ပရေၚ်ထတ်ယုက်ခိုဟ်ဟီုဂှ်ကၠုၚ်နူလဵုရော?

ပရေၚ်ထတ်ယုက်ခိုဟ်ဟီုဂှ်ကၠုၚ်နူလဵုရော? −

(ဗဟုသုတဗှ်ဝေၚ်လၟေၚ်တ္ၚဲ) ၁။ ပရေၚ်ထတ်ယုက်ခိုဟ်ဟီုမ္ဂးဂှ်တှ်ေ ကၠုၚ်နူစၞစမွဲဟေၚ် ဒးဟီုတပ်တပ်ဓဝ်ဓဝ်ကၠးကၠးမာန်တုဲ ဟိုတ်သာ်ဏံဟေၚ် ယဝ်ရံၚ်ညးတၠအာယုက်ဂၠိၚ်တံဂှ်မ္ဂး ဗွဲမဂၠိုၚ်ပ္ဍဲဘဝညးတံဂွံဆဵုကေတ်မာန်မွဲဟီုဂှ် တိုန်ဒှ်ကဵုစၞစအမာဲအဟာရညးမသ္ၚာဲဖျေံတံဂှ်ဟေၚ် ဗွဲတၟေၚ်ဂွံဆဵုကေတ်ကၠးကၠးမာန်၊ အဟာရအမာဲညးတံမသ္ပပြဘိုက်လၟေၚ်တ္ၚဲဂှ်လေဝ် ကၠုၚ်နူသဘာဝပေၚ်ပေၚ် ဂွံဆဵုညာတ်ကေတ်နမတ်တပ်တပ်ရဏောၚ်။

၂။ ပ္ဍဲတ္ၚဲဏံပၠန်လေဝ် စၞစအမာဲခၞေဝ်ကေဝ်နာနာ ဗီုပိုဲတံမရာန်စဒၟံၚ်ပ္ဍဲဗွဝ်ဖျာလၟေၚ်လၟေၚ်တ္ၚဲဂှ်လေဝ် ဒှ်ခၞေဝ်ကၠုၚ်နူသဘာဝရဂှ် ဒးစွံသတိကွေံကွေံတုဲ ခၞေဝ်ဂှ်ကျေဝ်ပလေဲက္ဍၚ် အန္တရာဲဓါတ်ဂျိပါဂၠိုၚ်က္ဍၚ်ဂှ် နနဲဥပါယ်ပြယာဲဗွဝ်ဖျာ တက်ပၠာဲလွဳပလေဝ်လဝ်နဓါတ်ဂဥုဲဂျိဂှ်လေဝ် ဣဏံဒှ်အန္တရာဲကဵုညးမသ္ၚာဲစဏာတံဂှ်မာန်လောဲလောဲ၊ ညံၚ်ရဴဍုၚ်တဴတက်ဒၟံၚ်ကဆံၚ်ဂၠးတိတံဂှ်ကီုလေဝ် ပြယာဲနဲကဲအလီဗီုခၞေဝ်ဂွံကျေဝ်မာန်ဂှ် ဗီုညးနဲအဲနွံစုၚ်ဇဳဂှ် ဖန်ဗဒှ်လံက်ပလေဲဗဝ်ဓါတ်ဂျိဇၞော်ဂေါဝ်ဖောအ်တိုန်ဖေါၚ်ဖေါၚ်ဂှ်လေဝ် ဣဏံဒှ်အန္တရာဲဒုတ်ဒုတ်မပါကၠုၚ်လဝ်တုဲတုဲသွက်ခန္ဓမၞိဟ်နွံလ္တူဂၠးတိတံဗွဲစၟတ်မာန်၊ (ဗီုလဵုသ္ဂောံသ္ပမာန် အခေတ်ပြိုၚ်ပ္ကာန်ယျတှ်ေ ဗီုညးနဲအဲဂွံမံၚ်ဂတဗွဝ်ဖျာမာန်ဂှ် နဲကၠံကၠေမ်လ္ၚီ တက်အလီကၠောန်ဗဒှ်ရနွံ)။

