၄၂၃။ ပ္ဍဲအခိၚ်ဂှ် သ္ဂောံညာတ်ကေတ် ခမဳဗြဴဟွံမွဲကဵုအၚ်္ဂဇာတ်ဂမၠိုၚ်ကီု ခမဳဗြဴမၞုံအယာံမာတ် ပၞေတ်အၚ်္ဂဇာတ်ဂမၠိုၚ်ကီု ခမဳဗြဴဥတုဟွံကၠုၚ်ဂမၠိုၚ်ကီု ခမဳဗြဴဥတုကၠုၚ်ဒၟံၚ်လၟိုန်ဂမၠိုၚ်ကီု ခမဳဗြဴမၞုံကဵုယာတ်ကသအ် ပြိုက်ချအ်ကၟာတ်လဝ်လၟိုန်ဂမၠိုၚ်ကီု ခမဳဗြဴဆီပဿဴဇွောဝ်ဒၟံၚ်ဂမၠိုၚ်ကီု ခမဳဗြဴဖျုန်ဂၠန်မဂၠိၚ်ဂမၠိုၚ်ကီု (မကေအ်ဂၠိၚ်) ခမဳဗြဴမဒှ်ဗြဴခမၞုဲဗြဴဂမၠိုၚ်ကီု ခမဳဗြဴမဒှ်ဗြဴအယောၚ် အလာတုပ်ညးတြုံဂမၠိုၚ်ကီု ခမဳဗြဴမဂ်ၜါစပ်ဒၟံၚ်ဂမၠိုၚ်ကီု ခမဳဗြဴမဒှ်ဥဘတောဗျဉ်ဂမၠိုၚ်ကီုအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ကဵုအခေါၚ်တၞဟ်နသၟာန် ဟိုတ်ဂမၠိုၚ်ၜါစှော်ပန် မလေပ်သ္ပကဵုအန္တရာယ်ကုအလံၚ်ပယျၚ်ဗြဴရ၊ ယွံခမဳတအ် ရဴဝွံဒးသၟာန်ရ။

 

“တၠအဲ ညးဟွံမွဲကဵုအၚ်္ဂဇာတ် ဟွံသေၚ်ရဟာ၊ ညးမၞုံအယာံမာတ်ပၞေတ်အၚ်္ဂဇာတ်ဟွံသေၚ်ရဟာ၊ ညးဥတုဟွံကၠုၚ် ဟွံသေၚ်ရဟာ၊ ညးဥတုကၠုၚ်ဒၟံၚ်လၟိုန် ဟွံသေၚ်ရဟာ၊ ညးမၞုံကဵုယာတ်သကအ် ပြိုက်ချအ်လဝ်လၟိုန် ဟွံသေၚ်ရဟာ၊ ညးဆီပဿဴဇွောဝ်ဒၟံၚ်လၟိုန် ဟွံသေၚ်ရဟာ၊ ညးမၞုံကဵုဖျုန်ဂၠန်မဂၠိၚ် ဟွံသေၚ်ရဟာ၊ ခမၞုဲဗြဴ ဟွံသေၚ်ရဟာ၊ ညးအယောၚ်အလာတုပ်ညးတြုံ ဟွံသေၚ်ရဟာ၊ ညးမဂ်ၜါစပ်ဒၟံၚ် ဟွံသေၚ်ရဟာ၊ ဥဘတောဗျဉ် ဟွံသေၚ်ရဟာ။

 

ယဲဂမၠိုၚ် မၞုံသဘဴရဴဝွံ နွံကုတၠအဲအိုတ်ဟာ၊ ယဲပၞီခါဲဒုတ်ကီု ယဲခ္ဍတ်ဗြိုအ်မာကီု ယဲကသံက်သၠာကီု ယဲခ္ဍက်ယဲမှတ်ကီု ယဲကြအ်ယှောတ် ခတုက်ကၠိက်ခတုတ်စာၚ်ကီု နွံဟာ၊ ဒှ်မၞိဟ် ဇေတ်ဇေတ်ဟာ၊ ဒှ်မၞိဟ်ဗြဴဇေတ်ဇေတ်ဟာ၊ ဒှ်ညးတဝ်စၞေဟ် (နူဒဒှ်ဍိက်) တုဲဟာ၊ ဒှ်ညးဟွံမွဲကဵု ဂတှ်ဟာ၊ ဒှ်ညးဟွံသေၚ်ကဵုခစသၟိၚ် ရၚ်တၠုၚ်ကေၚ်ကာသၟိၚ်ဟာ၊ မိမဂမၠိုၚ်ကီု တြုံတၠသ္ၚိကီု ကဵုအခေါၚ် ကဵုတၠအဲဟာ၊ ဒှ်ညးပေၚ်အာယုက်ၜါစှော်ဟာ၊ ဗဗေၚ်သ္ၚာ ဍိုက်ပေၚ်ကုတၠအဲဟာ၊ တၠအဲ မၞုံယၟုသာ်လဵုရော?၊ ခမဳဗြဴဥပဇ္ၛာယ်တၠအဲ မၞုံယၟုသာ်လဵုရော?” ရဴဝွံ သ္ဒးသၟာန်ရ။

 

ပ္ဍဲအခိၚ်ဂှ် ခမဳတြုံဂမၠိုၚ် သၟာန်တဴဟိုတ်ဂမၠိုၚ် မလေပ်သ္ပကဵုအန္တရာယ် ကုခမဳဗြဴဂမၠိုၚ်အိုတ်ရ၊ အလံၚ်ပယျၚ်ဗြဴဂမၠိုၚ် ရောမ်ဒညဂွဂစိုၚ်အိုတ်ရ၊ မုက်မတ်ဟွံကျေဝ်အိုတ်ရ။ ဟွံသၟဟ်ရထ တၞဟ်နသီုသှ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ကုအလံၚ်ပယျၚ် မသအးဇ္ၚးတုဲ ပ္ဍဲဘိက္ခုနဳသၚ် နပွမပယျၚ် ပ္ဍဲမွဲလပါ်ဂှ်ကဵုအခေါၚ် တၞဟ်နပယျၚ် ပ္ဍဲဘိက္ခုသၚ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် သၟာန်တဴဟိုတ်ဂမၠိုၚ် မလေပ်သ္ပကဵုအန္တရာယ် အလံၚ်ပယျၚ်ဗြဴဂမၠိုၚ် မဟဂပ်ဝ်ဒၠောံဗတောန်လဝ် ဏီအိုတ်ရ၊ အလံၚ်ပယျၚ်ဗြဴဂမၠိုၚ် ရောမ်ဒညဂွဂစိုၚ်အိုတ်ရ၊ မုက်မတ်ဟွံကျေဝ်အိုတ်ရ။ ဟွံသၟဟ်ရထ တၞဟ်နသီုသှ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ဒၠောံဗတောန်ဗွဲကိုပ်ကၠာတုဲ ကြဴမှ တၞဟ်နပွမသၟာန် ဟိုတ်ဂမၠိုၚ်မလေပ်သ္ပကဵုအန္တရာယ်ဂှ် ကဵုအခေါၚ်ရ ရဴဝွံ (သ္ဂးရ)။ ဒၠောံဗတောန်တဴ ပ္ဍဲလဒေါဝ်သၚ်ဂှ်ဟေၚ်အိုတ်ရ။ အလံၚ်ပယျၚ်ဗြဴဂမၠိုၚ် တုပ်သၟဟ်သာ်ဂှ်ဟေၚ် ရောမ်ဒညဂွဂစိုၚ်အိုတ်ရ၊ မုက်မတ်ဟွံကျေဝ်အိုတ်ရ။ ဟွံသၟဟ်ရထ တၞဟ်နဟီုသှ်အိုတ်ရ။  ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ဒၠောံဗတောန်ပ္ဍဲဒၞာဲမဗဗွဲတုဲမှ တၞဟ်နပွမသၟာန်ဟိုတ်ဂမၠိုၚ် မလေပ်သ္ပကဵုအန္တရာယ် ပ္ဍဲလဒေါဝ်သၚ်ဂှ် ကဵုအခေါၚ်ရ။ ယွံခမဳတအ် ရဴဝွံ သ္ဒးဒၠောံဗတောန်ရ—

၄၂၄။ ဗွဲကိုပ်ကၠာ သ္ဒးကဵုဂိုၚ်ကေတ်ဥပဇ္ၛာယ်ရ၊ ကဵုဂိုၚ်ကေတ် ဥပဇ္ၛာယ်တုဲပ္ဍဲကြဴ သ္ဒးဟီုလၟိၚ်လဴထ္ၜးကဵု ဗဗေၚ်သ္ၚာရ၊ ဣဝွံဂှ် ဗဗေၚ်တၠအဲရ၊ ဣဝွံဂှ် သကိုပ်ရ၊ ဣဝွံဂှ်သ္ၚာကၞေဟ်ရ၊ ဣဝွံဂှ် သပိုၚ်ရ၊ ဣဝွံဂှ် ယာတ်ဂြောပ်သြိုဟ်ရ၊ ဣဝွံဂှ် သ္ၚာသၞုက်ဍာ်ရ၊ ဩဝ်အာညိ၊ ဩဝ်ဒတူဒၟံၚ် ပ္ဍဲဌာန်မၞုံယၟုဝွံညိ ရဴဝွံ သ္ဒးဟီုသ္ဂးရ။ ခမဳဗြဴဂမၠိုၚ် မဟွံစဳကၠးဆိုက်ဗ္ဒက် မဟွံဍိုက်ကေက်ဂှ် ဒၠောံဗတောန်အိုတ်ရ၊ အလံၚ်ပယျၚ်ဗြဴဂမၠိုၚ် မဂပ်ဝ်ဒၠောံဗတောန် ရောမ်ဒညဂွဂစိုၚ်အိုတ်ရ၊ မုက်မတ်ဟွံကျေဝ်အိုတ်ရ။ ဟွံသၟဟ်ရထ တၞဟ်နဟီုသှ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

