ကမ်ခိုဟ်ဖဵုခိုဟ် ကမ်ပရေံဖဵုပရေံ ဒှ်ကွေံဟာ ? --- ကမ်ခိုဟ်ဖဵုခိုဟ် ကမ်ပရေံဖဵုပရေံဟီုဂှ် (ကၠောန်ခိုဟ်ဂွံခိုဟ် ကၠောန်ပရေံဂွံပရေံ)မဒှ်ရ၊ ဗွဲကၠာအိုတ် ပိုဲတံဒးတီဒးကၠိုဟ်လဝ်စိုတ် "ကမ်ကေုာံဖဵု"
ဏံညိ၊ ကမ်ဟီုဂှ် မဒှ် (ကမၠောန်ကေုာံဟိုတ်)မွဲမွဲရ၊ "ဖဵု" ဂှ်ပၠန် "မထ္ၜးရုပ်ရဴနူကမၠောန်မကၠောန်လဝ်ဟိုတ်နာနာ" ဂှ်ဟေၚ်။ ညံၚ်ရဴပိုဲတဵုမကြုက်ဂှ်"ကမ်"၊ ဂွံတဴသတ်ကြုက်ဂှ်"ဖဵု"၊ ဗွဲမဂၠိုၚ်တှ်ေ ဟီုစိုပ်အာကမ်ဝွံမ္ဂး ဘဝနူအာတိက်တေံ မကၠောန်ကၠုၚ်လဝ်တံဂှ်ဂှ် ပ္ဍဲဘဝပစ္စုပ္ပန်လၟုဟ် မ္ဒးဒးဒုၚ်ဇီုကပိုက်ထ္ဍိမြိကၠုၚ်ပ္ဍဲဘဝပိုဲ သာ်ဏံဗွဲတုန်။
ယဝ်ရဒးဟီုဂၠိဂၠိ မုဟွံဒးချပ်တဴမွဲသာ် လ္ပသုၚ်စောဲကၠေၚ်က္ဍဟ်မ္ဂးတှ်ေ "ကမ်ခိုဟ်ဖဵုခိုဟ် ကမ်ပရေံဖဵုပရေံဂှ် နွံတဴကွေံကွေံရ" သာ်ဏံ ဂံၚ်ဟီုတဴထတ်ထတ်တုဲ ဆဂး ဗီုလဵုပူဂဵုသာမညဓမ္မတာ ဗီုရဲညးအရာပ်ကွာန်တံမွဲ ဂွံကၠိုဟ်ကၠးအးအာတပ်တပ်ဓဝ်ဓဝ်သောၚ်သ
ောၚ်ပ္ဍဲစိုတ်ညးတံမာန်ဂှ် ဆက်ဗှ်ဏာပိုဒ်သၟဝ်တေံပၠန်ညိ။ − ညံၚ်ရဴသၟာကၠောန်ဝါဗ္ၚတံကီု သြောံမဂြာတ်တဵုလဝ်သၞာံဏံဂှ် ဂိုၚ်ဒေပ်စွံလဝ်ပ္ဍဲဟၚ်ဟွံစဏီတုဲ ဒှ်သွက်သ္ဂောံစသုၚ်သ္ပပြဘိုက် သွက်ယးသၞာံတေံဟေၚ်ရ၊ တုဲပၠန် သြောံသ္ၚုပိုဲတံမစသုၚ်သ္ပမံၚ်ပြဘိုက်လၟုဟ်ပစ္စုပ္ပန်ဝွံဂှ် ဒှ်သြောံမဂိုၚ်စွံလဝ်နူသၞာံမလောန်ကၠုၚ်တေံရဟွံသေၚ်ဟာ၊ ဟိုတ်ဒှ်သာ်ဂှ်တုဲ ဘဝပိုဲတံညးဂမၠိုၚ်လေဝ် ညံၚ်ရဴဥပမာဝွံကီုတုဲ --- ပွမဒးဒုၚ်ဇီုကပိုက်ကဵုပြသၞာနာနာ ဝေဒနာနာနာ အန္တရာယ်နာနာ ဗီုညးတၞဟ်ဒှ်ဇကုဟွံဒှ်၊ ဗီုညးဂမၠိုၚ်ဂွံပၠန် ဇကုဒးဟောံဆောံလေၚ်ဒိုက်အာတုဲ ပြသၞာဗွဲဂၠိုၚ် လုပ်ဇီုကပိုက်ပ္ဍဲဘဝလၟေၚ်တ္ၚဲဂှ်ဟွံပိုတ်သ္ကုတ်၊ လဆောဝ်တှ်ေ ဣဏံ မကော်ခဴစ "ကမ်" နူအတိက်တေံ ဍေံကဵုကၠုၚ် "ဖဵု" ပ္ဍဲပစ္စုပ္ပန်တ္ၚဲဏံလေဝ် ဒှ်မာန်ရ။
နူအတိက်မကၠောန်လဝ်ပရေံဟွံခိုဟ် ကမ်ဟွံခိုဟ်တံဂှ် ဍေံကၠုၚ်ကဵုဖဵုပ္ဍဲပစ္စုပ္ပန်ဏံလေဝ် ဒှ်မာန်ရ၊ တုဲပၠန် သွက်ညးကၠောန်ပရေံ ကမ်ပရေံပ္ဍဲပစ္စုပ္ပန်လၟုဟ်ဏံပၠန်− လ္ၚဵုဂှ် ဍေံကဵုဖဵုလဝါဲဏံတုဲ ဒးဒုၚ်ဒုဟ်ရာဇာဝတ်, ဓမ္မဝတ်, လောကဝတ် ဒးဒုၚ်အာပ္ဍဲဘဝလၟုဟ်လေဝ်နွံရ၊ ဟိုတ်သာ်ဏံဂှ် ဒၟာနူကမ်အတိက်ညးတံပရေံ ဟဂှ်ဟွံသေၚ်တှ်ေ ဟိုတ်နူကမ်အတိက်ညးတံဟၟဲ သာ်ဏံဗွဲတုန်၊--- လ္ၚဵုဂှ်ပၠန် ဟိုတ်နူကမ်အတိက်တေံ သှ်ေၜက်နွံကၠောန်လဝ်ခိုဟ်ခိုဟ်တုဲ ဂွံသုၚ်စောဲပ္ဍဲပစ္စုပ္ပန်ဏံဟေၚ်ဂှ်ရ− ကမ်ညးတံမကၠောန်လဝ်လၟုဟ်ပစ္စုပ္ပန်ဏံဂှ် ညးတံဟွံဒးဒုၚ်ဇီုကပိုက်ဟေၚ်ရ၊ ဆဂး ၜိုန်ရဟွံဒးဒုၚ်ကီုလေဝ် သွက်အနာဂတ်တေံ ညးတံဒးဒုၚ်ဟေၚ်ပၠန်ရ။
ပစ္စုပ္ပန်ဏံ ပိုဲတံဂွံဆဵုမၞိဟ်လ္ၚဵုတံ ၜိုန်ရလီုဠာန်တ္ၚံက်စၞာဲကီုလေဝ် ညးတံဒှ်မံၚ်သေဌဳ သိုက်လောဲတ္ၚဲကၟိုၚ်ကယျာအာဟၟဲ၊ ဣဏံ ဟိုတ်နူကမ်အတိက်ညးမကၠောန်လဝ်ခိုဟ်ခိုဟ်သှ်ေနွံဒၟံၚ်တုဲ ဘဝပစ္စုပ္ပန်ဏံဟေၚ် ညးတံဂွံဒုၚ်စသိုၚ်တသိုက်ဖဵုအသိၚ်ကမၠောန်ညးတံ