၃။ ပ္ဍဲကဵုစက္ကတ္ၚဲဝွံပၠန်လေဝ် စကၠုၚ်အခေတ်မွဲဟီုဂှ် ဂဥုဲဓါတ်နာနာ မကၠောန်ဗဒှ်ကၠုၚ်နူသတ်ဆုသတ်ဒုန်ကၠုၚ်နူသဘာဝနာနာတံဂှ်လေဝ် ဗွဲမနွံနညံၚ်ရဴဍာ်မစုတ်လဝ်ကဵုပဠၚ်ကီု၊ ညံၚ်ရဴမမကှ်ကှ် စဗဒှ်ဓတ်ကာယဇကုဇကောဝ်ခိုဟ်သောဲရာၚ်ကဴဂှ်လေဝ် ဂၠိုၚ်ကဵုလ္ၚီလက်ကမ္မဏဳတံဂှ် ပြိုၚ်ပ္ကာန်ပတိတ်ကပေါတ်ပတိတ်ဂဥုဲဗွဝ်ဖျာညးကဵုညးညံၚ်ဂွံမံၚ်ဂတဗွဝ်ဖျာဂွံတံၚ်စိုတ်ဓါတ်ညးလောကတံဂှ် ဖန်ဗဒှ်နဲကဲနာနာတုဲ တ္ၚဲဏံစအခေတ်ကွေံကွေံညးတံသ္ဂး၊ လ္ၚဵုပံၚ်တောဲကၠောန်ကမၠောန်ဒှ်အာသေဌဳပံက်ကမ္မဏဳဂွံလေဝ်နွံ၊ လ္ၚဵုအာဟွံစိုပ်ကၞောတ် လောတ်လောဒေါမ်ကၟိုၚ်ကယျာအာလေဝ်ဗဝ်သအဝ်ဂွံဆဵု။

သရောပ်တၚ်မွဲကၠာအိုတ်ဂှ်တှ်ေ --- စၞစအမာဲခၞေဝ်ကေဝ်မကၠုၚ်နူသဘာဝဟီုဂှ် ယဝ်ပိုဲကၠောန်ဗဒှ်တဵုလွဳကေတ်ကေတ်တှ်ေ ဗၠးအန္တရာဲသၠုၚ်အိုတ်သွက်ပရေၚ်ထတ်ယုက်ပိုဲဏံရ၊ ခၞေဝ်ကေဝ်လ္ၚဵုလ္ၚဵုပၠန်ဂှ်လေဝ် ပိုဲတီဂၠံၚ်တရဴအာကၠုၚ်ဍေံကၠးကၠးကီုတုဲ ခၞေဝ်ကေဝ်အမာဲတံဏံဂှ် ကၠုၚ်နူလဵု၊ ညးတံသုၚ်စောဲဓါတ်ဝါဲနဲကဲလဵုတုဲ သာ်ဏံဂှ် ပိုဲတံရဲရာန်သ္ပပြဘိုက်ဖက်အမာဲဂွံဗၠးအန္တရာဲမာန်။

ယဝ်ဒးရာန်စအကြာဗွဝ်ဖျာဏောၚ်မ္ဂးတှ်ေ ခၞေဝ်ကေဝ်မရာန်နၚ်လဝ်ကျေဝ်ကျေဝ်ပလေဲပလေဲဖအိုတ်ဂှ် ကြဴကြာတ်နဍာ်ၜဵု ထပ်ကြာတ်သ္အးဍာ်ပလးၜါပိဍာ်တုဲတှ်ေ ဖက်နှဴဍုန်တိုပ်အမာဲမ္ဂး စအိုတ်ညိ၊ သီုဖအိုတ်ဏံဂှ် ဒှ်ဖဵုကဵုခန္ဓပရေၚ်ထတ်ယုက်ပူဂဵုပိုဲဏံမွဲဟေၚ်သက်သက်ဏောၚ်၊ ယဝ်သာ်ဏံမ္ဂးတှ်ေ ကုသဵုခိုဟ်အိုတ်သွက်မၞိဟ်မဂျိုၚ်ဒၟံၚ်လ္တူဂၠးတိဏံဂှ် "ပရေၚ်ထတ်ယုက်ခိုဟ်" ဟေၚ် ဒှ်အဓိကလၟေၚ်မွဲရဟွံသေၚ်ဟာ။

