ဂၠိဂၠိပန်တၚ် ပံက်တြၚ်ဘဝပိုဲ

ဂၠိဂၠိပန်တၚ် ပံက်တြၚ်ဘဝပိုဲ −

(ဗဟုသုတဗှ်ဝေၚ်လၟေၚ်တ္ၚဲ) − မအရေဝ် "ချပ်တုဲဟီု ကေုာံ လုပ်ကၠောန်နဇိုၚ်နတဲခိုဟ်နူလဟီုဏီ" ဏံဝွံ ဇၟာပ်ညးအဲလေဝ် ကေၚ်မိၚ်ကေၚ်ဗှ်လဝ်နွံကီုလေဝ် ဆဂး မၞိဟ်ဂွံကၠောန်ဗဒှ်ဂွံဗီုမအရေဝ်ဏံဂှ် နွံအောန်ကွေံကွေံတုဲ ဟိုတ်သာ်ဏံဟေၚ် ပူဂဵုဗွဲမဂၠိုၚ်တ္ၚအ်ဟီုသၟးဂၠိုၚ်တဴ။

ပိုဲတံဒးတီလဝ်မွဲဂှ်တှ်ေ အရေဝ်ဂှ်ဖအောန် ကူချပ်ကဵုဂၠိုၚ်ဂၠိုၚ်မ္ဂးတှ်ေ ဒှ်နဲကဲသှ်ပလးပြသၞာဂွံခိုဟ်အိုတ်မွဲနဲဟေၚ်၊ သဘာဝသိုၚ်မာန်ပတိုန်လဝ်ပိုဲဏံနွံကဵုသၠကတောဝ်ၜါလပါ် တုဲတှ်ေ နွံဆပါၚ်မွဲ၊ ဟိုတ်သာ်ဏံဟေၚ် ပိုဲဏံဒးကလၚ်ကဵုဂၠိုၚ်ဂၠိုၚ်တုဲ လဟီုဒးဖအောန်လဝ်ညိ၊ ဆဂး မၞိဟ်ဗွဲမဂၠိုၚ်လေဝ် ကလေၚ်ကၠောန်သ္ပဗဒှ်ဒစဵုဒစးကဵုမွဲလပါ်ဏံတုဲ "နွံဆဟီုဂၠိုၚ်သၟး မုဟွံကလၚ်ညးတၞဟ်ဟဂှ်"။

၁။ (ကူချပ်ဗ္စာရဏာကၠာဟွံဂွံဟီုပ္တိတ်ဏာ) ။ ။ မၞိဟ်တၠပညာ ပူဂဵုနွံကဵုလညာတ်ညာဏ်သၠုၚ်ပြဲတံဂှ် နူကၠာဟွံဂွံဟီုပ္တိတ်ဏာဏီဂှ်တှ်ေ ညးတံကူချပ်ဗ္စာရဏာပါ်ပါဲချိုတ်ချိုတ်ပၠိုတ်ပၠိုတ်တုဲမှဟီုဏာမာန်၊ ယဝ်ဒှ်သာ်ဏံ ဣဏံဟေၚ်ရဂှ် သိုၚ်မာန်ဗဒှ်ကဵုရုပ်ရဴပ္ဍဲပူဂဵုဂှ်ဂှ် ဗီုလဵုညးဂမၠိုၚ်စွံၚုဟ်မးမာန်၊ ဒးဍာံစၟတ်မွဲဂှ်တှ်ေ ဇၟာပ်ညးတံမဟီုပတိတ်ဏာဂှ် မၞိဟ်ဗွဲမဂၠိုၚ်ကလၚ်ဒုၚ်တဲဖအိုတ်မာန်၊ ဟိုတ်ဒှ်သာ်ဏံတုဲ ဇၟာပ်ညးအဲလေဝ် နူကၠာဟွံဂွံသ္ဂုတ်သွာတ်ဟီုပတိတ်ဏာနူသၟန်ပါၚ်ပိုဲဏံဏီဂှ် ဒးကူချပ်ပါ်ပါဲကဵုကၠးဖ္ဍးဗွဲမနွံကဵုဟိုတ်ဖဵုတုဲဟီုဏာမ္ဂးတှ်ေ ဣဏံဂှ် ဒှ်သ္ဂုတ်သွာတ်သွက်ဘဝအနာဂတ်ပိုဲဏံရလေဝ် ဟီုဂွံမံၚ်ဏောၚ်။

၂။ (လ္ပစွံလဝ်တိုၚ်ပ္ကဴပ္ဍဲသွအ်လ္ပံသၟးတုဲ စကၠောန်နဇိုၚ်နတဲညိ) ။ ။ ဇၟာပ်ညးအဲလေဝ် ဒးၚုဟ်ကတဵုနူသ္ပအ်လ္ပံဂှ်အိုတ်ညိတုဲ ပ္ဍဲဘဝဇေတ်ဇေတ် ပ္ဍဲနဂတမတ်ပိုဲဏံဇေတ်ဇေတ်ဂှ် ဒးစကၠောန်ဗဒှ်အရာမွဲမွဲ ညံၚ်ဂွံစိုပ်အာတိုၚ်ပ္ကဴဂှ်ညိ၊ ယဝ်သာ်ဏံဟွံသေၚ်တှ်ေ ပိုဲဏံဂွံသဒှ်မၞိဟ်ဍိုဟ်ကေက်ဂတာပ်အခေတ်မွဲမာန်ဂှ်ဟွံလောဲသွာ၊ ပိုဲလ္ပထံက်က္ၜံၚ်ဂ္ဇံၚုၚ် လ္ပသရုၚ်ထၜက်ထောံတ္ၚဲဂိတုသၞာံအိုတ်ညိ၊ ဇၟာပ်ဇၟာပ်စက္ကမိဏေတ်နာဍဳသွက်ဘဝဟီုဂှ် နွံကဵုၚုဟ်မးလၟိုန်လၟိုန်ဏောၚ်။

