ကလော်နွံပ္ဍဲစိုတ် (ဗဟုသုတ)

ကလော်နွံပ္ဍဲစိုတ် (ဗဟုသုတ) နွံအိန်ထံၚ်မွဲ ညးၜါတြုံကဵုဗြဴဂှ်သ္ဍိုက်ဆာန်ညးသ္ကံကွေံကွေံတုဲ သမ္ဘာညးတေံဗ္ကန်လဝ်ကဵုတြုံညးတေံဂှ်တှ်ေ၊ စိုပ်မွဲတ္ၚဲ ယဝ်အဲချိုတ်အာကၠာဇကုတှ်ေ ဇကုကေတ်ဗြဴတၟိမ္ဂး အဲဟွံဗလးဇကုတုဲ ဗက်ဘပဠဒၟံၚ်နနဲနာနာသာ်ဏောၚ် မိၚ်ဟာ။

လောန်အာၜိုတ်စှ်သၞာံဂှ် မဂဳညးတေံချိုတ်အာကၠာတုဲ ညးတေံလေဝ် ဂိုၚ်ဒေပ်လဝ်သစ္စလ္တူမဂဳညးတေံ ဟွံကေတ်ဗြဴတၟိရ၊ လအ်အာၜိုတ်မွဲသၞာံဂှ်ဟေ

ၚ် ညးတေံဆဵုသၟတ်ဗြဴတၟိမွဲတုဲ စိုတ်ဆာန်ဒှ်ကၠုၚ်ဗက် သွက်ဂွံထပ်ထဲတၟိမွဲဝါပၠန်ဂှ် ဆိၚ်ဆလဝ်တ္ၚဲဂိတုနွံရ။

စနူဂှ်တုဲ အခိၚ်ညးတေံတိက်ဗ္တံတှ်ေ ကလော်ဗြဴဇၞော်ညးတေံကၠုၚ်ဘပဠဒၟံၚ်ဇၟာပ်ဗတံရ၊ ကလော်ဗြဴဇၞော်တေံကၠုၚ်ကသေဲမံၚ်ပ္ဍဲကတောဝ်ညးတေံဂှ်တှ်ေ "ဇကုမုကၠောန်ကၠောန် ဒၞာဲလဵုအာအာဂှ် အဲတီမံၚ်ဖအိုတ်ရ−ဇကုဟလေဝ်ထောံအဲဟွံဂွံပုဟ်" ကလော်ဗြဴဇၞော်

ညးဘပဠတဴသာ်ဏံ။

ညးတေံလေဝ်တိက်ဟွံလှိၚ် ဇြာဲဇြေဟ်ကှ်ကၠုၚ်သိုက်သိုက်တုဲ နွံကာလမွဲတ္ၚဲဂှ် သ္ကံရဲညးတေံဆဵုဒးရဲဇကုဇြာဲဇြေဟ်ကှ်မံၚ်တုဲ သၟာန်စပရူပရာရဲဇကုဗက် တီကေတ်ဟိုတ်ဖဵုသာ်ဝွံတုဲ ရဲညးတေံကဵုကသပ်မွဲရ၊ ယွံရဲ−တေလ္တူဒဵုတေံမွဲဒၞာဲ နွံကွာန်ရးမွဲဍောတ်ဂှ် ခမဳမွဲဇကုနွံပ္ဍဲဘာဂှ်တုဲ ရဲအာကေတ်ကသပ်ကဵုခမဳဂှ်ညိ။

ဟွံမၚ်လအ် ညးတေံတိုန်အာလ္တူဒဵု စိုပ်အာကွာန်ရးဍောတ်ဘာခမဳဂှ်ရ၊ ဟိုတ်နာနာ ညးတေံလဴကဵုခမဳဂှ်ဖအိုတ်တုဲ ခမဳဂှ်တီကေတ်ဟိုတ်ဖဵုဗွဲမကၠးဖ္ဍးဟေၚ် ကလေၚ်ဟီုကဵုညးတေံသာ်ဝွံရ၊ "ယွံဒကာဘာ ကသပ်အဲဏံကေတ်ညိ၊ စိုပ်အခိၚ်ဗ္တံ ယဝ်ကလော်ဗြဴဇၞော်ဒကာကၠုၚ်တှ်ေ ဗွဲမနွံကဵုသတိ-ဒကာသၟာန်ဍေံစမ်ညိ၊ ဗ္တဳမွဲခေါ်ဏံဝွံ နွံလၟိဟ်မူစိမရော? သၟာန်ကလော်ဗြဴဇၞော်ဒကာဘာညိ၊ ယဝ်ကလော်ဗြဴဇၞော်ဒကာဘာသှ်ဟွံဒးတှ်ေ ဒကာဘာမာန်တုဲ ဒကာဘာစှ်ေဒၞာဲကေတ်ဗြဴတၟိဂွံရဂှ် သာ်ဏံတက်လဝ်ကျာကၠာညိ"။

ညးတေံဂွံကသပ်ခမဳဗၠာဲဂှ်ဗက် ကလေၚ်စဴကၠုၚ်သ္ၚိဇကုရ၊ စိုပ်အခိၚ်ဗ္တံဂှ်ပၠန် ညးတေံကၠာဟွံလှိၚ်ကဵုလှိၚ်ဟေၚ် ကလော်ဗြဴဇၞော်ညးတေံ