“ယွံခမဳတအ် ခမဳဗြဴ မဟွံစဳကၠးဆိုက်ဗ္ဒက် မဟွံဍိုဟ်ကေဟ်ဂှ် ဟဂပ်ဝ်ဒၠောံဗတောန်ရ၊ ကုခမဳဗြဴ မဒၠောံဗတောန်ဂှ် ဒးအာပတ်ဒုက္ကဋ်ရ။ ယွံခမဳတအ် ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် ကဵုအခေါၚ်တၞဟ်နဒၠောံဗတောန်ရ ရဴဝွံ (သ္ဂးရ)။

 

ခမဳဗြဴ မဟွံကလိဂွံသၟိတ်ဂမၠိုၚ် ဒၠောံဗတောန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴ မဟွံကလိဂွံသၟိတ်ဂှ် ဟဂပ်ဝ်ဒၠောံဗတောန်ရ၊ ကုခမဳဗြဴ မဒၠောံဗတောန်ဂှ် ဒးအာပတ်ဒုက္ကဋ်ရ၊ ယွံခမဳတအ် ခမဳဗြဴမကလိဂွံသၟိတ်ဂှ် ကဵုအခေါၚ်တၞဟ်နဒၠောံဗတောန်ရ။ ယွံခမဳတအ် ရဴဝွံ သ္ဒးကဵုသၟိတ်ရ။ အလဵုဇကုလေဝ် ဂပ်ဝ်သၟိတ်ပတိုန် ဇကုဇကုရ၊ ညးမွဲသအာၚ်လေဝ် ဂပ်ဝ်သၟိတ်ပတိုန် ညးမွဲသအာၚ်ရ။

 

မုရဴသာ်လဵု အလဵုဇကုလေဝ် ဂပ်ဝ်သၟိတ်ပတိုန် ဇကုဇကုရော?၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။

 

“ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ အဲဍိက်ဒၠောံဗတောန် နာဲဗြဴမၞုံယၟုဝွံရ” ရဴဝွံ အလဵုဇကုလေဝ် ဂပ်ဝ်သၟိတ်ပတိုန် ဇကုဇကုရ။ မုရဴသာ်လဵု ညးမွဲသအာၚ်လေဝ် ဂပ်ဝ်သၟိတ်ပတိုန် ညးမွဲသအာၚ်ရော?၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။

 

“ယွံနာဲဗြဴတအ် သၚ်. ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵုဒဒှ်ခမဳပယျၚ် နာဲဗြဴမၞုံယၟုဝွံရ၊ ကမ်မၞုံကဵုအခိၚ်ဗဗွဲကုသၚ် ယဝ်ဒှ်မ္ဂး၊ နာဲဗြဴမၞုံယၟုဝွံ ဒၠောံဗတောန် နာဲဗြဴမၞုံယၟုဝွံရ” ရဴဝွံ ညးမွဲသအာၚ်လေဝ် ဂပ်ဝ်သၟိတ်ပတိုန် ညးမွဲသအာၚ်ရ။ ခမဳဗြဴမကလိဂွံသၟိတ်တုဲ ပြာပ်အာဇရေၚ် အလံၚ်ပယျၚ်ဗြဴတုဲမ္ဂး ရဴဝွံ သ္ဒးဟီုရ။

 

“ယွံနာဲဗြဴမၞုံယၟုဝွံ ဩဝ်ကလၚ်ညိ၊ အခိၚ်ဝွံတုန် ဒှ်အခိၚ်တၠအဲ ဒးဟီုဍာံစၟတ်ဟေၚ်ရ၊ ဒှ်အခိၚ်ဒးဟီုဍာံပြဟေၚ်ရ၊ ယြဴဟိုတ်နူဟိုတ်မွဲ ကတဵုဒှ်ရ၊ ဟိုတ်ဂှ်ရ သၟာန်စၟဳစၟတ်တဴ ပ္ဍဲလဒေါဝ်သၚ်မ္ဂး နွံတဴပြာကဋ်ဂှ် “နွံရ” ရဴဝွံ သ္ဒးဟီုရ၊ ဟွံမွဲတဴပြကဋ် “ဟွံမွဲရ” ရဴဝွံ သ္ဒးဟီုရ။ လ္ပဒှ်ရောမ်ဒညဂွဂစိုၚ်ညိ၊ လ္ပဒှ်မုက်မတ်ဟွံကျေဝ်ညိ၊ အတိုၚ်ကြက်သ္ဂးဂတွံ ကြက်သၟာန်စၟဳစၟတ် တၠအဲအိုတ်ရ—

ညးဟွံမွဲကဵုအၚ်္ဂဇာတ် ဟွံသေၚ်ရဟာ၊ ညးမၞုံအယာံမာတ်ပၞေတ်အၚ်္ဂဇာတ် ဟွံသေၚ်ရဟာ၊ ညးဥတုဟွံကၠုၚ် ဟွံသေၚ်ရဟာ၊ ညးဥတုကၠုၚ်ဒၟံၚ်လၟိုန် ဟွံသေၚ်ရဟာ၊ ညးမၞုံကဵု ယာတ်ကသအ် ပြိုက်ချအ်လဝ်လၟိုန် ဟွံသေၚ်ရဟာ၊ ညးဆီပဿဴဇွောဝ်ဒၟံၚ်လၟိုန် ဟွံသေၚ်ရဟာ၊ ညးမၞုံကဵုဖျုန်ဂၠန်မဂၠိၚ် ဟွံသေၚ်ရဟာ၊ ခမၞုဲဗြဴ ဟွံသေၚ်ရဟာ၊ ညးအယောၚ်အလာတုပ် ညးတြုံ ဟွံသေၚ်ရဟာ၊ ညးမဂ်ၜါစပ်ဒၟံၚ် ဟွံသေၚ်ရဟာ၊ ဥဘတောဗျဉ် ဟွံသေၚ်ရဟာ။

 

ယဲဂမၠိုၚ် မၞုံသဘဴရဴဝွံ နွံကုတၠအဲအိုတ်ဟာ၊ ယဲပၞီခါဒုတ်ကီု ယဲခ္ဍတ်ဗြိုအ်မာကီု ယဲကသံက်သၠာကီု ယဲခ္ဍက်ကဲမှတ်ကီု ယဲကြအ်ယှောတ် ခတုက်ကၠိက်ခတုက်စာၚ်ကီု နွံဟာ၊ ဒှ်မၞိဟ် ဇေတ်ဇေတ်ဟာ၊ ဒှ်မၞိဟ်ဗြဴဇေတ်ဇေတ်ဟာ၊ ဒှ်ညးတဝ်စၞေဟ် (နူဒဒှ်ဍိက်) တုဲဟာ၊ ဒှ်ညးဟွံမွဲကဵုဂတှ်ဟာ၊ ဒှ်ညးဟွံသေၚ်ကဵုခစသၟိၚ် ရၚ်တၠုၚ်ကေၚ်ကာသၟိၚ်ဟာ၊ မိမဂမၠိုၚ်ကီု တြုံတၠသ္ၚိကီု ကဵုအခေါၚ် ကဵုတၠအဲဟာ၊ ဒှ်ညးပေၚ်အာယုက်ၜါစှော်ဟာ၊ ဗဗေၚ်သ္ၚာ ဍိုက်ပေၚ်ကုတၠအဲဟာ၊ တၠအဲ မၞုံယၟုသာ်လဵုရော?၊ ခမဳဗြဴဥပဇ္ၛာယ်တၠအဲ မၞုံယၟုသာ်လဵုရော?” ရဴဝွံ ကြက်သၟာန်အိုတ်ရ။

 

(အ္စာဒၠောံဗတောန် ကေုာံအလံၚ်ပယျၚ်ဗြဴဂမၠိုၚ်) ကၠုၚ်မွဲစွံအိုတ်ရ။ ဟဂပ်ဝ်ကၠုၚ်မွဲစွံရ၊ ခမဳဗြဴမဒၠောံဗတောန် ကၠုၚ်ဗွဲကိုပ်ကၠာတုဲ သ္ဒးကဵုသၚ်တီရ—

“ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ အဲဍိက် ဂပ်ဝ်ဒၠောံဗတောန် အလံၚ်ပယျၚ်ဗြဴဂှ်တုဲရ၊ ကမ်မၞုံကဵု အခိၚ်မဗဗွဲ ကုသၚ် ယဝ်ဒှ်မ္ဂး၊ နာဲဗြဴမၞုံယၟုဝွံ (လုပ်) ကၠုၚ်ရ” ရဴဝွံ (သ္ဒးကဵုသၚ်တီရ)။ “ဩဝ် (လုပ်) ကၠုၚ်ညိ” ရဴဝွံ သ္ဒးဟီုရ။

 

(အလံၚ်ပယျၚ်ဗြဴဂှ်) ကဵုလ္ၜက်ကၠေဟ်ပတိုန် သ္ၚာကၞေဟ်ပ္ဍဲလတူပၞးပါဲမွဲလပါ်တုဲ လ္ၚောဝ်ဒၠးဇိုၚ် ခမဳဗြဴဂမၠိုၚ်တုဲမ္ဂး သီုမကဵုဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး—

“ယွံနာဲဗြဴတအ် (အဲဍိက်) အာတ်အခေါၚ်သၚ် ဒဒှ်ခမဳပယျၚ်ရ၊ ယွံနာဲဗြဴတအ် သၚ်သ္ပဟိုတ်ကဵုဓရ်ဇြဟာန်ဆာန်ဍူ အဲဍိက်တုဲ ဩဝ်ရၚ်တၠုၚ်ပတိတ်ညိ။ မရနုက်ကဵုၜါဝါလေဝ် ယွံနာဲဗြဴတအ် (အဲဍိက်) အာတ်အခေါၚ်သၚ် ဒဒှ်ခမဳပယျၚ်ရ၊ ယွံနာဲဗြဴတအ် သၚ်သ္ပဟိုတ်ကဵုဓရ်ဇြဟာန်ဆာန်ဍူ အဲဍိက်တုဲ ဩဝ်ရၚ်တၠုၚ်ပတိတ်ညိ။ မရနုက်ကဵုပိဝါလေဝ် ယွံနာဲဗြဴတအ် (အဲဍိက်) အာတ်အခေါၚ်သၚ် ဒဒှ်ခမဳပယျၚ်ရ၊ ယွံနာဲဗြဴတအ် သၚ်သ္ပဟိုတ်ကဵုဓရ်ဇြဟာန်ဆာန်ဍူ အဲဍိက်တုဲ ဩဝ်ရၚ်တၠုၚ်ပတိတ်ညိ” ရဴဝွံ ဒးအာတ်အခေါၚ်ရ။

 

ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

“ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵုဒဒှ်ခမဳပယျၚ် နာဲဗြဴမၞုံယၟုဝွံရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ အဲဍိက် သၟာန်ဟိုတ်ဂမၠိုၚ် မလေပ်သ္ပကဵုအန္တရာယ် နာဲဗြဴမၞုံယၟုဝွံရ” ရဴဝွံ (သ္ဒးကဵုတီရ)။

ယွံနာဲဗြဴမၞုံယၟုဝွံ ဩဝ်ကလၚ်ညိ၊ အခိၚ်ဝွံတုန် ဒှ်အခိၚ်တၠအဲ ဒးဟီုဍာံစၟတ်ဟေၚ်ရ၊ ဒှ်အခိၚ်ဒးဟီုဍာံပြဟေၚ်ရ၊ ယြဴဟိုတ်နူဟိုတ်မွဲ ကတဵုဒှ်ရ၊ သၟာန်ဟိုတ်ဂှ်ရ၊ နွံတဴပြာကဋ်မ္ဂး “နွံရ” ရဴဝွံ သ္ဒးဟီုရ၊ ဟွံမွဲတဴပြကဋ် “ဟွံမွဲရ ရဴဝွံ သ္ဒးဟီုရ။ ညးဟွံမွဲကဵုအၚ်္ဂဇာတ် ဟွံသေၚ်ဟာ ။ ပ ။ အ္စာဥပဇ္ၛာယ်တၠအဲ မၞုံယၟုသာ်လဵုရော?” ရဴဝွံ (ဒးသၟာန်ရ)။

 

ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

၄၂၅။ “ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံသ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚးနူဟိုတ်ဂမၠိုၚ် မလေပ်သ္ပကဵုအန္တရာယ်ရ၊ ဗဗေၚ်သ္ၚာ ဍိုက်ပေၚ် ကုနာဲဗြဴဝွံရ၊ နာဲဗြဴမၞုံယၟုဝွံရ အာတ်သၚ် ဒဒှ်ပယျၚ် နကဵုဥပဇ္ၛာယ်နာဲဗြဴမၞုံဝွံရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ် နာဲဗြဴမၞုံယၟုဝွံရ၊ ဣဝွံတုန် ပွမကဵုတီရောၚ်။

 

ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵုဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚးနူဟိုတ်ဂမၠိုၚ် မလေပ်သ္ပကဵုအန္တရာယ်ရ၊ ဗဗေၚ်သ္ၚာဍိုက်ပေၚ် ကုနာဲဗြဴဝွံရ၊ နာဲဗြဴမၞုံယၟုဝွံ အာတ်သၚ် ဒဒှ်ပယျၚ် နကဵုဥပဇ္ၛာယ်နာဲဗြဴမၞုံယၟုဝွံရ၊ သၚ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ် နာဲဗြဴမၞုံယၟုဝွံရ၊ ယြဴကုနာဲဗြဴမွဲ မၞုံကဵုပွမသ္ဍိုက်မၠိုက် ပွမပပယျၚ် နာဲဗြဴမၞုံယၟုဝွံ နကဵုဥပဇ္ၛာယ် နာဲဗြဴမၞုံယၟုဝွံရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။

 

ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚးဟိုတ်ဂမၠိုၚ် မလေပ်သ္ပအန္တရာယ်ရ၊ ဗဗေၚ်သ္ၚာဍိုက်ပေၚ် ကုနာဲဗြဴဝွံရ၊ နာဲဗြဴမၞုံယၟုဝွံ အာတ်သၚ် ဒဒှ်ပယျၚ် နကဵုဥပဇ္ၛာယ်နာဲဗြဴမၞုံယၟုဝွံရ၊ သၚ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ် နာဲဗြဴမၞုံယၟုဝွံရ၊ ယြဴကုနာဲဗြဴမွဲ မၞုံကဵုပွမသ္ဍိုက်မၠိုက် ပွမပပယျၚ် နာဲဗြဴမၞုံယၟုဝွံ နကဵုဥပဇ္ၛာယ် နာဲဗြဴမၞုံယၟုဝွံရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။ သၚ် ဂပ်ဝ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ် နာဲဗြဴမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

 

ပ္ဍဲခဏ (ပပယျၚ် ပ္ဍဲဘိက္ခုနဳသၚ်တုဲ) ဂှ်ဟေၚ် ကော်တုဲကဵုပြာပ်အာဇရေၚ် ဘိက္ခုသၚ်တုဲ ကဵုလ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲ လ္ၚောဝ်ဒၠးဇိုၚ်ခမဳတြုံဂမၠိုၚ်တုဲမ္ဂး သီုမကဵုဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး—

“ယွံတဳလပိုဉ်တအ် အဲဍိက် မၞုံယၟုဝွံရ၊ သ္ၚေဝ်မဲကဵုဒဒှ်ပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ ယွံတဳပိုဉ်တအ် အဲဍိက် အာတ်အခေါၚ်သၚ် ဒဒှ်ခမဳပယျၚ်ရ၊ ယွံတဳလပိုဉ်တအ် သၚ် သ္ပဟိုတ်ကဵုဓရ်ဇြဟာန်ဆာန်ဍူ အဲဍိက်တုဲ ဩဝ်ရၚ်တၠုၚ်ပတိတ်ညိ။ ယွံတဳလပိုဉ်တအ် အဲဍိက် မၞုံယၟုဝွံရ၊ သ္ၚေဝ်မဲကဵုဒဒှ်ပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ ယွံတဳလပိုဉ်တအ် မရနုက်ကဵုၜါဝါလေဝ် အဲဍိက် အာတ်အခေါၚ်သၚ် ဒဒှ်ခမဳပယျၚ်ရ၊ ယွံတဳပိုဥ်တအ် သၚ် သ္ပဟိုတ်ကဵုဓရ်ဇြဟာန်ဆာန်ဍူ အဲဍိက်တုဲ ဩဝ်ရၚ်တၠုၚ်ပတိတ်ညိ။ ယွံတဳလပိုဉ်တအ် အဲဍိက် မၞုံယၟုဝွံရ၊ သ္ၚေဝ်မဲကဵု ဒဒှ်ပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ ယွံတဳလပိုဉ်တအ် မရနုက်ကဵုပိဝါလေဝ် အဲဍိက် အာတ်အခေါၚ်သၚ် ဒဒှ်ခမဳပယျၚ်ရ၊ ယွံတဳလပိုဉ်တအ် သၚ် သ္ပဟိုတ်ကဵု ဓရ်ဇြဟာန်ဆာန်ဍူ အဲဍိက်တုဲ ဩဝ်ရၚ်တၠုၚ်ပတိတ်ညိ” ရဴဝွံ သ္ဒးအာတ်အခေါၚ်ရ။

 

ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် ခမဳဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ ခမဳဗြဴမၞုံယၟုဝွံ အာတ်သၚ် ပွမပပယျၚ် နကဵုဥပဇ္ၛာယ်ဗြဴမၞုံယၟုဝွံရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ်ပကဵုပယျၚ် ခမဳဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ ဣဝွံတုန် ပွမကဵုတီရောၚ်။

 

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ သ္ၚေဝ်မဲကဵုဒဒှ်ခမဳပယျၚ် ခမဳဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ ခမဳဗြဴမၞုံယၟုဝွံ အာတ်သၚ် ပွမပပယျၚ် နကဵုဥပဇ္ၛာယ်ဗြဴမၞုံယၟုဝွံရ၊ သၚ်ပကဵုပယျၚ် ခမဳဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ ယြဴကုတဳလပိုဉ်မွဲ မၞုံကဵုပွမသ္ဍိုက်မၠိုက် ပွမပပယျၚ် ခမဳဗြဴမၞုံယၟုဝွံ နကဵုဥပဇ္ၛာယ် ဗြဴမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

 

မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ သ္ၚေဝ်မဲကဵုဒဒှ်ခမဳပယျၚ် ခမဳဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ ခမဳဗြဴမၞုံယၟုဝွံ အာတ်သၚ် ပွမပပယျၚ် နကဵုဥပဇ္ၛာယ်ဗြဴမၞုံယၟုဝွံရ၊ သၚ်ပကဵုပယျၚ် ခမဳဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ ယြဴကုတဳလပိုဉ်မွဲ မၞုံကဵုပွမသ္ဍိုက်မၠိုက် ပွမပပယျၚ် ခမဳဗြဴမၞုံယၟုဝွံ နကဵုဥပဇ္ၛာယ် ဗြဴမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

 

သၚ် ဂပ်ဝ်ပကဵုပယျၚ် ခမဳဗြဴမၞုံယၟုဝွံ နကဵုဥပဇ္ၛာယ် ဗြဴမၞုံယၟုဝွံရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

 

ပ္ဍဲခဏ (မပပယျၚ် နူဘိက္ခုသၚ်တုဲ) ဂှ်ဟေၚ် သ္ဒးၜတ်ဗၞတ်သၞိၚ်ရ၊ သ္ဒးဟီုလၟိၚ်ဥတု (ဃောကၠုၚ်စိုပ်) ရ၊ သ္ဒးဟီုလၟိၚ်သွက်တ္ၚဲရ၊ ပံၚ်ပကောံ (သၞိၚ် ဥတု တ္ၚဲ) တုဲ သ္ဒးဟီုလၟိၚ် (တ္ၚဲဒှ်ခမဳ) ရ၊ “ဩဝ်ဟီုလဴထ္ၜး အရာနိဿယ်ဗ္ဒာဲဂမၠိုၚ်ပိပြကာကီု ဒ္ဂေတ်မဟဂပ်ဝ်သ္ပဒ္စါံပြကာဂမၠိုၚ်ကီု ကုခမဳဗြဴဝွံအိုတ်ညိ” ရဴဝွံ ဂပ်ဝ်ဒးဟီုကဵု ခမဳဗြဴဂမၠိုၚ်အိုတ်ရ။

 

၄၂၆။ ပ္ဍဲအခိၚ်ဂှ် ခမဳဗြဴဂမၠိုၚ် ဃောကဵုဖျုဲပြံၚ်သၞာဂမၠိုၚ် ပ္ဍဲဇြပ်ကဵုပိုဉ် ကဵုကလိလောန်အခိၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ကဵုအခေါၚ် ကုခမဳဗြဴဂမၠိုၚ်ဒ္စါံဇကု အတိုၚ်လၟေၚ်ညးဇၞော် ကုခမဳဗြဴဂမၠိုၚ် သှေ်သၟေဟ်ဂှ် အတိုၚ်လၟေၚ်ကၠုၚ်စိုပ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် “တဳလမၞုံပိုဉ်ကျာ်တြဲ ကဵုအခေါၚ်ကုခမဳဗြဴဂမၠိုၚ်ဒ္စါံဇကု အတိုၚ်လၟေၚ် ညးဇၞော်ကီု ကုခမဳဗြဴဂမၠိုၚ်သှေ်သၟေဟ်ဂှ် အတိုၚ်လၟေၚ်ကၠုၚ်စိုပ်ကီုရ” ရဴဝွံ ခမဳဗြဴဂမၠိုၚ် ပ္ဍဲဌာန်ဂမၠိုၚ်အိုတ်သီု ကုခမဳဗြဴဂမၠိုၚ်ဒ္စါံဇကု အတိုၚ်လၟေၚ်ညးဇၞော်ကီု ကုခမဳဗြဴဂမၠိုၚ်သှေ်သၟေဟ်ဂှ် အတိုၚ်လၟေၚ်ကၠုၚ်စိုပ်ကီု ဆေဝ်ဒဝ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ပ္ဍဲဇြပ်ကဵုပိုဉ်ကဵုအခေါၚ် ကုခမဳဗြဴဂမၠိုၚ်ဒ္စါံဇကု အတိုၚ်လၟေၚ်ညးဇၞော် ကုခမဳဗြဴဂမၠိုၚ်သှေ်သၟေဟ်ဂှ် အတိုၚ်လၟေၚ်ကၠုၚ်စိုပ်ကီုရ။ ပ္ဍဲဌာန်ဂမၠိုၚ်အိုတ်သီု ဟဂပ်ဝ်ဆေဝ်ဒဝ် အတိုၚ်လၟေၚ်ညးဇၞော်ရ၊ ကုခမဳဗြဴမဆေဝ်ဒဝ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

 

၄၂၇။ ပ္ဍဲအခိၚ်ဂှ် ခမဳဗြဴဂမၠိုၚ် ဟွံသ္ပပဝါရဏာအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဂပ်ဝ်ဒးသ္ပပဝါရဏာရ၊ ကုခမဳဗြဴဟွံသ္ပ ပဝါရဏာဂှ် ဒးသ္ဂုတ်သွာတ် ဗွဲမဗဗွဲကဵုဓရ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် ဇကုဇကုတအ် သ္ပပဝါရဏာတုဲမ္ဂး ဟွံသ္ပပဝါရဏာကဵု သၚ်ခမဳတြုံအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ခမဳဗြဴဂှ် ဇကုဇကုတအ် သ္ပပဝါရဏာမ္ဂး ဂပ်ဝ်ဒးသ္ပပဝါရဏာကဵု သၚ်ခမဳတြုံရ၊ ကုခမဳဗြဴဟွံသ္ပပဝါရဏာဂှ် ဒးသ္ဂုတ်သွာတ် ဗွဲမဗဗွဲကဵုဓရ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် သ္ပပဝါရဏာကေုာံခမဳဂမၠိုၚ် မွဲဂကောံဓဝ်အိုတ်မ္ဂး သ္ပတဴပွမညောန်ညေဲအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ခမဳဗြဴဂှ် ဟဂပ်ဝ်သ္ပပဝါရဏာ မွဲဟာန်ကေုာံခမဳတြုံဂမၠိုၚ် မွဲဂကောံဓဝ်ရ၊ ကုခမဳဗြဴမသ္ပပဝါရဏာဂှ် ဒးအာပတ်ဒုက္ကဋ်ရ ရဝွံ (သ္ဂးရ)။

ပ္ဍဲအခိၚ်ဂှ် ခမဳဗြဴဂမၠိုၚ် ကိုပ်ကၠာဟဂွံကဵုပိုဉ်ဏီ သ္ပပဝါရဏာအိုတ်မ္ဂး ကဵုကလိလောန် အာအခိၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ်ကဵုပိုဉ်တုဲမှ သွက်ဂွံသ္ပပဝါရဏာဂှ် ကဵုအခေါၚ်ရ ရဴဝွံ (သ္ဂးရ)။

 

ကဵုပိုဉ်တုဲမှ သ္ပပဝါရဏာအိုတ်မ္ဂး ကဵုဒှ်အာ ဟွံသေၚ်ကဵုအခိၚ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တ္ၚဲဏအ်သ္ပပဝါရဏာတုဲမ္ဂး ပ္ဍဲတ္ၚဲယး (တ္ၚဲမွဲစွေက်) ကဵုအခေါၚ် တၞဟ်နသ္ပပဝါရဏာကဵု သၚ်ခမဳတြုံရ ရဴဝွံ (သ္ဂးရ)။

 

ပ္ဍဲအခိၚ်ဂှ် ဘိက္ခုနဳသၚ်အိုတ်သီု သ္ပပဝါရဏာမ္ဂး သ္ပတဴပွမညာန်ညေဲရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

“ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ သၚ်သၟိတ်ပတိုန် ခမဳဗြဴမၞုံယၟုဝွံ တၞဟ်နသ္ပပဝါရဏာကဵု ဘိက္ခုသၚ် သွက်ဘိက္ခုနဳသၚ်ရ၊ ဣဝွံတုန် ပွမကဵုတီရောၚ်။

 

ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ်သၟိတ်ပတိုန် ခမဳဗြဴမၞုံယၟုဝွံ တၞဟ်နသ္ပပဝါရဏာကဵုဘိက္ခုသၚ် သွက်ဘိက္ခုနဳသၚ်ရ၊ ယြဴကုနာဲဗြဴမွဲ မၞုံကဵုပွမသ္ဍိုက်မၠိုက် ပွမသၟိတ်ပတိုန် ခမဳဗြဴမၞုံယၟုဝွံ တၞဟ်နသ္ပပဝါရဏာကဵု ဘိက္ခုသၚ် သွက်ဘိက္ခုနဳသၚ်ရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။

 

သၚ် ဂပ်ဝ်သၟိတ်ပတိုန် ခမဳဗြဴမၞုံယၟုဝွံ တၞဟ်နသ္ပပဝါရဏာကဵု ဘိက္ခုသၚ် သွက်ဘိက္ခုနဳသၚ်ရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

 

ခမဳဗြဴမဂပ်ဝ်သၟိတ်ပတိုန်တုဲဂှ် ကော်ဘိက္ခုနဳသၚ်တုဲ ပြာပ်အာဇရေၚ် ဘိက္ခုသၚ်တုဲလ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲ လ္ၚောဝ်ဒၠးဇိုၚ်ခမဳတြုံဂမၠိုၚ်တုဲမ္ဂး သီုမဂဇအ်ဒၟံၚ် ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး—

“ယွံတဳလပိုဉ်တအ် ဘိက္ခုနဳသၚ် သ္ပပဝါရဏာကဵု ဘိက္ခုသၚ်ရ၊ ယွံတဳပိုဉ်တအ် ဘိက္ခုသၚ်ဂှ် နပွမညာတ်ကီု နပွမမိၚ်ကီု နပွမသၠေဟ်ပၟာကီု သ္ပဟိုတ်ကဵုဓရ်ဇြဟာန်ဆာန်ဍူ ဘိက္ခုနဳသၚ်တုဲ ဩဝ်ဟီုသ္ဂးညိ၊ ဆဵုညာတ် (ဒုဟ်) မ္ဂး ကြက်ဇအုဲဇဗရ။ ယွံတဳလပိုဉ် မရနုက်ကဵုၜါဝါလေပ် ။ ပ ။ ယွံတဳလပိုဉ်တအ် မရနုက်ကဵုပိဝါလေဝ် ဘိက္ခုနဳသၚ် သ္ပပဝါရဏာကဵု ဘိက္ခုသၚ်ရ၊ ယွံတဳပိုဉ်တအ် ဘိက္ခုသၚ်ဂှ် နပွမညာတ်ကီု နပွမမိၚ်ကီု နပွမသၠေဟ်ပၟာကီု သ္ပဟိုတ်ကဵုဓရ်ဇြဟာန်ဆာန်ဍူ ဘိက္ခုနဳသၚ်တုဲ ဩဝ်ဟီုသ္ဂးညိ၊ ဆဵုညာတ် (ဒုဟ်) မ္ဂး ကြက်ဇအုဲဇဗရ” ရဴဝွံ သ္ဒးဟီုသ္ဂးရ။

 

၄၂၈။ ပ္ဍဲအခိၚ်ဂှ် ခမဳဗြဴဂမၠိုၚ် တန်ဒေါံဥပေါသ် ကုခမဳတြုံဂမၠိုၚ်အိုတ်ရ၊ တန်ဒေါံပဝါရဏာအိုတ်ရ၊ သ္ပမၞုံကဵုပွမဒၠောံပတောန်အိုတ်ရ၊ ကဵုဒှ်ဇၞော်သကိုပ်သကအိုတ်ရ၊ ကဵုသ္ပအခေါၚ်အိုတ်ရ၊ စောဒနာအိုတ်ရ၊ ကဵုဗှ်ဗၞုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ခမဳဗြဴဂှ် ဟဂပ်ဝ်တန်ဒေါံဥပေါသ် ကုခမဳတြုံရ၊ ၜိုန်တန်ဒေါံလေဝ် ဟွံဒှ်တန်ဒေါံရ၊ ကုခမဗြဴ မတန်ဒေါံဂှ် ဒးအာပတ်ဒုက္ကဋ်ရ။

ဟဂပ်ဝ်တန်ဒေါံ ပဝါရဏာရ၊ ၜိုန်တန်ဒေါံလေဝ် ဟွံဒှ်တန်ဒေါံရ၊ ကုခမဳဗြဴ မတန်ဒေါံဂှ် ဒးအာပတ်ဒုက္ကဋ်ရ။

ဟဂပ်ဝ်သ္ပ မၞုံကဵုပွမဒၠောံဗတောန်ရ၊ ၜိုန်သ္ပလေဝ် ဟွံဒှ်သ္ပရ၊ ကုခမဳဗြဴ မသ္ပဂှ် ဒးအာပတ်ဒုက္ကဋ်ရ။

ဟဂပ်ဝ်ကဵုဒှ်ဇၞော်သကိုပ်သကရ၊ ၜိုန်ကဵုဒှ်လေဝ် ဟွံကဵုဒှ်ရ၊ ကုခမဳဗြဴဒှ်ဂှ် ဒးအာပတ် ဒုက္ကဋ်ရ။

ဟဂပ်ဝ်ကဵုသ္ပအခေါၚ်ရ၊ ၜိုန်ကဵုသ္ပလေဝ် ဟွံဒှ်သ္ပရ၊ ကုခမဳဗြဴ မကဵုသ္ပဂှ် ဒးအာပတ် ဒုက္ကဋ်ရ။

ဟဂပ်ဝ်စောဒနာရ၊ ၜိုန်စောဒနာလေဝ် ဟွံဒှ်စောဒနာရ၊ ကုခမဳဗြဴ မစောဒနာဂှ် ဒးအာပတ်ဒုက္ကဋ်ရ။

ဟဂပ်ဝ်ကဵုဗှ်ဗၞုဟ်ရ၊ ၜိုန်ကဵုဗှ်ဗၞုဟ်လေဝ် ဟွံဒှ်ကဵုဗှ်ဗၞုဟ်ရ၊ ကုခမဳဗြဴမကဵုဗှ်ဗၞုဟ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳတြုံဂမၠိုၚ် တန်ဒေါံဥပေါသ် ကုခမဳဗြဴဂမၠိုၚ်အိုတ်ရ၊ တန်ဒေါံပဝါရဏာအိုတ်ရ၊ သ္ပမၞုံကဵုပွမဒၠောံဗတောန်အိုတ်ရ၊ ကဵုဒှ်ဇၞော်သကိုပ်သကအိုတ်ရ၊ကဵုသ္ပအခေါၚ်အိုတ်ရ၊ စောဒနာအိုတ်ရ၊ ကဵုဗှ်ဗၞုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ကဵုအခေါၚ် ခမဳတြုံဂှ် သွက်ဂွံတန်ဒေါံဥပေါသ် ကုခမဳဗြဴရ၊ ပွမတန်ဒေါံဂှ်လေဝ် ဒှ်ပွမတန်ဒေါံဗွဲမဒးရးရ၊ ကုခမဳမတန်ဒေါံဂှ် ဟွံဒးအာပတ်ရ။

ကဵုအခေါၚ် သွက်ဂွံတန်ဒေါံ ပဝါရဏာရ၊ ပွမတန်ဒေါံဂှ်လေဝ် ဒှ်ပွမတန်ဒေါံဗွဲမဒးရးရ၊ ကုခမဳမတန်ဒေါံဂှ် ဟွံဒးအာပတ်ရ။

ကဵုအခေါၚ် သွက်ဂွံသ္ပမၞုံကဵုပွမဒၠောံဗတောန်ရ၊ ပွမသ္ပဂှ်လေဝ် ဒှ်ပွမသ္ပဗွဲမဒးရးရ၊ ကုခမဳ မသ္ပဂှ် ဟွံဒးအာပတ်ရ။

ကဵုအခေါၚ် သွက်ဂွံကဵုဒှ်ဇၞော်သကိုပ်သကရ၊ ပွမကဵုဒှ်ဂှ်လေဝ် ဒှ်ပွမကဵုဒှ်ဗွဲမဒးရးရ၊ ကုခမဳဂှ် မကဵုဒှ်ဂှ် ဟွံဒးအာပတ်ရ။

ကဵုအခေါၚ် သွက်ဂွံကဵုသ္ပအခေါၚ်ရ၊ ပွမကဵုသ္ပဂှ်လေဝ် ဒှ်ပွမကဵုသ္ပဗွဲမဒးရးရ။ ကုခမဳမကဵုသ္ပဂှ် ဟွံဒးအာပတ်ရ။

ကဵုအခေါၚ် သွက်ဂွံစောဒနာရ၊ ပွမစောဒနာဂှ်လေဝ် ဒှ်ပွမစောဒနာဗွဲမဒးရးရ၊ ကုခမဳမစောဒနာဂှ် ဟွံဒးအာပတ်ရ။