၃။ (ဒးကပှ်ဂိုၚ်တၚ်ဂၞၚ်ကီု) ။ ။ လဆောဝ်တှ်ေ ဒၞာဲပိုဲဒးကလၚ်ညးတၞဟ်လေဝ်နွံကီုဂှ် ဟိုတ်ပိုဲဂွံကလၚ်ညးတၞဟ်ဂၠိုၚ်ဂၠိုၚ်တုဲ သီုပိုဲဂွံနၚ်တၚ်ဂၞၚ်နဲကဲနာနာကီု သီုပိုဲဏံလေဝ် ဒှ်ကၠုၚ်မၞိဟ်ကလၚ်ညးတၞဟ်ခိုဟ်မွဲဏောၚ်၊ ယဝ်ပိုဲကလၚ်ညးတၞဟ်ဂၠိုၚ်က္ဍၚ် ပဵုတုဲပိုဲဏံဂွံပကောံတၚ်ဂၞၚ်နဲကဲနာနာစုၚ်ဇဳဂတာပ်အခိၚ်မာန်၊ ဟိုတ်သာ်ဏံဟေၚ် ပိုဲဂွံအခေါၚ်ဗဂဵုလဟဵုပ္ဍဲဘဝပိုဲဏံမာန်ဗွဲမပြဟ်ပြေဟ်ကွေံကွေံဏောၚ်။

၄။ (လ္ပဒိုအ်ညိၚ် ဆက်ကွာ်အာဂတဂတလၟိုန်) ။ ။ အခိၚ်ဟီုမ္ဂးဂှ် ညးလဵုမွဲလေဝ်ဍေံဟွံမၚ်လဇပုဟ်၊ ယဝ်ရပိုဲဟွံမိက်ဒှ်မၞိဟ်ကွာ်ကလေၚ်ဆုတ် ကေုာံမၞိဟ်ကွာ်ညိၚ်မံၚ်မွဲဒၞာဲဓဝ်ဏောၚ်တှ်ေ ပ္ဍဲဘဝပိုဲဏံလေဝ် လ္ပဒိုအ်ဗဂဵုလဟဵုအိုတ်ညိ၊ မုအရာတၟေၚ်တၟိနွံဂှ် ပိုဲဒးဗဒှ်ဂံၚ်ကွာ်လုပ်စုက်အာကဵုအရာတၟိတၟိတံဂှ်တုဲ ဟိုတ်နူအရာတၟိတၟိတံဏံဂှ် ဗဒှ်ကဵုဘဝပိုဲနွံကဵုအနာဂတ်သွက်ဘဝ။

သီုဖအိုတ်ပန်တၚ်ဂၠိဂၠိဂှ် ဗဒှ်ကဵုဘဝပိုဲတံ ဂွံကၠိုဟ်တီဂတာပ်နူညးတၞဟ်တုဲ ဘဝဂှ်လေဝ် ညိၚ်ဝတ်ဆဵုကၠးကၠုၚ်ကွေံကွေံနဂတမတ်မာန်၊ အိုတ်ကၞောတ်ဟေၚ် ဗွဲတၟေၚ်ပိုဲဏံဂွံဒှ်ကၠုၚ်မၞိဟ်ဂတာပ်အခိၚ်ဂတာပ်အခေတ်မွဲအကြာညးဂၠးဏောၚ်။ အဲဝေတ်ဒၠောံဗတောန်ဒၟံၚ်ညးတၞဟ်ဟွံသေၚ်တုဲ နဇကုအဲဏံဟေၚ် မ္ဒးဝေတ်ဒၠောံဗတောန်မံၚ်ဏောၚ်၊ ယဝ်ဖဵုနွံသွက်ဘဝညးဂမၠိုၚ်တံကီုတှ်ေ ဒုၚ်ဝေတ်ဒၠောံဗဝောာန်ကီုလေဝ် မုဟွံဗျိတုဲ ဗဂဵုလဟဵုအာဘဝညဳညဳသာသာစိုအ်။

−−−−−−−−−− play stoe−https://play.google.com/store/apps/details... မွဲနဲပၠန်ဂှ်တှ်ေ

apk သွက်ဖုၚ် Android တံတှ်ေ တံၚ်ပတိုန်စုတ်ပ္ဍဲဖုၚ်ညိ။ https://app.box.com/file/971542165210... − သွက် ios - Windows - iPad - iphone - tablet တၞဟ်တၞဟ်တအ်ဂှ်တှ်ေ လုပ်ပံက်ကေတ်တိုက်ရိုက် Application website ဏံညိ။ https://sites.google.com/.../13jk9kcdHxIoapwyHPotX0I.../edit