သရောပ်တၚ်ၜါပၠန်ဂှ်လေဝ် --- ခၞေဝ်ဗွဝ်ဖျာတ္ၚဲဏံတံဂှ် ကျေဝ်က္ဍၚ်အန္တရာဲဂၠိုၚ်က္ဍၚ်ရ၊ ဟိုတ်နူညးတၠတဵုလွဳပရာခၞေဝ်ကေဝ်တံသုၚ်စောဲဝါဲဂျိနာနာတုဲ ဂွံကၠုၚ်ခၞေဝ်ကေဝ်ဗီုပၟိက်စိုတ်ညးတံလောဲလောဲ၊ ဟိုတ်သာ်ဏံဟေၚ် ပိုဲတံဒးစွံသတိရုဲရာန်စခၞေဝ်ကေဝ်ပ္ဍဲဂတမုက်လဒေါဝ်ဗွဝ်ဖျာဇၟာပ်ဇၟာပ်တ္ၚဲအိုတ်ညိ၊ ခၞေဝ်သၟးအန္တရာဲဟွံသေၚ်တုဲ ဖျုန်နာနာတံဂှ်လေဝ် အန္တရာဲဂၠိုၚ်ဟွံတၞဟ်ခြာနူကဵုခၞေဝ်ကျေဝ်ကျေဝ်ပ္ဍဲကဵုဗွဝ်ဖျာတေံဂှ်မာန်၊ ဟိုတ်ဂှ်ရ− ဒှ်ကၠုၚ်ကဵုအခေတ်ယျတုဲ အခိၚ်ဂှ်လေဝ်အောန်ကၠုၚ်ဗီုညးဗီုအဲဂှ်ရ− ဆဂး သတိမွဲလ္ပဝိုတ်ထောံတုဲ သုၚ်စောဲနဲကဲစဵုဒၞာဗီုတၚ်မွဲဂှ်တုဲ ရုဲရာန်ကြာတ်သ္အးတုဲ ဍုန်တိုပ်ကၠောန်ဗဒှ်အမာဲစုတ်ပၚာန်သ္ပပြဘိုက်အိုတ်ညိ။

သရောပ်တၚ်ပိလက္ကရဴအိုတ်ဏံဂှ်လေဝ် --- မၞိဟ်တ္ၚဲဏံဒးစိုတ်ဂၠံၚ်ကရတ်ကွေံကွေံတုဲ ဂဥုဲဓါတ်ဂတာပ်အခေတ်လ္တူလပှ်ကျာလေဝ် ကဵုကၠုၚ်အရီုဗၚ်သွက်ဘဝခန္ဓပရေၚ်ထတ်ယုက်ညးတံစံက်ဂးသာ်ဏံတုဲ ပ္ဍဲဘဝပူဂဵုပိုဲဏံမုနွံပၟိက်ဂှ် နကဵုဂဥုဲဂတာပ်အခေတ်တံဏံ ရီုဗၚ်ကဵုဗွဲမတရိုပ်စိုတ်ဏောၚ်တုဲ သွက်ၝောံၝောံတံမိက်သ္ဂောံကှ်ဇြာဲလေဝ် နကဵုဂဥုဲဓါတ်တံဏံဂှ် ဗဒှ်ကဵုမာန်တုဲ နအခိၚ်ခြာဟွံလအ်ကှ်ဇြာဲသောဲရာၚ်ကျေဝ်ကၠုၚ်ဗီုဝုတ်ဍောတ်ဍောတ်မွဲဝါပၠန်။

ညးလ္ၚဵုနွံပၠန်ဂှ် မုမိက်သ္ဂောံစဂှ်စအိုတ်ညိတုဲ ဂဥုဲဍေံသွံနွံမံၚ်ဂှ်ပိုဲရာန်သုၚ်ထောံမွဲၜါပဠၚ်မ္ဂးတှ်ေ ပရေၚ်ထတ်ယုက်ပိုဲခိုဟ်ကၠုၚ်ပကတိပၠန်လေဝ်သ္ဂးအိုတ်ရ၊ လ္ၚဵုရာန်ကဵုမိမၜါတံသုၚ်ညံၚ်ပမိပ်ဂှ်လေဝ် စကၠုၚ်အခေတ်ကွေံကွေံ၊ ပ္ဍဲခန္ဓပိုဲမုဒှ်ဒှ်ဂှ် ဂဥုဲတ္ၚဲဏံသွံရာန်နွံတုဲ ပတေဟ်ဂဥုဲဓါတ်ဂၠိုၚ်လောန်အာတုဲ ဗွဲကြဴကၞောတ်ဂှ် ဍေံကဵုကၠုၚ်အန္တရာဲသွက်ပရေၚ်ထတ်ယုက်ပိုဲဏံဂှ်လေဝ် လအ်ကဵုပြဟ်ဂွံဆဵုကၠုၚ်သိုက်သိုက်မာန်။