ကဵုအခေါၚ် သွက်ဂွံကဵုဗှ်ဗၞုဟ်ရ၊ ပွမကဵုဗှ်ဗၞုဟ်ဂှ်လေဝ် ဒှ်ပွမကဵုဗှ်ဗၞုဟ်ဗွဲမဒးရးရ၊ ကုခမဳမကဵုဗှ်ဗၞုဟ်ဂှ် ဟွံဒးအာပတ်ရ။

 

၄၂၉။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် အာကၠုၚ်တဴ နကဵုယာန် ဗ္ဂန်ၝောံတုဲ တၟက် (ညးတြုံ) ဒဳကီု နကဵုယာန် ဗ္ဂန်တၟက်တုဲ ၝောံ (ညးဗြဴ) ဒဳကီုအိုတ်ရ၊ မၞိဟ်ဂမၠိုၚ် “သၟဟ်ညံၚ်ရဴညးအာပေါဲဂၚ်္ဂါ ပေါဲမဟိဂမၠိုၚ်ကီုရောၚ်” ရဴဝွံ မၞိဟ်ဂမၠိုၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ခမဳဗြဴဂှ် ဟဂပ်ဝ်အာ နကဵုယာန်ရ၊ ကုခမဳဗြဴမအာ နကဵုယာန်ဂှ် ဒးသ္ဂုတ်သွာတ်ဗွဲမဗဗွဲဓရ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴမွဲဇကု ဂိယဲဒၟံၚ်ရ၊ အာနကဵုဇိုၚ် ဟွံမာန်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုခမဳဗြဴမဂိယဲဂှ် ကဵုအခေါၚ်ယာန်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် “ယာန်ဗ္ဂန်ၝောံဟာ၊ ယာန်ဗ္ဂန်တၟက်ဟာ” ရဴဝွံ ကသပ်ဒှ် ကုခမဳဗြဴဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ယာန်မဗ္ဂန်ၝောံကီု ယာန်မဗ္ဂန်တၟက်ကီု ယာန်ဓရိုဟ်, တံၚ်ဓဇက်နတဲကီုရ ရဴဝွံ (သ္ဂးရ)။

 

ပ္ဍဲအခိၚ်ဂှ် ကုခမဳဗြဴမွဲဇကုဂှ် နယာတ်ကဆံက်ထၟုက်ဂှ် ဒှ်အာဟွံဒှ်တသိုခ်လောန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ်ဝဝ်ကီု သရေၚ်ကီုရ ရဴဝွံ (သ္ဂးရ)။

 

၄၃၀။ ပ္ဍဲအခိၚ်ဂှ် ဗြဴစရာဲဍုၚ် အဍ္ဎကာသိ ပထပိုဲ ပ္ဍဲဇရေၚ်ခမဳဗြဴဂမၠိုၚ်ရ၊ ဗြဴစရာဲဍုၚ်ဂှ် “ကြက်ပပယျၚ် ပ္ဍဲဇရေၚ်တဳလမၞုံပိုဉ်ကျာ်တြဲရ” ရဴဝွံ သၟိက်အာဍုၚ်သာရဝှ်ရ။ “ဗြဴစရာဲဍုၚ် အဍ္ဎကာသိ သၟိက်အာဍုၚ်သာရဝှ်ရဂး” ရဴဝွံ သၟုၚ်လဗၚ်သုရာ (ပၠေပ်အရက်) ဂမၠိုၚ် သ္ဂောံမိၚ်ကေတ်အိုတ်ရ။ သၟုၚ်လဗၚ်သုရာဂမၠိုၚ်ဂှ် ကတဵုရုသံၚ်ဒၟံၚ် ပ္ဍဲဂၠံၚ်တရဴအိုတ်ရ။ “သၟုၚ်လဗၚ်သုရာဂမၠိုၚ်ဂှ် ကတဵုရုသံၚ်ဒၟံၚ် ပ္ဍဲဂၠံၚ်တရဴအိုတ်ရ” ရဴဝွံ ဗြဴစရာဲဍုၚ် အဍ္ဎကာသိ သ္ဂောံမိၚ်ကေတ်ရ။ “အဲဍိက်မိက်ပပယျၚ်ဒှ်တုဲ မုရဴသာ်လဵု အဲဍိက် ဂွံဒ္ဂေတ်သ္ပရော?” ရဴဝွံ ဖအောဝ်ဗလးဏာကလုတ် ဇရေၚ်တဳလမၞုံပိုဉ်ကျာ်တြဲရ။

 

ပ္ဍဲကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး—

“ယွံခမဳတအ် နကလုတ်လေဝ် ကဵုအခေါၚ် တၞဟ်နပပယျၚ်ရ” ရဴဝွံ သ္ဂးကဵုခမဳဂမၠိုၚ်ရ။

 

နကဵုကလုတ်ခမဳတြုံ ပပယျၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ် ကျာ်တြဲအိုတ်ရ။ ယွံခမဳတအ် နကဵုကလုတ်ခမဳတြုံ ဟဂပ်ဝ်ပပယျၚ်ရ၊ ကုခမဳဗြဴ မပပယျၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။ နကဵုကလုတ်သိက္ခမာန် ပပယျၚ်အိုတ်ရ ။ ပ ။ နကဵုကလုတ်သာမဏဳတြုံ ပပယျၚ်အိုတ်ရ ။ ပ ။ နကဵုကလုတ်သာမဏဳဗြဴ ပပယျၚ်အိုတ်ရ ။ ပ ။ နကဵုကလုတ်မဟွံစဳကၠး ဆိုက်ဗ္ဒက် မဟွံဍိုက်ကေဟ် ပပယျၚ်အိုတ်ရ။ ယွံခမဳတအ် နကဵုကလုတ် မဟွံစဳကၠးဆိုက်ဗ္ဒက် မဟွံဍိုဟ်ကေက် ဟဂပ်ဝ်ပပယျၚ်ရ၊ ကုခမဳဗြဴ မပပယျၚ်ဂှ် ဒးအာပတ်ဒုက္ကဋ်ရ။ ယွံခမဳတအ် နကလုတ်ခမဳဗြဴစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် ကဵုအခေါၚ်တၞဟ်နပပယျၚ်ရ ရဴဝွံ (သ္ဂးရ)။

 

ခမဳဗြဴကလုတ်ဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတုပၞးပါဲမွဲလပါ်တုဲ လ္ၚောဝ်ဒၠးဇိုၚ် ခမဳတြုံဂမၠိုၚ်တုဲမ္ဂး သီုမဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး—

“ယွံတဳလပိုဉ်တအ် နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ နာဲဗြဴဂှ် ဟိုတ်နူအန္တရာယ်မမိက်ကဵုမွဲမွဲဂှ် ကၠုၚ်ဟွံမာန်ရ၊ ယွံတဳလပိုဉ်တအ် နာဲဗြဴမၞုံယၟုဝွံ အာတ်သၚ် ပွမပပယျၚ်ရ၊ ယွံတဳလပိုဉ်တအ် သၚ် သ္ပဟိုတ်ကဵုဓရ်ဇြဟာန်ဆာန်ဍူ နာဲဗြဴဂှ်တုဲ ဩဝ်ရၚ်တၠုၚ်ပတိတ်ညိ။ ယွံတဳလပိုဉ်တအ် နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ နာဲဗြဴဂှ် ဟိုတ်နူအန္တရာယ်မမိက်ကဵုမွဲမွဲဂှ် ကၠုၚ်ဟွံမာန်ရ၊ ယွံတဳလပိုဉ်တအ် မရနုက်ကဵုၜါဝါလဝ် နာဲဗြဴမၞုံယၟုဝွံ အာတ်သၚ် ပွမပပယျၚ်ရ၊ ယွံတဳလပိုဉ်တအ် သၚ် သ္ပဟိုတ်ကဵုဓရ်ဇြဟာန်ဆာန်ဍူ နာဲဗြဴဂှ်တုဲ ဩဝ်ရၚ်တၠုၚ်ပတိတ်ညိ။ ယွံတဳလပိုဉ်တအ် နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ နာဲဗြဴဂှ် ဟိုတ်နူအန္တရာယ်မမိက်ကဵုမွဲမွဲဂှ် ကၠုၚ်ဟွံမာန်ရ၊ ယွံတဳလပိုဉ်တအ် မရနုက်ကဵုပိဝါလဝ် နာဲဗြဴမၞုံယၟုဝွံ အာတ်သၚ် ပွမပပယျၚ်ရ၊ ယွံတဳလပိုဉ်တအ် သၚ် သ္ပဟိုတ်ကဵုဓရ်ဇြဟာန်ဆာန်ဍူ နာဲဗြဴဂှ်တုဲ ဩဝ်ရၚ်တၠုၚ်ပတိတ်ညိ” ရဴဝွံ ဒးဂရၚ်ပတီရ။

 

ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ နာဲဗြဴဂှ် ဟိုတ်နူအန္တရာယ်မမိက်ကဵုမွဲမွဲဂှ် ကၠုၚ်ဟွံမာန်ရ၊ နာဲဗြဴမၞုံယၟုဝွံ အာတ်သၚ် ပွမပပယျၚ် နကဵုဥပဇ္ၛာယ်ဗြဴမၞုံယၟုဝွံရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ ဣဝွံတုန် ပွမကဵုတီရောၚ်။

 

