ဓဝ်ဆာန်ကောဗၠာဲလ္တူဒေံဝုတ် (ဝတ္ထုဒမၠေအ်)

ဓဝ်ဆာန်ကောဗၠာဲလ္တူဒေံဝုတ် (ဝတ္ထုဒမၠေအ်) − ဟေ-ကောန်သိုက်ဆာန် ရံၚ်မံၚ်ဒေံဍေံခိုဟ်ခိုဟ်မံၚ်ဏး မိကဵုအပါတိတ်မ္ၚးအာဗၟိက်ကိစ္စမွဲလစုတ်ဓဝ်ရ−ဟွံလအ်ကလေၚ်စဴပၠန်ဏောၚ်၊ - ယွံမိ လ္ပဂွိၚ်ညိ။

မိမမာံသိုက်ဆာန်တံဂှ်လေဝ် ဟွံလအ်ဂွံမိၚ်ပရိုၚ်ကွဳစက်ဇီု လမျီုအိုတ်အာသီုညးၜါဂှ် နူရုၚ်ဂဥုဲတေံပလံၚ်နၚ်ပရိုၚ်ကဵုဣစဳမာံသိုက်ဆာန်တုဲ ဣစဳမာံသိုက်ဆာန်ဂှ်လေဝ် လဴဗ္စကဵုမာံသိုက်ဆာန်ဟိုတ်မိမၜါဒးစုတိအာဂှ်တုဲ ဆဂး လပါ်ဒေံဝုတ်ဍောတ်မွဲ နွံဆအာယုက်ပိသၞာံဂှ် သိုက်ဆာန်ဒုၚ်လဝ်ဂုဏ်ကဵုဣစဳဇကုတုဲ လ္ပလဴဗ္စကဵုဒေံဝုတ်ဍောတ်ဇကုတွဵုညိဂှ် ဟိုတ်နူဒေံဝုတ်ဇကုဍောတ်သွတ်လောန်တုဲ ပရေၚ်ပရူသာ်ဏံ ဖေက်ဒေံဝုတ်ဇကုဒုၚ်တဲဟွံမာန်ဟေၚ် ကၟာတ်လဝ်ဟွံလဴဗ္စရ။

ဟိုတ်နူမာံသိုက်ဆာန် အခိၚ်ဂှ်ဂွံအာယုက်စှ်သၞာံယျတုဲ တီကၠိုဟ်ဟိုတ်ဖဵုခိုဟ်ပရေံ ဖျေံလဝ်စိုတ်ဗွဲမခိုၚ်ဗိုန်လ္တူဒေံဝုတ်ဍောတ်ဇကုဂှ်တှ်ေ "အဲဒးမၚ်မွဲလွဳပရာဒေံဝုတ်အဲချိုတ်ချိုတ်ပၠိုတ်ပၠိုတ်" သာ်ဝွံ သ္ဂုတ်သွာတ်လဝ်ပ္ဍဲစိုတ်မာံသိုက်ဆာန်ရ။

လပါ်ဒေံဗြဴဝုတ်ဏံလေဝ် သၟာန်မံၚ်ဟဂှ် "မိကဵုအပါအာဣလဵုရော? မာံသိုက်ဆာန်လေဝ် လှေံလှန်ဟီုဏာဗီုတေံသာ်ဏံတုဲ ဟွံလအ် တၚ်သၟာန်ဒေံဝုတ်အောန်သိၚ်အာ လှိၚ်အာလ္တူဒဳဇကုမာန်"။

ဟွံလအ်ဂွံၜိုတ်ၜါသတ္တဟဂှ် ဣစဳမာံသိုက်ဆာန်တံလေဝ် ဟိုတ်နူဂွိၚ်ကဵုကောန်ကၟိန်ဇကုၜါဂှ်တုဲ ကော်နၚ်အာမံၚ်ပ္ဍဲသ္ၚိကရောံဇကုရ၊ မိဝုတ်ဇၞော်ဣစဳမာံသိုက်ဆာန်တံပၠန်လေဝ် ဟိုတ်နူတြုံလေဝ်ဟွံမွဲကီု၊ ပရေၚ်ပိုန်ဒြပ်လေဝ်ဟွံခိုၚ်ကၠိုက်စကွေံကွေံတုဲ၊ မာံသိုက်ဆာန်မွဲ ဒးတိတ်စကၠောန်ကမၠောန်ဂၠာဲသြန် သွက်သ္ဂောံရေၚ်တၠုၚ်နာနာ ပ္ဍဲသ္ၚိဣစဳမိဝုတ်ဇၞော်ဇကုကီု သီုဒေံဝုတ်ဗြဴဇကုဂွံတိုန်ဘာရာန်ကယျိုၚ်ကယျဝ်နာနာ ဂွံတုပ်ကဵုညးတၞဟ်မာန်ဂှ် နာဲသိုက်ဆာန်လေဝ်ဟွံဂွံတိုန်ဘာဟေၚ် ဗွဲတၟေၚ်ဒးဂၠာဲသြန်ဂှ် ဒှ်ကမၠောန်ကောန်ၚာ်အာယုက်စှ်သၞာံ ဒးကေတ်တာလျိုၚ်ပေၚ်ပေၚ်စနူတ္ၚဲဂှ်ရ။