ကၠုၚ်ပၠန်ရတုဲ သီုဍေံဟီုသာ်ဏံရ၊ “တ္ၚဲဏံဇကုအာစိုပ်ပ္ဍဲဘာတေံ အာကေတ်ကသပ်ကဵုခမဳဗၠာဲဂှ် ခယျအဲဟွံတီဟာ” ကလော်ဗြဴဇၞော်ညးတေံဘပဠပၠန်ရ၊ ဓဝါဲဂှ် ညးတေံဂွံသတိဗက် ဟီုကဵုကလော်ဗြဴဇၞော်ညးတေံ ဗီုခမဳဗၠာဲမဗကန်လဝ်ဂှ်ရ၊ “ဟေကလော်မဂဳအဲ - ပိုဲညးၜါ ဒးပြိုၚ်ဝေၚ်မွဲမွဲတုဲမှ ယဝ်အဲကျအာမ္ဂးတှ်ေ အဲဟွံကေတ်ဗြဴအတိုၚ်မွဲဘဝစဵုကဵုချိုတ်ရ၊ ယဝ်ရကလော်မဂဳအဲကျမ္ဂးတှ်ေ အဲအခေါၚ်ကေတ်ဗြဴတၟိဂွံရ။” သာ်ဏံ ညးတေံကဵုဥပ္ပါဲတုဲ

ကလော်ဗြဴဇၞော်ညးတေံဒုၚ်တဲရ၊ သာ်ဂှ်တှ်ေ အဲသၟာန်ဏောၚ်ဏး “မဗတဳမွဲခေါ်ဏံဝွံ နွံတဴမူစိမရောဂှ် တီဟာ?” ဇေတ်ဇေတ်ဂှ်တှ်ေ ညးတေံလေဝ် ဟွံဂွံရိုဟ်လဝ်လၟိဟ်မဗတဳဂှ်တုပ်တုပ်ရ။ (ဗဟုသုတဏံဝွံ လဴကဵုပိုဲကောန်ဂကူတံဂွံကၠိုဟ်ခၠၚ်သၚ်လှက်မွဲဂှ်တှ်ေ စိတ္တ “စိုတ်” ဏံဟေၚ်ရဂှ် ဘပဠဇဴဇာပ်မံၚ်ပိုဲဏောၚ်ဂှ်လေဝ် ဒးဂွံသတိအိုတ်ညိ၊ အရာလဵုသဘာဝဂှ် ကလော်ဒေဝတဴအိန်ဗြီုလဵုမွဲလေဝ် စဵုတာဒၞာဟွံမာန်ပုဟ်၊ သီုဖအိုတ်ဂှ်အရာနာနာသွက်ဘဝအဃောမဂျိုၚ်ဒၟံၚ်ဏံဂှ် စိုတ်မွဲဟေၚ် ညံၚ်ဂွံမာန် ညံၚ်ဂွံနွံကဵုဟိုတ်ဖဵုခိုဟ်ခိုဟ်ဂှ် ဒှ်အဓိကလၟေၚ်မွဲရ)။

(မာရ်−မာ) သၟိၚ်မာဂှ်လေဝ် ဍေံနွံဒၟံၚ်ပ္ဍဲစိုတ်နာဲပိုဲဗုဒ္ဓရတုဲ ဟိုတ်နူနာဲပိုဲဗုဒ္ဓမာန်စိုတ်ဂှ်ရ−ကော်စမာန်သၟိၚ်မာရ် (သၟိၚ်မာ) ဗီုပိုဲတံမကၠိုဟ်လဝ်စိုတ်တံဂှ်ရ၊ ဇေတ်ဇေတ်ဂှ်တှ်ေ နာဲပိုဲဗုဒ္ဓ ညးမာန်စိုတ်ညးတုဲ အရာလဵုမွဲဂှ် ပလီုပလာ်ကဵုညးဟွံမာန်ပုဟ်၊ မာန်စိုတ်ပိုဲဂှ် မာန်ဆသၟိၚ်မာရ် မာန်ဆကလော်သၟးဟွံသေၚ်တုဲ မၞိဟ်နွံမွဲအလုံလ္တူဂၠးတိဇၞော်ဏံဂှ် မာန်အိုတ်တးလောဲလောဲဏောၚ်။

(ယဝ်ဖေက်မံၚ်သၟး စာ်စ္ဍးအာနူဓရ်သတိဟိုတ်ဖဵုမ္ဂးတှ်ေ လ္တူဂၠးတိဏံလေဝ် ဒၞာဲလဵုအေပ်ဗ္ဒဂြောပ်ဗ္ဒန်လဝ်ဟွံဂွံပုဟ်၊ စိုတ်တေံညံၚ်ဍေံဆဵုမံၚ်ဖအိုတ် ဟိုတ်နူဖေက်ၜက်အာဟၟဲကဵုဟိုတ်ဖဵုဟီုဂှ် ဣဏံရ)။ #တိုက်ဗှ်လိက်ဝိညာဏ်ထဝ်