နူအတိက်နွံဒၟံၚ်တုဲ ပစ္စုပ္ပန်တ္ၚဲဏံ ကမ်ညးကၠောန်လဝ်ဗၠေတ်ဗၠေတ်ဟွံခိုဟ်တံဂှ် ဟွံဒးဒုၚ်ရ၊ လဆောဝ်တှ်ေ ပ္ဍဲပစ္စုပ္ပန်ဏံလေဝ် အသိၚ်ကမ်နူအတိက်တေံအိုတ်အောန်ကၠုၚ်မ္ဂး ပစ္စုပ္ပန်ဏံလေဝ် ကမ်မကၠောန်လဝ်ပရေံတံဂှ် ဍေံထ္ၜးကၠုၚ်ကဵုဖဵုမာန်ရ၊ ဆဂး ၜိုန်ရဟွံဒးဒုၚ်ကီုလေဝ် သွက်ဘဝဂတအနာဂတ်တေံဂှ် ဒးဒုၚ်ကမ်ပရေံမကၠောန်လဝ်ပ္ဍဲပစ္စုပ္ပန်ဏံဗွဲစၟတ်ရ။
ယဝ်ရသရောပ်ထောံဂၠိ
ဂၠိမ္ဂးတှ်ေ (ကၠောန်ခိုဟ်ဂွံခိုဟ် ကၠောန်ပရေံဂွံပရေံ) ဂှ် နွံတဴကွေံကွေံတုဲ၊ အသိၚ်ဍေံကဵုဖဵုခိုဟ်ပရေံဂှ် လအ်ကဵုပြဟ် ပစ္စုပ္ပန်ဟွံသေၚ် အနာဂတ်ဂှ် ဂွံဒုၚ်ကေတ်ပေၚ်ပေၚ်ရ၊ ဟိုတ်ဒှ်သာ်ဝွံတုဲ သီုဖအိုတ်မဟီုကၠုၚ်လဝ်တံ ၜိုန်ရထ္ၜးရုပ်ရဴ နဇိုၚ်နတဲဟွံမာန်ကီုလေဝ် နဒဒှ်ပိုဲတအ်ဒှ်ကောန်ဗုဒ္ဓဘာသာမွဲမ္ဂး သွက်ဘဝဟီုဂှ် ဇၟာပ်အရာနာနာ "လ္ပသာသ္ပံ" တုဲ နကဵု "ကမ် ညာဏ် ဝဳရိယ" ခိုဟ်ခိုဟ် ဟွံဂၠိုၚ်ဟွံၜက် ဟွံဂၠိၚ်ဟွံဂၠိ ယဝ်ရသုၚ်စောဲၜိုတ်တီဖ္ဍိုက် ချတ်ဖက်နှဴဒးအခိၚ်ကာလဒေသမ္ဂးတှ်ေ အရေဝ်လ္တူတေံသီုဖအိုတ်ဂှ် လဆောတ်တှ်ေလေဝ် ဗၠေတ်ဗၠန်ဂတးဂတန်အာ ဒှ်မာန်ဏောၚ်။
ဣဏံ ဒှ်လညာတ်ပူဂဵုဓမ္မတာမွဲနဒဒှ်ကောန်ဗုဒ္ဓဘာသာ ထ္ၜးဏာလညာတ် ပါ်ပရအ်ဗဟုသုတ ဗီုမကၠိုဟ်လဝ်စိုတ်ပ္ဍဲကမ်ခိုဟ်ကမ်ပရေံ ကေုာံ သဘာဝပိုဲမၞိဟ်တံ ဒှ်ဂိဗျုယဲချိုတ် အဃောမဂေတ်တဴတရဴသံသာဏံမွဲတုဲ ယဝ်ကၠိုဟ်စိုတ်ဗၠေတ်ၜက်ပဵုယအ်အာနွံတှ်ေ သၠးအခေါၚ်တုဲ ဗိုၚ်ကဵုဂၠံၚ်ဍာန်တပ်အးမွဲတၞုၚ် ဂွံဒှ်ဖဵုခိုဟ်ညးမွဲကေုာံညးမွဲအိုတ်ညိ တၚ်ဂုန်ရအဴ ။ #တိုက်ဗှ်လိက်ဝိညာဏ်ထဝ်
コメント