အခိၚ်ဂှ်ပြဟ်လောန်ကွေံတုဲ စိုပ်ကၠုၚ်ခရေတ်(၂၀၀၀)ရဂှ် မာံသိုက်ဆာန်လေဝ် အာယုက်လုပ်စိုပ်ဂွံၜါစှော်သၞာံပေၚ်ပေၚ်ရ၊ ဒေံဝုတ်မာံသိုက်ဆာန်မိဇမ္ပါဂှ်လေဝ် ဂွံကၠုၚ်အာယုက်စှ်ပိသၞာံကီုရ၊ ပ္ဍဲအခိၚ်သဝ်တ္ၚဲမွဲတ္ၚဲဂှ် သိုက်ဆာန်ကော်နၚ်ဒေံဝုတ်ဇကုတုဲ လဴတဴဟိုတ်ပရူပရာမိမၜါပိုဲဟွံမွဲရ၊ ညးတံဟွံမွဲပ္ဍဲပိုဲညးၜါကောကဵုဒေံဏံရပုဟ်ဒေံဝုတ်၊ အခိၚ်ဂှ် မိဇမ္ပါလေဝ် အာယုက်စှ်သၞာံပြၚ်တုဲ တီကၠုၚ်ဟိုတ်ဖဵုညိညကီု ဟီုဝေတ်ဗတောန်လေဝ်လောဲကၠုၚ်ရ၊ ဆဂး ပ္ဍဲစိုတ်မိဇမ္ပါဂှ် တ္ၚဲဏံသှ်ေဆကောဇကုမွဲရတုဲ ဂွိၚ်ဖေက်ကောဇကုထောံလသာထောံဇကုပၠန်ဂှ် လရိုအ်ယာံဟီုကရောတ်ကဵုကောဇကုရ၊ "ယွံကော- မိမၜါလေဝ်ဟွံမွဲရ၊ သှ်ေနွံဆကောမွဲရဂှ် လ္ပထောံလသာဒေံဝုတ်ဏံပၠန်ညိဏးကော"၊ "ယွံဒေံ- လ္ပဂွိၚ်ညိ တ္ၚဲလဵုမှ ကောဟွံထောံလသာဒေံဝုတ်ပုဟ် ဒေံလ္ပဂွိၚ်ညိဏး"၊ ညးၜါကောကဵုဒေံ ဗန်ညးသ္ကံတုဲ သီုဗြဲဍာ်ရမတ်ဒတုံပြဟ်ဗီုညးကဵုညးရ၊ ဣစဳမိဝုတ်ဇၞော်လေဝ် ထိၚ်ဍာ်ရမတ်ဟွံမာန်တုဲ လရိုအ်တဴမွဲစွံတုပ်တုပ်။

နွံမွဲတ္ၚဲ နာဲသိုက်ဆာန်လုပ်အာကဵုဣစဳဇကုတုဲ သွက်ဂွံဗ္ကန်ပအပ်လဝ်ကဵုဒေံဝုတ်ဇကုကဵုဣစဳကီု၊ နာဲသိုက်ဆာန်လေဝ် တိတ်တရဴသ္ၚောဲအာကၠောန်ကမၠောန်သွက်သ္ဂောံဂွံသြန်ဂၠိုၚ်ဂၠိုၚ်ကီု၊ ဒေံဝုတ်ဇကုလေဝ် ကြပ်ကၠုၚ်တိုန်ဘာကဆံၚ်သၠုၚ်တေံသိုက်သိုက်ယျတုဲ၊ နာဲသိုက်ဆာန်ဖျေံသ္ဂုတ်သွာတ်သွက်ဂွံတိတ်တရဴဂၠာဲသြန်ဌာန်ဇမ္ၚောဲတေံမွဲဒၞာဲဂှ် ကပှ်ယာတ်စိုက်တုဲဒှ်ဟေၚ် မွဲသာ်ဟွံဂွံဗ္ကန်လဴစကဵုဒေံဝုတ်ဇကုတုဲ စတိတ်တရဴ ပတဝ်ဏာဍုၚ်လ္ဂုၚ်တေံရ။

