြာဟွံလအ်ဂှ် မသြန်တံအိုတ်အးအာရ၊ အလန်ဏံတှ်ေ ညးတေံလလောၚ်တြးသွက်ဂွံသွံသ္ၚိဂှ်ရ၊ ကောန်ဝုတ်သ္ၚိသွံပုၚ်သွဆဵုကေတ်တုဲ မသြန်မိမညးတေံပကောံလဝ်ဖအိုတ်ဂှ် အာရာန်သ္ၚိလိၚ်စကဝးဗဳဒဳယောဂှ်ဗွဲမပြဟ်။

အလန်ဏံတှ်ေ ကောန်ဝုတ်သ္ၚိလိၚ်စကဝးဗဳဒဳယောဂှ် ညးတေံဂွံဏာသြန်ဗွဝ်ဂၠိုၚ်ကဵုကိုတ်တုဲ မိပ်လဟိၚ်တဴကဵုဗွဝ်သြန်ဂှ်သက်ဟီုဟွံမွဲရ၊ အလန်ဏံတှ်ေ ကောန်ဝုတ်သ္ၚိဖျာသွံပုၚ်သွဂှ် ညးတေံကသပ်တိတ်တုဲ ဗဒၚ်သ္ၚိလိၚ်စကဝးဗဳဒဳယောဂှ် တက်ထရိုဟ်ကၠိုဟ်ကဵုသ္ၚိဇကုဒှ်မွဲတုဲ သ္ပထောံဖျာမွဲမဒုတ်ဒုတ်ဇၞော်ဇၞော်သၠဲသၠဲလးလးရ၊ အလန်ဏံမ္ဂး နူသ္ၚိသွံဖျာဍောတ်ဍောတ်မွဲမဂှ်လေဝ် ဇၞော်ဒုတ်တိုန်ကဆံၚ်ဖျာစသုၚ်လဒေါဝ်ဍုၚ်ရ။

စနူဂှ်တုဲ ရဲရာန်စပုၚ်သွတံလေဝ် ရံၚ်ဖျာဂှ်ဇၞော်တိုန်ကီု ဟွံလအ်ဟေၚ် ဗွဲတၟေၚ်မၞိဟ်လုပ်ရာန်ပုၚ်သွဖျာဂှ်ဂၠိုၚ်တိုန်နူတြေမ်တေံစှ်ဆဒှ်အာရ၊ အခိၚ်ဂှ်ဟေၚ် ကောန်ဝုတ်သွံပုၚ်သွ ညးတေံသွံဖျာလေဝ်ခိုဟ်ကွေံကွေံ သြန်လေဝ်ပဵုတိုန်နမတ်ဖက်ဖက်ရ။

ရံၚ်အာလပါ်ကောန်ဝုတ်သ္ၚိလိၚ်စကဝးဗဳဒဳယောဂှ်ပၠန်တှ်ေ မုလေဝ်ကၠောန်ဟွံလုပ် ထေၚ်ဂးသြန်နွံဂှ်ဒှ်ဒေဝတဴတုဲ အကြာသၞာံဟွံလအ်ၜါပိသၞာံဟေၚ် ဒးကလေၚ်လေၚ်ဝါတ်အာအိုတ်တးမုဟွံသှ်ေတုဲ အိုတ်ကၞောတ်ဂှ်ဒှ်အာကောန်ကမၠောန်ညးတၞဟ်။ မၞိဟ်မွဲနူဝါတ်ဂှ်လောဲတိုန်အာ၊ လပါ်မွဲပၠန်ဂှ်လေဝ် နူလောဲစသုၚ်ၜိုဟ်သိုဟ်ဂှ် ကလေၚ်ဒှ်အာမၞိဟ်ဝါတ်ဝါတ်ပၠန်၊ ရံၚ်ကဵုဟိုတ်ဖဵုဗဟုသုတဏံတုဲ ကောန်ဟီုဂှ်ၜိုတ်လဵုဆာန်ဆာန် ဒးစကာကဵုကၠောန်ကမၠောန်လေပ်ညိ၊ သာ်ဏံဟွံသေၚ်တှ်ေ ပိုဲမိမတံဏံလေဝ် ဒးဗက်ရီုဗၚ်ဒၟံၚ်ကဵုကောန်တံလၟိုန်ထာဝရဟွံသေၚ်ပုဟ်၊ ထေက်ကြိုက်ပိုဲဒးကဵုကောန်ဇာတ်တံ ဒးပလေဝ်ပလေတ်လဝ် ဗီုလဵုဂွံဆက်ပြိုၚ်အာဘဝလ္တူလောကဏံမာန်ပ္ဍဲအခိၚ်မိမဟွံမွဲဂှ်အိုတ်ညိ၊ ဟိုတ်ဂှ်ရ−ပိုဲဒးဗတောန်ကောန်ကဵုအာဂၠာဲစကကီုညိတုဲ ခိုဟ်နူကဵုပိုဲမိမတံဒးဂၠာဲနၚ်ကကဵုကောန်တံစလၟိုန်၊ စိုပ်မွဲတ္ၚဲ ယဝ်ပိုဲမိမတံချိုတ်အာကၠာတှ်ေ ကောန်ဇာတ်ပိုဲတံဂှ်လေဝ် ဂွံအာဂၠာဲစကနပူဂဵုဍေံမာန်ဂှ် ဒှ်ပြသၞာဒုတ်ဒုတ်ဏောၚ် _ အုပ်နိဂီု ။

(ဗီုရုပ်ဏံဂှ် ဂၠံက်ကေတ်နၚ်နူ google တုဲ ဒှ်ဆဗ္ဂပ်ချတ်ဖက်နှဴကဵုပရူပရာဂှ်ဓဝ်ဟေၚ်) play stoe−https://play.google.com/store/apps/details... Application website - မွဲနဲပၠန်ဂှ်တှ်ေ

apk သွက်ဖုၚ် Android တံတှ်ေ တံၚ်ပတိုန်စုတ်ပ္ဍဲဖုၚ်ညိ။ https://app.box.com/file/971542165210... သွက် ios - Windows - iPad - iphone - tablet တၞဟ်တၞဟ်တအ်ဂှ်တှ်ေ လုပ်ပံက်ကေတ်တိုက်ရိုက် Application website ဏံညိ။ https://sites.google.com/.../13jk9kcdHxIoapwyHPotX0I.../edit