(ထပ်ဗပေၚ်စုတ်ပရေၚ်မ္ၚးခြာနူက္ဍိုပ်လိက်ညိည) --- သွက်ညးကၟက်ကၟက်တံပၠန်လေဝ် ကောန်ပဴဟွံဂြဴညံၚ်ဂွံထတ်စောန်မြက်စာဂှ်လေဝ် နကဵုဂဥုဲဓါတ်တ္ၚဲဏံစထောံမွဲၜါမဟေၚ် ကလေၚ်ဒှ်ကၠုၚ်ကောန်ပဴၜတ်ၜတ် ထတ်စောန်မြက်စာနအသိၚ်ဂဥုဲဂှ် ဂတာပ်စိုတ်ကွေံကွေံတုဲ စဵုကဵုတ္ၚဲဏံလေဝ် ကၟက်ကၟက်ဗျုဗျုတံ ဒးစိုတ်စကာသုၚ်စောဲပ္ဍဲအခိၚ်တိက်မံၚ်ပံၚ်ဖက်နှဴကာမလိၚ်လ္တူဖုန်မာန်၊ ညးလ္ၚဵုဒးစိုတ်ဗြဴဍောတ်တြုံဍောတ်တံလေဝ် ဒးပါဒၟံၚ်သ္ကံတဲဟွံကဵုပိုတ်လေဝ်နွံတဴအိုတ်ရ။

ညးလ္ၚဵုဂှ်ပၠန် သုၚ်ဂဥုဲဓါတ်တံဂှ်တုဲလေဝ် စပုၚ်သွစှ်ေတုဲ ကြောံကၠုၚ်ဖျုန်သွဒုတ်တိတ်သ္ကဲ ဟွံလအ်ကြောံညံၚ်ကၠိက်လေဝ်နွံတဴရ၊ သွက်ညးဗြဴထိၚ်ကောန်တံပၠန်လေဝ် နကဵုဂဥုဲတံဝွံဟေၚ် စထောံတုဲ ထိၚ်ကောန်မာန်ဟီုဂွံကီုလေဝ် ၜက်ကၠုၚ်မွဲၜါသၞာံဂှ် ဂွံဆဵုၝောံၝောံတံဏံဂှ် ကြောံညံၚ်ကၠိက်၊ လ္ၚဵုကှ်ဇြာဲရုပ်ရဴဟွံတၟးရာၚ်ကဴဂှ်လေဝ် နွံဗဝ်သအဝ်ဂွံဆဵု၊ ညးလ္ၚဵုစလဝ်ဂဥုဲထိၚ်ကောန်ဂၠိုၚ်လောန်တုဲ ထိုၚ်ကောန်သွက်ဂွံစပ်ဗါန်တိုန်ပဋိသန္ဓိဂှ်အုဲလီုဒှ်အာသရဂှ်ရ− အခိၚ်ကေတ်ကောန်လေဝ်ဟွံဂွံမာန် ဒးစံၚ်တူစိုတ်ဗွဲကြဴအိုတ်တုဲ ဒးအာကဵုအ္စာဂဥုဲတံပလေဝ်သြန်အိုတ်ပၠန်သိုက်သိုက်။