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ နာဲဗြဴဂှ် ဟိုတ်နူအန္တရာယ်မမိက်ကဵုမွဲမွဲဂှ် ကၠုၚ်ဟွံမာန်ရ၊ နာဲဗြဴမၞုံယၟုဝွံ အာတ်သၚ် ပွမပပယျၚ် နကဵုဥပဇ္ၛာယ်ဗြဴမၞုံယၟုဝွံရ၊ သၚ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ ယြဴကုတဳလပိုဉ်မွဲ မၞုံကဵုပွသ္ဍိုက်မၠိုက် ပွမပပယျၚ် နာဲဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

 

မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါဂှ်လေဝ် ဟီုသ္ဂးဟိုတ်ဂှ်ရ။

 

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ နာဲဗြဴမၞုံယၟုဝွံ သ္ၚေဝ်မဲကဵု ဒဒှ်ခမဳပယျၚ် နာဲဗြဴမၞုံယၟုဝွံရ၊ သအးဇ္ၚး ပ္ဍဲဘိက္ခုနဳသၚ် နပွမပပယျၚ် ပ္ဍဲမွဲလပါ်တုဲဒှ်ရ၊ နာဲဗြဴဂှ် ဟိုတ်နူအန္တရာယ်မမိက်ကဵုမွဲမွဲဂှ် ကၠုၚ်ဟွံမာန်ရ၊ နာဲဗြဴမၞုံယၟုဝွံ အာတ်သၚ် ပွမပပယျၚ် နကဵုဥပဇ္ၛာယ်ဗြဴမၞုံယၟုဝွံရ၊ သၚ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ ယြဴကုတဳလပိုဉ်မွဲ မၞုံကဵုပွသ္ဍိုက်မၠိုက် ပွမပပယျၚ် နာဲဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

 

သၚ် ဂပ်ဝ်ပကဵုပယျၚ် နာဲဗြဴမၞုံယၟုဝွံ နကဵုဥပဇ္ၛာယ်ဗြဴမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ်ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

 

ပ္ဍဲခဏ (မပပယျၚ် နူဘိက္ခုသၚ်တုဲ) ဂှ်ဟေၚ် သ္ဒးၜတ်ဗၞတ်သၞိၚ်ရ၊ သ္ဒးဟီုလၟိၚ်ဥတု (ဃောကၠုၚ်စိုပ်) ရ၊ သ္ဒးဟီုလၟိၚ်သွက်တ္ၚဲရ၊ ပံၚ်ပကောံ (သၞိၚ် ဥတု တ္ၚဲ) တုဲ သ္ဒးဟီုလၟိၚ် (တ္ၚဲဒှ်ခမဳ) ရ။ “ဩဝ်ဟီုလဴထ္ၜး အရာနိဿယ်ဗ္ဒာဲဂမၠိုၚ်ပိပြကာကီု ဒ္ဂေတ်မဟဂပ်ဝ်သ္ပဒ္စါံပြကာဂမၠိုၚ်ကီု ကုခမဳဗြဴဂှ်အိုတ်ညိ” ရဴဝွံ ဂပ်ဝ်ဒးဟီုကဵု ခမဳဗြဴဂမၠိုၚ်ရ။

 

၄၃၁။ ပ္ဍဲအခိၚ်ဂှ် ခမဳဗြဴဂမၠိုၚ် ပဒတဴပ္ဍဲဂြိုပ်အိုတ်ရ၊ ညးသၟုၚ်လဗၚ်သုရာဂမၠိုၚ် ပလီုပလာ်အိုတ်ရ၊ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ခမဳဗြဴဂှ် ဟဂပ်ဝ်ပဒတဴပ္ဍဲဂြိုပ်ရ၊ ကုခမဳဗြဴမပဒတဴဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ဥပးမွဲတၠ ကဵုဒါန် တိုက်ဒြပ် ကုဘိက္ခုနဳသၚ်ရ။ ဂရၚ်ပတီ ဟိုတ်ပရာပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ကဵုအခေါၚ် တိုက်ဒြပ်ရ ရဴဝွံ (သ္ဂးရ)။

 

တိုက်ဒြပ် ဟွံရုမ်ဂပ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ဘာရ ရဴဝွံ (သ္ဂးရ)။ ဘာ ဟွံရုမ်ဂပ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ကေၚ်ကာတၟိရ ရဴဝွံ (သ္ဂးရ)။ ကေၚ်ကာတၟိ ဟွံရုမ်ဂပ်ရ။ ဂရၚ်ပတီဟိုတ်ပရူပရာ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဘာပုဂ္ဂလိကလေဝ် ကဵုအခေါၚ် သွက်ဂွံသ္ပရ ရဴဝွံ (သ္ဂးရ)။

 

၄၃၂။ ပ္ဍဲအခိၚ်ဂှ် ဗြဴမွဲတၠဂှ် သီုမၞုံကဵုဂၠမ်ဂဝ်မတန်ဂှ် ပခမဳပ္ဍဲဇရေၚ်ခမဳဗြဴဂမၠိုၚ်ရ၊ ကုဗြဴဂှ်ပခမဳတုဲမ္ဂး ဂၠမ်ဂဝ်ၜံၚ်သၠးတိတ်ရ။ ပ္ဍဲအခိၚ်ဂှ် “အဲ ပသာ်ဂွံဒ္ဂေတ်သ္ပ ပ္ဍဲကောန်ၚာ်ဝွံရော?” ရဴဝွံကသပ်ဒှ် ကုခမဳဗြဴဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ်ကဵုအခေါၚ် သွက်ဂွံလွဳမြိမြန်ကောန်ၚာ်ဂှ် စဵုကဵုစိုပ်အခိၚ် မတီကၠိုဟ်ခၠၚ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် “အဲလေဝ် ဟွံကလိဂွံ တၞဟ်နပဒတဴညးမွဲဓဝ်ရ၊ ခမဳဗြဴသအာၚ်လေဝ် ဟွံကလိဂွံ တၞဟ်နပဒတဴမွဲစွံ ကေုာံကောန်ၚာ်ရ၊ အဲ ပသာ်ဂွံဒ္ဂေတ်သ္ပ ပ္ဍဲကောန်ၚာ်ဝွံရော?” ရဴဝွံ ကသပ်ဒှ် ကုခမဳဗြဴဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သၟိတ်ပတိုန် ခမဳဗြဴမွဲဇကုတုဲ တၞဟ်နကဵုသကအ်ရဲ ကုခမဳဗြဴဂှ် ကဵုအခေါၚ်ရ။ ယွံခမဳတအ် ရဴဝွံ ဒးသၟိတ်ပတိုန်ရ။

 

ဗွဲကိုပ်ကၠာ ဒးအာတ်အခေါၚ် ခမဳဗြဴရ၊ အာတ်အခေါၚ်တုဲမ္ဂး ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။

 

“ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ သၚ် သၟိတ်ပတိုန် ခမဳဗြဴမၞုံယၟုဝွံ ရဴဝွံမ္ဂး သကအ်ရဲခမဳဗြဴမၞုံယၟုဝွံရ၊ ဣဝွံတုန် ပွမကဵုတီရောၚ်။

 

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန်ခမဳဗြဴ မၞုံယၟုဝွံရဴဝွံမ္ဂး သကအ်ရဲခမဳဗြဴမၞုံယၟုဝွံရ၊ ယြဴနာဲဗြဴမွဲ မၞုံကဵုပွမသ္ဍိုက်မၠိုက် ပွမသၟိတ်ပတိုန် ခမဳဗြဴမၞုံယၟုဝွံ ရဴဝွံမ္ဂး သကအ်ရဴခမဳဗြဴမၞုံယၟုဝွံရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။

သၚ် ဂပ်ဝ်သၟိတ်ပတိုန် ခမဳဗြဴမၞုံယၟုဝွံ ရဴဝွံမ္ဂး သကအ်ရဲခမဳဗြဴမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

 

ပ္ဍဲအခိၚ်ဂှ် “အဲ ပသာ်ဂွံဒ္ဂေတ်သ္ပ ပ္ဍဲကောန်ၚာ်ဝွံရော?” ရဴဝွံ ကသပ်ဒှ် ကုခမဳဗြဴ သကအ်ရဲဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပါဲကၠေံ ပွမပဒတဴဘာမၞုံကဵုမွဲစၟဳ မွဲဗ္ဒၚ်တုဲ သၟဟ်ညံၚ်ရဴဒးဒ္ဂေတ် ပ္ဍဲတြုံသအာၚ်ဂမၠိုၚ်ကီု တုပ်သၟက်သာ်ဂှ် တၞဟ်နဒ္ဂေတ် ပ္ဍဲကောန်ၚာ်ဂှ် ကဵုအခေါၚ်ရ ရဴဝွံ (သ္ဂးရ)။

 