တ္ၚဲယးတၟးဗက် မိဇမ္ပါဟွံဆဵုကေတ်ကောဇကုတုဲ သၟာန်ဣစဳမိဝုတ်ဇၞော်ရ၊ "ယွံဣစဳ ကောသိုက်ဆာန်မွဲ အာဒၞာဲလဵုရော?၊ "အဵု- ကောဍေံတိုန်အာဍုၚ်လ္ဂုၚ် အာရံၚ်ကမၠောန်မွဲၜါတ္ၚဲတုဲ ကလေၚ်စဴကၠုၚ်ပၠန်ရဏောၚ်" ဣစဳမိဝုတ်ဇၞော် ဠာန်ထောံဒဒှ်ဍာံမွဲ ဟွံလဴကဵုမိဇမ္ပါတပ်တပ်ရ၊ စနူဂှ်တုဲ ပ္ဍဲစိုတ်မိဇမ္ပါဒေံဝုတ်နာဲသိုက်ဆာန်ဂှ် ချပ်ကၠုၚ်ရ၊ "အဵု ကောအဲညးထောံလသာထောံအဲပၠန်ရဟာဟွံတီ" သာ်ဏံချပ်ဒှ်ကၠုၚ်ပ္ဍဲစိုတ်မွဲလစုတ်ရ။

စနူဂှ်တုဲ နူမွဲတ္ၚဲဒှ်မွဲအာဒိုတ်၊ နူမွဲအာဒိုတ်ဒှ်မွဲဂိတု၊ နူမိဂိတုလုပ်စိုပ်ဒှ်အာမွဲသၞာံတုဲ နာဲသိုက်ဆာန်ဂှ်လေဝ် ဟွံဂွံကလေၚ်စဴကၠုၚ်ပ္ဍဲဒေံဇကုမိဇမ္ပါကဵုဣစဳမိဝုတ်ဇၞော်ဟဂှ်ရ၊ ဆဂး မသြန်သွက်သ္ဂောံသုၚ်စောဲပ္ဍဲသ္ၚိကီု သွက်ဒေံဝုတ်ဇကုကီုဂှ် နာဲသိုက်ဆာန်ပြၚ်ဗစိုပ်မံၚ်ဟွံကဵုခၠန်ဇၟာပ်ဇၟာပ်ဂိတုရ၊ လိက်တၞးလေဝ် ပြၚ်ဗစိုပ်ကဵုဒေံဝုတ်ဇကုဇၟာပ်ဇၟာပ်ဂိတုရ၊ ဆဂး ဒၞာဲမံၚ်ပ္ဍဲတၞးလိက်မကၠုၚ်ဂှ် ဒၞာဲဒၟံၚ်ပြံၚ်သၠာဲမံၚ်ဟဂှ်ဟဂှ်ရ၊ (ဇေတ်ဇေတ်ဂှ်တှ်ေ ဟိုတ်နူနာဲသိုက်ဆာန်ပြံၚ်အာကၠောန်ဒၟံၚ်ကမၠောန်ပေၚ်ပြး ရန်လဝ်သြန်ခိုဟ်တုဲဗက်ပြံၚ်အာကမၠောန်ဂှ်ရ− ဒၞာဲမံၚ်လေဝ် ဗက်ပြံၚ်အာမံၚ်ဟဂှ်)။

ဟွံလအ် လုပ်စိုပ်ကၠုၚ်ခရေတ်(၂၀၁၀)ပၠန်ယျ၊ သၞာံဏံ မိဇမ္ပါလေဝ်ဘာတုဲအာ သီုဂွံကၠုၚ်တဆိပ်ကြာၜါတၞး၊ မွဲတၞးဂှ်တဆိပ်ကြာအ္စာဂဥုဲ၊ မွဲတၞးဂှ်တဆိပ်ကြာအ္စာပရိုၚ်၊ တ္ၚဲဏံ ၜိုန်ရဒေံဝုတ်ဇကုဘာတုဲအာကီုလေဝ်ဂှ် သြန်လၟေၚ်ဂိတုပ္ဍဲသ္ၚိဏံပၠန် နာဲသိုက်ဆာန်ပြၚ်ဗစိုပ်မံၚ်ဟဂှ်ဟွံကဵုပိုတ်သ္ကုတ်အာရ၊ အလန်ဏံတှ်ေ ပ္ဍဲသ္ၚိဣစဳမိဝုတ်ဇၞော်ဂှ် ပရေၚ်မံၚ်စံၚ်လေဝ်ပြေပြံၚ်ကၠုၚ်ယျ၊ ထဝ်သြန်လှုဲလှာ်လေဝ် ဟွံကြေပ်ဂြတ်ဗီုကၠာတေံရတုဲ ဣစဳကဵုကောန်ကၟိန်ညးၜါ မံၚ်အာဗွဲတသိုက်ရ။