သရောပ်ထောံမုမိက်ဂွံသ္ဂးရောဟီုတှ်ေ ဂဥုဲပိုဲတံမသုၚ်စောဲစကာဒၟံၚ်ပ္ဍဲစက္ကဏံဂှ် ကၠုၚ်နူဂျိဖအိုတ်ရတုဲ ဂဥုဲလ္ၚဵုၜိုန်ဟွံကော်နယၟုဂဥုဲပေၚ်ပေၚ်ကီုလေဝ် နဲကဲဖက်နှဴမကၠောန်ဗဒှ်လဝ်ဂဥုဲဓါတ်တံဂှ် ကၠုၚ်နူဗီုပြၚ်ဗွဝ်ဖျာဂွံဆဵုဖဵုပြဟ်ပြဟ်တုဲ နအခေတ်ပြိုၚ်ပ္ကာန်ဂှ် ဗဒှ်ကၠုၚ်ဂၠံၚ်ကရတ်ဂှ်ဟေၚ် ဓါတ်ဂျိမကော်ခဴစဂဥုဲဂှ် ဖက်နှဴနွံဖအိုတ်ရအောန်ကဵုဂၠိုၚ်ဂှ်ဗွဲစၟတ်ဒးသမ္တီလဝ်ညိ၊ ပရေၚ်ထတ်ယုက်ခိုဟ်အာယုက်ဂၠိၚ်မံၚ်အာဗွဲတသိုက်ဂှ် တိုန်ဒှ်ပ္ဍဲဂဥုဲတံဏံဟွံသေၚ်တုဲ ဍေံနွံဒၟံၚ်ပ္ဍဲပိုဲဏံမရုဲစှ်စစၞခၞေဝ်ကေဝ်ကီု၊ မဝေၚ်ပရေၚ်ထတ်ယုက်ဟွံကဵုပိုတ်သ္ကုတ်အာကီု၊ အခိၚ်တိက်ဇူလေဝ် ညံၚ်ဂွံပေၚ်နာဍဳအောန်အိုတ်မသုန်နာဍဳလပါ်လ္တူဂှ်လေဝ် ဒးတိက်အိုတ်ညိ၊ စၞစမသုန်ဂကူခန္ဓနွံပၟိက်ဒးပေၚ်မာန်၊ ယဝ်သာ်ဏံမ္ဂးတှ်ေ ပွမသုၚ်ၜံက်ဝေၚ်ယက်၊ ပွမသုၚ်အရက်သုရာကေုာံစၞဗ္ၜူဗ္ၜူဗွဲမဂၠိုၚ်တံဂှ် ပိုဲဒးပါဲထောံဂှ်ဇၟာပ်ညးအဲလေဝ်တီလဝ်ဖအိုတ်ဏောၚ်။

နွံမွဲပၠန်ပိုဲတံဒးလွဳပရာဗဂဵုလဟဵုဝိုတ်ထောံဟွံဂွံသွက်ဘဝကေုာံပရေၚ်ထတ်ယုက်ဂှ်တှ်ေ "စိုတ်" ပိုဲဏံလေဝ် ဒှ်ကောန်ကသအ်အဓိကမွဲသွက်ဘဝပိုဲဏံတုဲ ဒးပလေဝ်စိုတ်ရနွံ၊ နဲကဲက္ဍန်က္ဍန် မိက်သ္ဂောံဆန်ချူဏာဂတဏံဂှ်တှ်ေ− (၁)။ ပိုဲလ္ပဒှ်မၞိဟ်ထေဲပြဟ်ညိ၊ ယဝ်ထေဲကီုလေဝ် ဒးထေဲနကဵုဟိုတ်ဖဵု။ (၂)။ ပိုဲတံလ္ပကူချပ်အနာဂတ်ကၠာဟွံစိုပ်တေံညိ−ကူဆၜိုတ်အရာလဵုနွံကဵုဟိုတ်ဖဵုတှ်ေတုဲရ။ (၃)။ ပိုဲတံလ္ပဗက်အခေတ်စဵုကဵုၜက်အာပယျဵုဒၞက်ညိ၊ တုဲတှ်ေ ဘဝပိုဲဏံလေဝ် လ္ပဗက်အာပတုပ်ဒၟံၚ်ကဵုဘဝညးတၞဟ်တွဵုဂှ်ညိ။ (၄)။ သြန်မွဲမလ္ပစွံတိုၚ်ပ္ကဴသွက်ဘဝညိ။ (၅)။ မုကၠောန်ကၠောန် ပြသၞာညံၚ်ဟွံဂွံလုပ်စိုပ်ဂကောံအိန်ထံၚ်ဇကုမာန်ဂှ် ချပ်လဝ်ကၠာဟွံဂွံကၠောန်တွဵုတွဵုညိ။ (၆)။ ဒးဒှ်မၞိဟ်ဂံၚ်သၠးပွလေပ်ညိ။ (၇)။ ဒးဒှ်မၞိဟ်သၠးအခေါၚ်လ္တူညးတၞဟ်လေပ်ညိ။ (၈)။ ကေတ်အခိၚ်သၠးတုဲ ချူဝေၚ်လိက်ဗှ်ဝေၚ်လိက်အိုတ်ညိ။ (၉)။ ဒးကဵုလာပ်ဗဇဴသွက်ဘဝပိုဲကေုာံသွက်ခန္ဓကာယပိုဲဏံၜိုတ်ထေက်ကြိုက်လၟိုန်လၟိုန်ညိ။ (၁၀)။ သ္ပကုသဵုကဵုဒါန်ၜိုတ်ဒြဟတ်နွံညိ၊ ကေုာံဂရုဏာဆာန်သတ်တိရစ္ဆာန်အိုတ်ညိ။ (၁၁)။ လ္ပမိပ်ကဵုကမၠောန်ၜက်အာတုဲ သြန်ပကောံလဝ်ဖအိုတ်ဂှ် ဒးအာပအပ်ကဵုအ္စာဂဥုဲဖအိုတ်−သာ်ဏံဗွဲက္ဍန်။−ယဝ်လပါ်စိုတ်ဒးဗဂဵုလဟဵုသွက်ပူဂဵုဓမ္မတာသာမညတှ်ေ ဇၟာပ်ညးအဲလေဝ်ကၠောန်ဂွံလောဲသွာဇၟာပ်မၞိဟ်အိုတ်ဏောၚ်ဂှ် ထေၚ်ကေတ်ရ၊ တၞဟ်တၞဟ်ဗွဲမဂၠိုၚ်ဂှ်လေဝ် ချူချတ်ဗဒှ်အာဟွံအိုတ်တုဲ ဇၟာပ်ညးအဲလေဝ် ရံၚ်ကဵုဟိုတ်ဖဵုမွဲမွဲတုဲ ချပ်ကေတ်ဗဒှ်မာန်ကၠောန်ကေတ်လေဝ်ဂွံမံၚ်သီုညးဖအိုတ်ရဏောၚ်။