၄၃၃။ ပ္ဍဲအခိၚ်ဂှ် ခမဳဗြဴမွဲဇကု အာစိုပ်အာပတ်သံဃာဒိသေသ်တုဲ ဒ္ဂောတ်ဒၟံၚ်မာနတ်ရ။ ပ္ဍဲအခိၚ်ဂှ် “အဲလေဝ် ဟွံကလိဂွံ တၞဟ်နပဒတဴညးမွဲဓဝ်ရ၊ ခမဳဗြဴသအာၚ်လေဝ် ဟွံကလိဂွံတၞဟ်နပဒတဴမွဲစွံ ကေုာံအဲရ၊ အဲ ပသာ်ဂွံဒ္ဂေတ်သ္ပရော?” ရဴဝွံ ကသပ်ဒှ် ကုခမဳဗြဴဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သၟိတ်ပတိုန် ခမဳဗြဴမွဲဇကုတုဲ တၞဟ်နကဵုသကအ်ရဲ ကုခမဳဗြဴဂှ် ကဵုအခေါၚ်ရ။

 

ယွံခမဳတအ် ရဴဝွံ ဒးသၟိတ်ပတိုန်ရ။ ဗွဲကိုပ်ကၠာ ဒးအာတ်အခေါၚ် ခမဳဗြဴရ၊ အာတ်အခေါၚ်တုဲမ္ဂး ခမဳဗြဴစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။

“ယွံနာဲဗြဴ သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်ပတိုန် ခမဳဗြဴမၞုံယၟုဝွံ ရဴဝွံမ္ဂး သကအ်ရဲခမဳဗြဴမၞုံယၟုဝွံရ၊ ဣဝွံတုန် ပွမကဵုတီရောၚ်။

 

ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန် ခမဳဗြဴမၞုံယၟုဝွံ ရဴဝွံမ္ဂး သကအ်ရဲခမဳဗြဴမၞုံယၟုဝွံရ၊ ယြဴနာဲဗြဴမွဲ မၞုံကဵုပွမသ္ဍိုက်မၠိုက် ပွမသၟိတ်ပတိုန် ခမဳဗြဴမၞုံယၟုဝွံ ရဴဝွံမ္ဂး သကအ်ရဲခမဳဗြဴမၞုံယၟုဝွံရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။

သၚ် ဂပ်ဝ်သၟိတ်ပတိုန် ခမဳဗြဴမၞုံယၟုဝွံ ရဴဝွံမ္ဂး သကအ်ရဲခမဳဗြဴမၞုံယၟုဝွံရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

 

၄၃၄။ ပ္ဍဲအခိၚ်ဂှ် ခမဳဗြဴမွဲ ဖျေံသိက္ခာတုဲ ရာံတိတ်ခရှ်ရ၊ ခမဳဗြဴဂှ် မွဲလှေ်ပၠန် ကလေၚ်ကၠုၚ်တုဲ အာတ်အခေါၚ် ပပယျၚ် ခမဳဗြဴဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ် ကျာ်တြဲအိုတ်ရ။ ယွံခမဳတအ် ပွမဖျေံသိက္ခာ ဒှ်အာကုခမဳဗြဴရ၊ ယြဴဟိုတ်နူဟိုတ်မွဲ ခမဳဗြဴဂှ် ရာမ်တိတ်ခရှ်ရ၊ ဟိုတ်နူဟိုတ်ဂှ် ခမဳဗြဴဂှ် ခမဳဗြဴဟွံသေၚ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴမွဲ နူဘာဇကုပဒတဴ ပြံၚ်အာဘာတဳရ၊ ခမဳဗြဴဂှ် မွဲလှေ်ပၠန် ကလေၚ်ကၠုၚ်တုဲ အာတ်အခေါၚ် ပပယျၚ် ခမဳဗြဴဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ခမဳဗြဴ နူဘာဇကုပဒတဴ ပြံၚ်အာဘာတဳဂှ် မွဲလှေ်ပၠန် ကလေၚ်ကၠုၚ်မ္ဂး ဟဂပ်ဝ်ပပယျၚ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဂမၠိုၚ်ဒှ်တုဲ ဟွံဒုၚ်တဲ ပွမလ္ၚောဝ်ကီု ပွမကးက္ဍိုပ်ကီု ပွမခေပ်သၞေံတဲသၞေံဇိုၚ် ပွမစုတ်ဂဥုဲသရကီု တြုံဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နဒုၚ်တဲရ ရဴဝွံ (သ္ဂးရ)။

 

၄၃၅။ ပ္ဍဲအခိၚ်ဂှ် ခမဳဗြဴဂမၠိုၚ် ဂဇအ်တက်ထွာဲအိုတ်မ္ဂး သာယျေန်တဴ ပွမတၟတ်ဒွံဒၞေဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဟဂပ်ဝ်ဂဇအ်တက်ထွာဲရ၊ ကုခမဳဗြဴမဂဇအ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴမွဲဇကု ဂိယဲဒၟံၚ်ရ၊ ကုခမဳဗြဴဂှ် စာ်စ္ဍးကေုာံမတက်ထွာဲတုဲ ဟွံဒှ်တသိုခ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုခမဳဗြဴ မဂိယဲဂှ် ကဵုအခေါၚ် ပွမတက်ထွာဲကဝက် ‘ပွမဂဇအ်အေမ်ဒေမ်’ ရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဗြဴဂမၠိုၚ် သၠတရဴဇၞော် ပ္ဍဲသ္ၚိဝစ်အိုတ်ရ၊ ခမဳဗြဴဆဗ္ဗဂ္ဂဳဂမၠိုၚ် ပတုံဖျေံဂၠမ်ဂဝ် ပ္ဍဲအတိုၚ်သ္ၚိဝစ်ဂှ်ဟေၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂမၠိုၚ် ဟဂပ်ဝ်သၠးတရဴဇၞော် ပ္ဍဲသ္ၚိဝစ်ရ၊ ကုခမဳဗြဴမသၠးဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် တၞဟ်နသၠးတရဴဇၞော် ပ္ဍဲသ္ၚိဝစ် မၞုံကဵုပံက်လဟာ်လဝ်ပ္ဍဲသၟတ် မၞုံကဵုစၟဳလဝ် ပ္ဍဲလတူရ ရဴဝွံ (သ္ဂးရ)။

 

၄၃၆။ ပ္ဍဲအခိၚ်ဂှ် ခမဳဗြဴဂမၠိုၚ် ဟုံဍာ် နကဵုခၞိက်ကြကောတ်ဗံၚ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴခရှ်ဗြဴ ညးမဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ခမဳဗြဴဂှ် ဟဂပ်ဝ်ဟုံဍာ် နကဵုခၞိက်ကြကောတ်ဗံၚ်ရ၊ ကုခမဳဗြဴမဟုံဍာ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် သဗိုက်သ္ၚု ‘သ္ပအ်သြောံ’ ကီု တိကမၠေတ်ကီုရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် ဟုံဍာ် နတိကမၠေတ် မထီုဗးလဝ်မြမောဝ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴခရှ်ဗြဴ ညးမဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

 

ယွံခမဳတအ် ခမဳဗြဴဂှ် ဟဂပ်ဝ်ဟုံဍာ် နတိကမၠေတ် မထီုဗးလဝ်မြမောဝ်ရ၊ ကုခမဳဗြဴမဟုံဍာ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် တိကမၠေတ်ပကတိရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် ဟုံဍာ် ပ္ဍဲသ္ၚိဇရုၚ်ပလက်ဂမၠိုၚ်မ္ဂး သ္ပပွမညာန်ညေဲအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဟဂပ်ဝ်ဟုံဍာ် ပ္ဍဲသ္ၚိဇရုၚ်ပလက်ရ၊ ကုခမဳဗြဴမဟုံဍာ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဗြဴဂမၠိုၚ် ဟုံဍာ် ပ္ဍဲဒစးဍာ်ဇွောဝ်အိုတ်မ္ဂး သာယျေန်တဴတၟတ်ဒွံဇၟောဝ်ဍာ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဟဂပ်ဝ်ဟုံဍာ် ပ္ဍဲဒစးဍာ်ဇွောဝ်ရ၊ ကုခမဳဗြဴမဟုံဍာ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် ဟုံဍာ် ပ္ဍဲဟွံသေၚ်ကဵုသၞေဟ်ဍာ်အိုတ်မ္ဂး သၟုၚ်လဗၚ်သုရာဂမၠိုၚ် ပလီုပလာ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဟဂပ်ဝ်ဟုံဍာ် ပ္ဍဲဟွံသေၚ်ကဵုသၞေဟ်ဍာ်ရ၊ ကုခမဳဗြဴမဟုံဍာ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

 

ပ္ဍဲအခိၚ်ဂှ် ခမဳဗြဴဂမၠိုၚ် ဟုံဍာ် ပ္ဍဲသၞေဟ်ဍာ်ညးတြုံအိုတ်ရ။ မၞိဟ်ဂမၠိုၚ် “သၟဟ်ညံၚ်ရဴခရှ်ဗြဴ ညးမဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဟဂပ်ဝ်ဟုံဍာံ ပ္ဍဲသၞေဟ်ဍာ်ညးတြုံရ၊ ကုခမဳဗြဴမဟုံဍာ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် သွက်ဂွံဟုံဍာ် ပ္ဍဲသၞေဟ်ဍာ်ညးဗြဴရ ရဴဝွံ (သ္ဂးရ)။