လောန်အာမွဲၜါသၞာံတုဲ လပါ်မိဇမ္ပါဏံလေဝ် ဟွံဂွံဆဵုကဵုကောဗၠာဲဇကုသၞာံဗွဲမလံလရတုဲ ဗှ်သၞာဗွဲမလောန်ကွေံကွေံရ၊ ဆဂး ဂွံအာဂၠာဲကောဇကုနွံဒၟံၚ်ဒၞာဲဍုၚ်ကွာန်ဌာန်ရးလဵုဂှ်လေဝ် ဒၞာဲဒၟံၚ်ချိုတ်ချိုတ်ပၠိုတ်ပၠိုတ်ဟွံမွဲတုဲ သွက်ဂွံအာဂဗဆဵုကဵုကောဇကုဂှ် ဒှ်တၚ်ဝါတ်ဂါတ်ဗွဲမလောန်ရ၊ ဆဂး ဟိုတ်နူမိဇမ္ပါဘာတုဲလပါ်သွာၚ်အ္စာပရိုၚ်ကီုဂှ်ရ− ဒှ်အခေါၚ်သွက်ဂွံအာဂၠာဲကောဇကုမွဲ ဂွံအာဌာန်ဇဳၜဳကၠောံအခေါၚ်နွံတုဲ မိဇမ္ပါလေဝ်ဖျေံသ္ကုတ်သွာတ်သွက်ဂွံအာဂၠာဲကောဇကုဂှ် စပဠေဝ်ကပေါတ်ရ။

ဟွံလအ်ဟေၚ် မိဇမ္ပါပတဝ်ဏာဍုၚ်လ္ဂုၚ်တေံကၠာတုဲ ဟွံလအ်စိုပ်အာလ္ဂုၚ်တေံရ၊ ဆဂး ဗီုလဵုဂွံစဂၠာဲကောဇကုဂှ်လေဝ် ဍာန်ပိုတ်ကသပ်ကၠက်ဒၟံၚ်တုဲ ဖျေံသ္ကုတ်သွာတ် သၟာန်အာသိုက်သိုက်နူစဒၞာဲမံၚ်ကောဇကုမပြၚ်နၚ်လဝ်လိက်ကၠာကၠာတေံရ၊ နူဂှ်မွဲကဆံၚ်သၟာန်အာသိုက်သိုက် အခိၚ်အိုတ်လုပ်အာဂၠိုၚ်ကဵုဂိတုကီုရ၊ နူစပ္ဍဲဍုၚ်ဂှ် သၟာန်ဗက်တိတ်အာမ္ၚးဍုၚ်တေံသိုက်သိုက်တုဲ စိုပ်အာကွာန်ရးမွဲဂှ်ရ၊ အဃောမိဇမ္ပါကွာ်ကၠုၚ်ဂှ် ဂွံဆဵုကောန်တာဲနွံသ္ကဲဍာန်မွဲမတုဲ လုပ်အာသၟာန်သၟုက်စညိညဂှ် ဂွံဆဵုကေတ်သၟတ်တြုံမွဲ တဲပါဲလေဝ်ပိုတ်မံၚ် ဇိုၚ်ပါဲလေဝ်လီုဓဇက်မံၚ်ဂှ် အဃောဗၠအ်ဒၟံၚ်ကဠာကွဳလိုန်ဓါတ်ရ။

မိဇမ္ပါဂစိုၚ်လုပ်အာပ္ဍဲကောန်တာဲဂှ်ဗက်တုဲ လပါ်သၟတ်တြုံနွံပ္ဍဲကောန်တာဲအဃောဗၠအ်မံၚ်ကဠာကွဳဂှ်ဂတမုက်ကၠုၚ်တုဲ ညးၜါဆေၚ်မုက်ဗက် မိဇမ္ပါတီကေတ်ဟဂှ်ရ−ဣဏံဂှ်ဒှ်ကောဇကုသိုက်ဆာန်မွဲပေၚ်ပေၚ်ရ၊ လဝါဲဂှ် မိဇမ္ပါသၟာန်တိုန်ဂံၚ်ဂံၚ်ရ။