ဟိုတ်ဂှ်ရ− ပရေၚ်ထတ်ယုက်ခိုဟ်ဟီုဂှ် လပါ်စိုတ်ပိုဲဏံလေဝ် ပါလေပ်နှဴမံၚ်ကွက်ပြၚ်ပြၚ်တုဲ လပါ်ခန္ဓကာယပိုဲဂှ် စၞစအာဟာရဒှ်အဓိကညံၚ်ဂွံဗၠးအန္တရာဲရုဲရာန်စအိုတ်တုဲ ဝေၚ်ပရေၚ်ထတ်ယုက်လၟိုန်လၟိုန်၊ အဓိကလပါ်စိုတ်ဏံဂှ် ဒးဗဂဵုလဟဵုဂၠိုၚ်ဂၠိုၚ်ဂှ် လ္ပဝိုတ်ထောံအိုတ်ညိ။ --- သရောပ်ထောံဖအိုတ်ဂှ်တှ်ေ လညာတ်သာ်ဏံဝွံ သွက်ညးလ္ၚဵုဒးဟွံဒးဂၞပ်စိုတ်လေဝ်နွံ၊ သွက်ညးလ္ၚဵုဒှ်ပရေၚ်ဒစဵုဒစးသွက်ဓဝ်ပတေဟ်ညးတံလေဝ်နွံဟွံအောန်တုဲ ဣဏံဝွံ ဒှ်ဆလညာတ်သွက်သ္ဂောံဗှ်ဝေၚ်ခိုဟ်မွဲတုဲ အဓိကဂှ် နွံပ္ဍဲပိုဲဏံမသ္ဂုတ်သွာတ်ဗဂဵုလဟဵုပလေဝ်ပလေတ်အာနဟိုတ်ဖဵုဗီုညးကဵုညးအိုတ်ညိဂှ် ဣဏံအခေါၚ်ညးညးပိုၚ်လဝ်တုဲတုဲရဏောၚ်။

−−−−−−−−−− play stoe−https://play.google.com/store/apps/details... မွဲနဲပၠန်ဂှ်တှ်ေ

apk သွက်ဖုၚ် Android တံတှ်ေ တံၚ်ပတိုန်စုတ်ပ္ဍဲဖုၚ်ညိ။ https://app.box.com/file/971542165210... − သွက် ios - Windows - iPad - iphone - tablet တၞဟ်တၞဟ်တအ်ဂှ်တှ်ေ လုပ်ပံက်ကေတ်တိုက်ရိုက် Application website ဏံညိ။ https://sites.google.com/.../13jk9kcdHxIoapwyHPotX0I.../edit