"ဣဏံဂှ် ယၟုသိုက်ဆာန်ရသေၚ်ဟာ" "ယွံ ယွံ အဲယၟုသိုက်ဆာန်ရလေဝ်" "မုဒေံနွံဗၟိက်ကဵုအဲဂွံပဠေဝ်ဗၠအ်နွံရော လဴညိဒေံဗြဴ"၊ "အဝ် ကျာ်ဓရ်သၚ် ဣဏံဂှ် ဒှ်ကောအဲသိုက်ဆာန်ရသွံၝာဲ" လဝါဲဂှ် မိဇမ္ပါဟီုတဴပၠန်ရ၊ အဲဝွံ ဒှ်ဒေံဝုတ်ကော မိဇမ္ပါရလေဝ်၊ ကောသမ္တီဟွံဒးပုဟ်ဟာ? လဝါဲဂှ်ဟေၚ် နာဲသိုက်ဆာန်လေဝ်ဍာ်ရမတ်ဒတုံပြး လပါ်မိဇမ္ပါလေဝ်ဗြဲဍာ်ရမတ်ပြးကီုတုဲ ညးၜါကောကဵုဒေံလုပ်ဗန်ညးသ္ကံဗွဲမအောန်စိုတ်ဇၞော်ကဵုဒြဟတ်ရ။

ညးၜါကောကဵုဒေံ တက်ကျာသၟာန်သၟုက်ဟိုတ်ပရူပရာတဲပိုတ်ဇိုၚ်ဒးလီုဓဇက်ကောဂှ်၊ လောန်ကၠုၚ်ၜိုတ်စှ်သၞာံတေံ ဟိုတ်နူပ္ဍဲရုၚ်ကမၠောန်မွဲဒၞာဲတေံ ကြေပ်ဒးစက်ပသဲတုဲ တဲပါဲလေဝ်ဒးကုတ်ထောံ ဇိုၚ်လေဝ်လီုဓဇက်ကၠုၚ်ဂှ်ကီု၊ ညးၜါကောကဵုဒေံပံက်သြိုဟ်ကျာညးသ္ကံၜိုတ်ထေက်ကြိုက်ကဵုအခိၚ်တုဲဗက် မိဇမ္ပါဟီုတဴကဵုကောဇကုသာ်ဝွံရ၊ -- ယွံကောသိုက်ဆာန် လၟုဟ်ဘဝကောၜိုန်ဝယ်လီုတဲပိုတ်ဇိုၚ်ဓဇက်ကီုလေဝ် ကောလ္ပဂွကဵုညးတၞဟ်ညိ၊ ကောဗက်စဴကၠုၚ်ကရောံဒေံဏံအာမံၚ်ပ္ဍဲကွာန်ပိုဲတေံညိ၊ အတေံဣစဳပိုဲလေဝ်ဗှ်မံၚ်သၞာကောဗွဲမလောန်ကွေံကွေံရ၊ လၟုဟ်ဒေံဏံလေဝ် ဟိုတ်နူအရီုဗၚ်နူမသြန်ကောမွဲတုဲ ဒေံဏံလေဝ်ဘာတုဲဂွံကၠုၚ်တဆိပ်ကြာသီုၜါတၞး ဒှ်ကၠုၚ်အ္စာဂဥုဲ သီုဂွံဒှ်အ္စာပရိုၚ်မွဲယျဏောၚ်၊ မုလ္ပဂွိၚ်ညိဏးကောသိုက်ဆာန်၊ သိုက်ဆာန်မွဲသီုဍာ်ရမတ်ဇွောဝ် နရမ်သာၚ်ဂတဝ်ဂတဝ်ဂှ် "ယွံယွံဒေံဗြဴ ကောဏံမိပ်စိုပ်ဗွဲမလောန်ကွေံကွေံရ"။

ညးၜါကောကဵုဒေံ ဗိုၚ်ကပှ်ကပေါတ်တုဲဗက် ကလေၚ်စဴကၠုၚ်ကွာန်ရးမန်ဇကုတုဲ သုၚ်စောဲအာဘဝဗွဲသဘာဝရ၊ −−−− (အုပ်နိဂီု) ။ #တိုက်ဗှ်လိက်ဝိညာဏ်ထဝ်